1. Er Aôndo a gbe se sha ibeen na yô, se mba a mfe u eren nyi?

IOR kpishi ka vea nenge a wanye nana bee ter u nan yô, ve yilan nan ér “or bee ter.” Sha mimi yô, mbayev mbagenev ka ve suwa a suwa mbamaren vev gedee. Kwagh ngu a lu nahan, sha ci u hanma wan yô nan due a awambe a mbamaren mba nan. Ka Yehova, Ter wase u sha la, a ne se uma ye. (Ps. 36:9) Se uumace mba se lu ônov nav ne, se wa been un. Er a gbe se sha ibeen na yô, se mba a mfe u henen sha kwagh shi kuren ikyaa sha kwagh shi kôron ijende a mbagenev kpaa.—Gen. 1:26.

2. Yehova una fatyô u lun Ijende yase sha ci u nyi?

² Yehova una fatyô u lun Ijende yase i ishima ishima. Se fatyô u lun ijende na sha ci u se doo un ishima shi se na un jighjigh kua Wan na kpaa. Yesu yange kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yoh. 3:16) Se fa ior kpishi mba yange ve ya ikyar a Yehova kôôsôô yô. Se time sha kwagh u iorov uhar ken a ve.

3, 4. Lu nyi i na ve ikyar i Aberaham ya vea Yehova la kaha kposo a ikyar i Mbaiserael ya vea na laa?

³ Yehova yange yila tertamen u Mbaiserael ér “Huror wam Aberaham.” (Yes. 41:8) Shi 2 Kroniku 20:7 kpa yila Aberaham  ér ikyar u Aôndo. Lu nyi i na ve orjighjigh ne ya ikyar a Aôndo u a gbe un la kôôsôô nahana? Lu sha ci u Aberaham lu a jighjigh u nan.—Gen. 15:6; ôr Yakobu 2:21-23.

⁴ Sha hiihii la Yehova lu Ter kua Huror u ônov mba Aberaham mba ve hingir ikyurior i Iserael la. Nahan kpa, kwagh er yô, ve vihi ikyar i ve ya a Aôndo la. Sha ci u nyi? Ityôkyaa yô, ve kera na uityendezwa mba Yehova jighjigh ga.

5, 6. (a) Yehova hingir Ijende you nena? (b) Ka mbampin mba nyi i doo u se hen sha mini?

⁵ Er u lu henen kwagh u Yehova seer a seer la, jighjigh u ú ne un la una lu taver seer a seer, shi una lu doon we ishima seer a seer. Hide hen ase er yange u va fa er Aôndo a lu or jim jim, u ú fatyô u kôron ijende a na ve lu u yô. Shi u hen er se cii i mar se ken isholibo sha ci u ihyembeato i Adam la yô. Yange u kav er uumace cii ve lu paleghaa a Aôndo yô. (Kol. 1:21) Hen shighe la u mase kaven er Ter wase u sha u se doo un ishima la, a lu ica a vese ga, shi kwagh wase a gbe un ishima yô. Yange se mba henen kwagh u nagh ku a ne sha wan na Yesu la, shi se mba ne ku jighjigh yô, maa se hii u yan ikyar a Aôndo.

⁶ Er se hidi se gbidye kwar sha akaa ne nahan, doo u se pine ayol a ase ser: ‘M ngu seer taver a taver ikyar i m ye vea Aôndo la kpa?’ ‘M ngu nan Yehova, ijende yam i ishima ishma la jighjigh seer a seer kpa? Ngu doon mo ishima seer a seer hanma iyange kpa?’ Orgen u ngise ya ijende a Yehova kôôsôô nahan yô, lu Gidion. De se time sha ikyav i dedoo i Gidion la, sha er se fatyô u dondon i yô.

7-9. (a) Ka kwagh u kpilighyol u nyi yange er Gidion, man kwagh ne bende a na nena? (Nenge foto u ken mhii la.) (b) Se ya ikyar a Yehova nena?

⁷ Orjir Gidion yange civir Yehova ken shighe u ican, zum u Mbaiserael nyôr ken Tar u Ityendezwa kera la. Mbaajiriv ityough 6 pase ér ortyom u Yehova va hen Gidion hen Ofera. Hen shighe la Mbamidian mba ve wa ndor a Mbaiserael la lu anger ve kpoghuloo je. Sha ityôkyaa ne yô, Gidion lu gbiren alakema, kpa lu ken sule ga, lu shin ihungwa i shoghol wain, sha er una fatyô u yeren sam u alakema la fele yô. Er ortyom va ande hen a na yila un ér “orageegh u tseen ishima” yô, cier Gidion iyol, tsô a pine ortyom la ér una fa aluer mimi je Yehova u yange yima Mbaiserael sha ikyev i Mbaigipiti la soo u yiman ve hegen yô. Ortyom u lu lamen sha ci u Yehova ne, taver Gidion ishima ér Yehova ngu a na.

