Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mbamlumun sha mbampin mban yô:

Ka hanma shighe nahan yange i gba u a sôngo waniyôngo u Paseka sha iyange i Nisan 14 la?

Ubibilo mbagenev kaa ér yange i gba u a sôngo waniyôngo la sha “aôndoaimegh,” inja na yô, i lu sha shighe u iyange i mir kpa ime i lu a wa ga yô. (Eks. 12:6)​—12/15, peeji 18-19.

Ka akaawan a ken Bibilo a nyi aa wase agumaior u tsuan akaa a dedoo a vea ere?

Nga atar (1) Vande keren Tartor u Aôndo man perapera na. (Mat. 6:19-34) (2) Zua a msaanyol sha u eren akaa sha ci u mbagenev. (Aer. 20:35) (3) I saan we iyol u eren Yehova tom shighe u u lu iyev ne. (Orpa. 12:1)​—1/15, peeji 19-20.

Ka hanma shighe “ivaa i zuan i Waniyôngo” la ia kuma? (Mpa. 19:7)

“Ivaa i zuan i Waniyôngo” ia kuma shighe u Tor Yesu Kristu una hemba mbaihyomov nav ityav gburu gburu la, inja na yô, ka shighe u a tim Zegebabilon shi a nôngo ityav mbi Armagedon a kar kera la je la.​—2/15, peeji 10.

Er nan ve Mbayuda mba sha ayange a Yesu la “lu veren ashe” a Mesiya? (Luka 3:15)

Se fatyô u kaan ser ior mba sha ayange a Yesu mbara yange ve kav kwaghôron u profeti u sha kwagh u Mesiya la wang er se nahan ga. (Dan. 9:24-27) Nahan kpa, alaghga yange vea ungwa kwagh u ortyom yange yôô hen mbakuranilev mbagenev la, shin kwagh u Ana, profeti u kwase la yange ôr shighe u nenge a wanikyundan Yesu ken tempel la. Shi mbafankwagh kpa due lu va keren “Tor u Mbayuda u i mar Un ne.” (Mat. 2:1, 2) Shighe kar yô, Yohane u eren Batisema kpa va pase ér ica ia gba ga tsô Kristu una va.​—2/15, peeji 26-27.

Se er nan ve Een wase una hingir Ei ga? (2 Kor. 1:18)

Sha mimi yô, alaghga shighe ugen a gba u se bunde kwagh u se tende zwa u eren la sha ci u kwagh u hange hange ugen va due, u i gbe u se bunde ga yô. Kpa aluer se tôndo zwa u eren ma kwagh yô, a gba u se nôngo sha afatyô wase cii se er un.​—3/15, peeji 32.

Se fatyô u hendan a imeen i nengen foto u ijimbagh nena?

Igbenda itiar i ia wase se yô ka u (1) Geman ashe ase kera fese shighe u se nenge a foto u ijimbagh jinge yô. (2) Vendan mbamhen mba bov sha u henen sha akaa a a hembe lun a inja la, shi eren msen hen Aôndo. (3) Shi kuran ieren yase sha u palegh u nengen ufiim mba ijimbagh shin palegh u zan sha ajiir a sha Intanet a a lu a ufoto mba ijimbagh la.​—5/1, peeji 8-10.

Aluer Orkristu undu tsombor u nan yem u za keren inyaregh ken tar u ken won yô, ka akaa a vihin a nyi aa fatyô u tseren tsombor u nan, a nan ver ishima ér aa er ga?

Mbamaren ka vea kera lu imôngo vea tsombor ve ga yô, ieren i ônov vev man mlu ve u ken ishima la ngu a vihi. Shi ashighe agen ormaren la shin mbamaren mbara ve kera doo mbayev vev ishima ga. Shi or u nan undu kwase shin nom u nan yô, alaghga nana tagher a ameen a eren idya.​—4/15, peeji 19-20.

Ka mbampin unyiin mba nyi se fatyô u lun a mi ken ishima shighe u se ze u za pasen ior kwagha?

Ka unô ior me la a ve? Ka han m lu za lamen a ve? Ka hanma shighe i hemba doon u me lam a ve? Me lam a ve nena?​—5/15, peeji 12-15.