INJA i ishember i “Eureka” la ér “M zua a mi ve!” Ken derianyom u sha 19, shighe u i dughun zenaria ken kpentar u California, tar u Amerika kpoghuloo la, or a za tagher a zenaria yô, nan ngor, nan yila ishember la. Kpa anmgbian Charles Taze Russell vea Mbahenen Bibilo mbagenev yô, ve zua a kwagh ugen u hemba lun a inja yô; lu mimi u a dugh ken Bibilo la. Shi maa ve iyol u pasen mbagenev kwagh ne kpishi.

Ken fam u inyom i 1914 la, ior umiliôn imôngo ken ugar mba vesen lu nengen “Photo-Drama of Creation” (Foto u Inumbe i Kwagh u Igbetar), i Mzough u Mbahenen Bibilo sha Tar Cii, due a mi, i i lihe kuma ahwa anigheni la. I er tser u u har sha Bibilo ne, lu a ufoto mba tenger shi duen ukala mba korough ashe, shi i kuhwa ityogholough ker mbi doon ungwan, shi i pase u sha gbenda u doon tsung, nahan u tese ior kwagh u igbetar shi u ôr yiase i uumace kua kwagh u una er ken mkur u Hemen u Kristu u Anyom Dubu la kpaa.—Mpa. 20:4. *

Kpa mba ve lu ken ugeri man agar a ken toho hiinii la di ye? Ken uwer u Agusutu 1914 la, Mbahenen Bibilo mban due a tser u “Photo-drama” la u kiriki, i yilan ér “Iniumbe i Eureka.” U lu a ufoto mba tenger er tser u “Photo-Drama” nahan ga, sha er hanma or u i sar nan u fan mimi cii nana fatyô u nengen yô. Tser u Eureka ne lu a avegher ker atar, a or a fatyô u nengen yô, man hanma vegher yô, i er un ken ijô kpishi. Vegher u hiihii la i yilan un ér “Eureka X,” lu a ityogholough shi i ôr mkaanem ma pasen u ker. Vegher u sha uhar u i yilan ér “Eureka Y” la lu a akaaôron a ken Bibilo, kua ufoto mba duen miren, mba lun ukala kposo kposo. Vegher u sha utar u i yilan ér “Eureka Family Drama” la, lu sha ci u tsombor. U lu a mkaanem ma pasen u man ityogholough kpuaa. Shi mbaanar mba tesen senema a mi man anar u kuhwan tser u i yilan ér phonograph (geramafon) la kpa taver ishe u yamen ga.

Er kera gba u Mbahenen Bibilo vea lu a anar u tesen senema shin zege jingi u nengen tser u Eureka u ve tesen ior gbilin la a mi ga yô, ve tôô u ve yem a mi ken agar, ve za pase loho u Tartor a mi hen uharegh mba i lu a gba pasen kwagh her ga yô. Tser u “Eureka X,” u i ungwan a ungwan tseegh la, yange i wa u atetan shin tugh. Anar u tesen tser u “Eureka Y” la di i nengen un a usu u latriki shio, yange i tsar un sha usu u kabar. Ibaver igen ken Iyoukura i ken zwa Finnish kaa ér: “Hanma ijiir cii yô, se fatyô u tesen ufoto mba vidio mban.” Man kape lu kpaa je la!

Mbahenen Bibilo kôron haya sha ajiir a vesen a tesen senema ga, kpa ve ker igbenda kposo kposo i vea  zua a ajiir a gbilinigh a vea tese iniumbe ne yô. Ve ker ajiir er uklase mba ken makeranta man ayou a ôron ijir her man utashan mba girgidogo kua upalo mba ken uya mba vesen je kpaa nahan. Ve hemban tesen senema ne ken won, ve ta zege ikyondo i pupuu sha kpekpe u wuna, i lu er ka “jingi” nahan. Anmgbian Anthony Hambuch nger wener: “Mbasulev yange ve tar agbur a ikyon ken ishule ve i ikyon, nahan ior ve tema sha mi ve nenge senema ne.” Anmgbianev mba tesen tser u “Eureka” la eren tom a “ikyekye i kperan a kpera” sha u kuran ikyav vev, man akpa man ikyav mbi haan afo a mi kua mbi yôron.

I tesen tser u “Eureka” la, ape ior ve kumba kpuaa shin ve kumba uderi imôngo kpaa cii. Ken tar u Amerika, i tese tser ne hen angar ugen u lu a iorov 150 tseegh yô, kpa ior gema va kuma 400. I tese u ken klase ugen. Hen ijiir igen di yô, ior mbagenev er zende kuma ukilomita 16, u zan man u hiden, ve za nenge “Iniumbe i Eureka” ne. Ken tar u Sweden kpa, mbawan ndor a anmgbian u kwase Charlotte Ahlberg kumba ken anyou na u cuku lu ungwan icer ne, mba been yô, “kwagh ne kôr ve ken ishima tsung.” Hen gar ugen ken tar u Australia, ape i dughun kuza yô, ior mbagenev mba kuman er 1,500 nahan za nenge senema ne. Iyoukura yange pase ér ken ukôleeji man uyunivasiti yô, “uprofesô man mbayevmakeranta ka vea nenge ufoto mban man akaaôron a doon tsung a se kura ken geramafon la yô, i doo ve i gande.” “Iniumbe i Eureka” la yange i za gwa sha ajiir a a lu a mbaagirigi mba tesen senema mbagenev la je kpaa.

Atôônanongo a Mbahenen Bibilo yange a tindi mbanan akaaôron sha ajiir kposo kposo ve za na akaaôron shi ve tese “iniumbe i Eureka” la her, maa ve bugh atôônanongo a he. Taver u fan iyenge i ior mba ve nenge “Iniumbe i Eureka” la. Icer i “Iniumbe” ne igen kpishi ior nenge i kwa kimbir kimbir. Nahan kpa, ken inyom i 1915 la, lu iniongo 14 ken atô u iniongo 86 i i tesen “Iniumbe” ne la, naan ripoti hanma shighe ye. Yange i na ripoti i sha inyom, i vaa iyol er yange i zua a ibaver sha kwagh ne cica ga yô, kpa i gema i pase ér ior nenge “Iniumbe” ne hemba iorov miliôn môm. Iorov mba kuman er 30,000 nahan kaa ér i̱ va na ve ityakerada i pasen Bibilo.

Er alaghga ior kpishi vea umbur kwagh u “Iniumbe i Eureka” ne ga nahan kpa, ken tar u Australia man Argentina man South Africa man ajiir agen ken tar u Ingila man India man Caribbean yô, ior umiliôn imôngo yange ve fatyô u nengen senema u doon tsung ne. Ve kpishi ve zua a mimi u ken Bibilo, u hemba lun a inja a zenaria la, nahan lu u ve kpa vea fatyô u ngoron kaan ér, “Eureka!”