ALUER i tôô kon u sedar u ken Lebanon, u doon ashe tsung la i kar sha kon u olev, u u ze jighilii ga la yô, a lu inja er kon u olev doo ashe kuma sha sedar ga nahan. Kpa ikyon i olev gema ngi a tahav mbu kpiligh iyol, mbu waren sha ashighe a ican tsung. Ikyon i olev igen tsa nôngo u kuman anyom 1,000. Kon u olev ka u wa amishe i yem shin inya ica, nahan aluer i gber itine i u kera je kpa, ua fatyô u hiden shi menden. Er amishe a u a lu uma her je, ua fatyô u hiden menden.

Tertamen Yobu yange na jighjigh ér aluer un kpe je kpa, una fatyô u shi hiden lun uma. (Yobu 14:13-15) Adooga tsô lu kon u olev la a tese ikyav sha mi ye, sha u tesen ér un ngu a vangertiôr ér Aôndo una fatyô u va nderen un shin ku. Yobu kaa ér: “Kon u i gber u yô, mba fan er, shi ua hôm, ua de taan agbaa ga.” Shighe u icegh i bee, ura u hii u nôôn yô, ikpughur i uman i kon u olev la, ka i nder, nahan i “ta agbaa” er kon u he nahan.—Yobu 14:7-9.

Sase Yehova Aôndo iyol u va nderen mbacivir un man mbagenev mba ve kpe la, vough er orsule kpa ka i sase nan iyol u va nengen a kon u olev u i gber u la, shighe u ua hide a nder la nahan. (Mat. 22:31, 32; Yoh. 5:28, 29; Aer. 24:15) Nenge imba er a va saan se iyol u keghen mbakpenev gbenda, shi nengen er vea hide a lu uma la sha won yô!