⁸ Kwagh ne taver Gidion kpishi, a gba henen er un nahan una “yima Iserael sha ikyev i Midian” yô. Yehova pase un wang, a kaa a na ér: “Me lu a we, ú hemba Mbamidian er ka or môm nahan.” (Mbaj. 6:11-16) Nahan je kpa, kwagh ne kuma Gidion ga, nahan a soo ér i tese un ikyav. Aluer u nenge yô, Gidion lu a akperan cuku ga, kpa lu lamen er ngu nengen a Yehova iyol na nahan.

⁹ Kwagh ugen shi er, u yange seer taver jighjigh u Gidion shi wase un u seer kporom hen Aôndo yô. Gidion yôr ortyom la iwer. Zum u ortyom la bende gbough ku lu a mi la sha kwaghyan la yô, a hia kera, nahan Gidion mase kaven er i lu ortyom u Yehova jighilii a ve hen a na yô. Kpiligh Gidion iyol tsô a kaa ér: “M saa ve Tere, AÔNDO! gadia m nenge a Ortyom u TER ishigh a ishigh.” (Mbaj. 6:17-22) Kpa kwagh u er ne vihi mlu u Gidion vea Aôndo naa? Mayange ga cii. U ma lu nahan yô, Gidion seer fan Yehova je yô, hemba lun ken bem vea Aôndo na cii. Se fa nahan sha ci u Gidion yange ta atse hen ijiir la, yila a ér “Yehova-shalom.” Inja na ér “[Yehova] ka bem.” (Ôr Mbaajiriv 6:23, 24.) Ka sea gbidyen kwar sha akaa a Yehova a eren a vese ayange ayange la yô,  se mase kaven er a lu Ijende yase mimi yô. Ka sea eren msen hen Aôndo hanma shighe yô, se seer zuan a bemshima shi se seer taver ikyar i se ye vea na la.

10. Pasalmi 15:3, 5 pase kwagh u i gbe u se er keng ve se lu azende a Yehova la ér nyi?

¹⁰ Akaa agen nga a i gbe u se eren keng ve se lu azende a Yehova yô. Davidi yange wa icam ken Pasalmi u sha 15 la ter akaa a i gbe u se er keng ve, se kuma u ‘tsan ken tenti u Yehova’ shin lun ijende i Aôndo yô. (Ps. 15:1) De se time sha akaa ne ahar, u hiihii yô, gba u se palegh angereke man u sha uhar yô, gba u se eren akaa cii sha mimi. Davidi yange pase kwagh u or u nan tse ken tenti u Yehova nana er sha akaa ne yô, a kaa ér: “Nan eren anger sha zwa u nan ga . . . Nan ngohol inyaregh ki yamen ishô sha u geman nan orishôôgh ibo ga.”—Ps. 15:3, 5.

11. Er nan ve i gbe u se palegh u senden mbagenev ityougho?

¹¹ Ken Pasalmi ugen la di Davidi ta icin ér: “Kura zwa wou u̱ de er kwaghbo ga.” (Ps. 34:13) Aluer se wa ikyo sha kwaghwan u jijingi mgbegha Davidi ve nger ne ga yô, mayange se fatyô u lun azende a Ter wase u sha u perapera la ga. Jighilii yô, ka Satan orihyom u Yehova u hemban la, a lu or u senden ior ityough ye. Ishember i Diabolo la, í zua a i ken ishember igen ken zwa Grika, man inja i ishember shon ér “ormsende.” Aluer se mba lamen sha mbagenev dang ga yô, se za hemen u lun ikyua a Yehova. Man gba u se hemba wan ikyo sha ieren yase a mba ve hemen ken tiônnongo la cii.—Ôr Mbaheberu 13:17; Yuda 8.

12, 13. (a) Er nan ve i doo u se zenden sha mimi sha akaa ciilii? (b) Ieren yase i mimi la ka i na mbagenev ve ôr nyi sha kwagh wase?

¹² I fa mbacivir Yehova ér ka ior mba mimi, mba ve soo anyighe ga yô. Apostoli Paulu yange nger ér: “Eren nen msen sha ci wase, gadia se fa dedoo ser, se mba a imo i dedoo ken ishima, sar se u zenden tsembelee [shin sha mimi] sha akaa cii.” (Heb. 13:18) Er se kange ishima ser, se ‘zenden sha mimi sha akaa cii’ yô, se mba keren u yan mtsera sha anmgbianev asev mba ken Kristu ga. U tesen ikyav yô, aluer se tôô ve tom yô, gba u se eren a ve sha inja shi se kimbin ve er yange se tôndo zwa a ve nahan. Er se lu Mbakristu yô, se mba nyighen mba se tee ve tom la kua ior mbagenev ga. Shi or u se civir Yehova a nan imôngo ka nana tôô se tom yô, se mba keren ser nana er a vese i hemba er ma i lu la ga.

¹³ Ka se shi ungwan er ior mba ve lu Mbashiada ga, ve wuese Mbashiada mba Yehova sha ci u ieren ve i mimi la yô. U tesen ikyav yô, orvesen u zege kômpeni ugen yange nenge er Mbashiada mba Yehova ka vea ôr kwagh yô ve er sha mi yô. Nahan a kaa ér: “Ka nea ôr kwagh yô, ne er sha mi keng.” (Ps. 15:4) Imba ieren la ngi i na se ya ikyar a Yehova kôôsôô. Shi i ve Ter wase u sha la a iwuese.

14, 15. Se wase mbagenev u hingir azende a Yehova zum u se lu eren tom wase u pasen kwagh la nena?

¹⁴ Er ior mbagenev mba se tagher a ve ken kwaghpasen la kpishi ve ne jighjigh ér Aôndo ngu nahan kpa, mba nengen un ér ngu Ijende ve i ishima ishima ga. Se wase ve nena? Gbidye ase kwar sha kwagh u Yesu yange wa Mbahenen nav 70 zum u lu tindin ve uhar uhar ér ve za pase kwagh la, a kaa a ve ér: “Hanma ya u nea nyôr kpaa, vande kaan nen ner: Bem a̱ lu hen ya ne. Aluer wan u bem una lu her yô, bem wen una lu sha a nan; una lu ga yô, una shi á hire hen a ven.” (Luka 10:5, 6) Aluer se mba lamen a ior kundu kundu yô, kwagh la una fatyô u mgbeghan ve u  va fan mimi. Mba ve hendan a vese je kpa, kwagh la una na vea de u tswamen se, kpa vea kegh iyol u ngohol se sha ian igen.

¹⁵ Zum u se tagher a ior mba ve we amishe ken kwaghaôndo u aiegh shin ve dondon aeren a na a Bibilo i vende la kpa, doo u se eren kwagh a ve kundu kundu, shi se lu a ve bem bem. Ior mba tar u nzughul a ve man i sar ve u va henen kwagh u Aôndo u se civir la, ka vea va mbamkombo asev yô, se ngohol ve saan saan. Ngeren u i gberen ken Iyoukura u a lun a itinekwagh ér, “Bibilo Gem Ior” la er se kwagh u ambaaior la.

16. Ka sha nyi gbenda nahan se fatyô u lun azende a Yehova kua “mbashirentom” a na imôngo?

¹⁶ Ashighe kpishi ior mba ve eren tom imôngo, ka ve hingir azende a sôngo sôngo. Mba ve tsegh ayol a ve sha ci u Yehova cii mba a ian i icivirigh i lun azende a na kua “mbashirentom” a na imôngo. (Ôr 1 Mbakorinte 3:9.) Sha mimi yô, ka sea eren tom u pasen kwagh shi geman ior hingir mbahenen la yô, se hemba kaven aeren a dedoo a Ter wase u sha la cii. Ka se nenge er icighan jijingi na a lu wasen se u eren tom wase u pasen loho u dedoo la yô.

17. Kwaghyan u ken jijingi u i ne se sha mbamkohol asev mba vesen kua mbakiriki la tesen er Yehova a lu Ijende yase nena?

¹⁷ Ka sea seer eren tom wase u pasen kwagh la yô, se hemba lun kôôsôô a Yehova cii. U tesen ikyav yô, ka se nenge er Yehova a lu haan mbaahendanev abata sha er vea korcio u cirin tom wase ga yô. Hide gbidye ase kwar sha anyom a a sember karen kpuaa ne. Yehova ngu kuran se je ka u ôron ga. Ngu koson se sha kwaghyan u ken jijingi u wan ahôm je gande iyol. Mbamkohol asev mba vesen kua mba kiriki ka ve wase se u kaven er Ter wase u sha u se doo un ishima la a fe mbamgbe asev kua mbamzeyol asev cii yô. Tsombor ugen yange u za mkohol u vesen, ngu hidi yô, u nger washika u nan iwuese, u pase ér: “Mkohol ne kôr se ken ishima tsung. Se nenge er se doo Yehova ishima asange asange shi a soo ér i kpe se iyol yô.” Zum u orgen ken tar u Jamani vea kwase na za hide mkohol u vesen ugen u ve za ken tar u Ireland yô, ve pase er yange i ngohol ve sar sar shi i nenge sha a ve tsembelee ve saan ve iyol yô, shi ve kaa ér: “Nahan cii kpa, se hemba sughun Yehova kua Tor na, Yesu Kristu cii. Ka ve ve urugh se ve ve a vese ken mzough u ikyurior i mimi ne ye. Mzough ne ka u sha ikpa zwa ga, kpa ka u se nengen a mi hanma sev yô. Mkohol u vesen u se ze ken gar u Dublin ne una hungur se mayange ga, kpa una za hemen u umbur se er se lu a ian i icivirigh  i civir Aôndo wase u hemban cii la a ven imôngo yô.”

18. Ka nyi i doo u se pine ayol a ase sha kwagh u iliam yase a Yehova?

¹⁸ Azende nga a lamen hanma shighe yô, ijende ve la i hemba taver. Nyian ne, ior ka ve shi lamen a mbagenev sha Intanet shi tindin ve a ilyoho. Kpa Yehova u a lu Ijende yase i ishima ishima la yô, se mba lamen a na hanma shighe kpa? Se fa er Yehova a “ongo msen” yô. (Ps. 65:2) Nahan kpa, se mba keren shighe u lamen a na je he?

19. Ka iwasen i nyi se fatyô u zuan a mi shighe u i taver se u bughun zwa pasen Ter wase u sha la ishima yase?

¹⁹ Mbacivir Yehova mbagenev mba fetyô u lamen gbar gbar, pasen er ishima i lu ve ker jighilii ga. Nahan kpa, Yehova soo ér se lamen a na gbar gbar ken msen. (Ps. 119:145; Ukwe. 3:41) Aluer taver se u duen a kwagh u a lu se ken ishima la sha zwa je kpa, kwagh hemba se a hemba je ve ga. Paulu yange nger Mbakristu mba ken Roma washika ér: “Gadia se fa u eren msen er i doo u ma se er la ga, kpa Jijingi iyol Na ngu eren msen sha ci wase sha mbamkin gande u pasen. Kpa Un u A tim asema la A fa er ishimaveren i Jijingi i lu yô, gadia ka sha ishima i Aôndo A lu eren msen sha ci u uicighanmbaiorov ye.” (Rom. 8:26, 27) Aluer se mba gbidyen kwar sha akaa a i nger ken Bibilo, er ken takerada u Yobu man Upasalmi man Anzaakaa la yô, kwagh la una wase se u pasen Yehova er ishima i lu se ker jighilii la.

20, 21. Mkaanem ma Paulu ma ken Mbafilipi 4:6, 7 la ma a fatyô u surun se ishima nena?

²⁰ Zum u se tagher a akaa a nan se iyolkpen yô, doo u se dondo kwagh u Paulu yange wa Mbakristu mba ken Filipi la, a kaa ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.” Aluer se mba lamen a Ijende yase i ishima ishima la gbar gbar nahan yô, se fatyô u zuan a ishimasurun, gadia Paulu shi kaa ér: “Bem u Aôndo u a gande hanma mfe wase cii una kura asema a en man mbamhen enev ken Kristu Yesu.” (Fil. 4:6, 7) Yô, “bem u Aôndo” u a hembe cii, u a kor asema ase kua mbamhen asev la a gba se kwagh.

²¹ Msen ngu a wase se u yan ikyar a Yehova kôôsôô. Nahan yô, se “eren nen msen gbem.” (1 Tes. 5:17) Kwaghhenen ne a wase se u seer taver ikyar i se ye vea Aôndo la, shi a wase se se kange ishima u dondon atindi na a perapera la. Shi se tôô nen shighe se gbidyen nen kwar sha averen a se zuan a mi sha ci u Yehova ngu Ter wase shi ngu Aôndo wase kua Ijende yase i mimi la.