1. (a) Ka nyi mbacivir Aôndo ve fe sha kwagh u tsaase mbagenev la ica i gbe hegene, man kwagh ne ngu se a inja nyian nena? (b) Ka nyi se lu timen sha mi ken ngeren nee?

MBACIVIR Aôndo fa er ityesen i wasen or u zan ikyura yô ica gba hegen. Tertamen Aberam yange “mough a ior nav mba fan ityav [shin mba i tese ve u nôngon ityav]” la, ve za nôngo ityav ve ngohol Loti ve hide a mi. (Gen. 14:14-16) Sha ayange a Tor Davidi la di, i “tese” shin i tsaase ior mbagenev ér ve waan “atsam a wan wuese TER” Aôndo ken iyou na, man kwagh ne va Aôndo a icivir kpen kpen. (1 Kron. 25:7) Nyian ne, se mba nôngon ityav mbi ken jijingi a Satan man mbadondon un. (Ef. 6:11-13) Shi se mba nôngon kwagh kpoghuloo sha er se va Yehova a iwuese yô. (Heb. 13:15, 16) Sha nahan yô, cii man se za ikyura yô, a gba u a tsaase se, er mbacivir Aôndo mba sha ayange a tsuaa la nahan. Yehova na mbatamen tom u tsaase mbagenev ken tiônnongo la. (2 Tim. 2:2) Ka igbenda i nyi mbatamen mba ve fe tom ve tsembelee la, ka ve dondo u tsaase anmgbianev sha u ve kuma u nengen sha ikyumuile?

2. Cii man ortamen nana tese orngohol ityesen la sha u nana fa akaa a i gbe u nana er la yô, ka nyi adooga ortamen nana ere, man ka sha ci u nyi?

² Er u lu ortamen yô, se fatyô u tôôn we karen sha orsule. Cii man  orsule nana lôô yiav yô, alaghga nana vande wan icigh shin inya, sha er yiav mbi nan mbia hemba doon yô. Nahan we kpa cii man u hii u tesen ma anmgbian akaa a nan fe u eren tsembelee ga la yô, alaghga a gba u u ôr nan avur a Ruamabera a taver nan ishima, sha er u sôr ishima i nan ia hemba ngohol ityesen i u soo u nan nan la yô.—1 Tim. 4:6.

3. (a) U fatyô u eren tom a mkaanem ma Yesu ma ma lu ken Marku 12:29, 30 la shighe u u lu lamen vea orngohol ityesen la nena? (b) Msen u ortamen nana er sha ci u orngohol ityesen la una fatyô u wasen nan nena?

³ Cii man u fa er mimi u sha kwagh u Tartor la a bende a mbamnenge man mbamhen mba orngohol ityesen la yô, u fatyô u pinen nan wer, ‘Iyol i u tsegh sha ci u Yehova la gema gbenda u u eren kwagh ken uma wou la nena?’ Mpin ne una fatyô u wasen ne u lamen sha kwagh u or a er ve a tese ér nan ngu civir Yehova a ishima i nan cii yô. (Ôr Marku 12:29, 30.) Alaghga ne been liam kera cii yô, u fatyô u eren msen, pinen Yehova wer a na orngohol ityesen la icighan jijingi na u una wase nan u kaven kwagh u u soo u tesen nan la yô. Nenge imba er anmgbian la una ungwa msen u u er sha ci na a ishima i môm la ve una zua a ishimataver sha won yô!

4. (a) Tese akav ken Bibilo a a wase orngohol ityesen la u vesen ken jijingi yô. (b) Ka awashima u nyi mbatamen ka ve lu mi shighe ve lu tsaase mbagenev laa?

⁴ U hiin u tsaase orngohol ityesen la yô, time sha avur a Bibilo agen a a wase nan u fan er i gbe u nana kegh iyol u eren tom u i lu tsaase nan ér nana er la, shi nana eren kwagh sha mimi shi nana hiden a iyol ijime yô. (1 Utor 19:19-21; Neh. 7:2; 13:13; Aer. 18:24-26) Gba u orngohol ityesen nana lu a aeren a hange hange ne, er icigh ki ka i wa shin inya ér iyiav mbi doo la nahan. Aeren ne ka a wase nan u vesen ken jijingi fele. Anmgbian ugen u a lu ortamen ken tar u France yô, kaa ér: “Awashima wam u tsaase orngohol ityesen jighilii yô, ka u me wase nan nana hemba veren ishima sha a kaa a ken jijingi. Ka m ker aan a me fatyô u ôron ma ivur Ruamabera imôngo vea orngohol ityesen la, sha u me ‘bugh nan ashe’ nana ‘nenge akaakpilighyol’ a ken mkaanem ma Aôndo la yô.” (Ps. 119:18) Ka igbenda igen i nyi kpa se fatyô u wasen orngohol ityesen la u vian ken jijingi?

5. (a) Ka hange hange u lamen a orngohol ityesen sha akaa a ken jijingi a nan we ishima u eren la nena? (b) Gba u mbatamen vea tsaase anmgbianev shighe u ve lu iyev la sha ci u nyi? (Nenge ngeren u shin kpe la.)

⁵ Pine orngohol ityesen la wer, ‘Ka akaa a ken jijingi a nyi u we ishima u erene?’ Aluer mlumun u nan ne la tese ér nan fa akaa a nan we ishima u eren la jighilii ga yô, wase nan nana tsua kwagh u nana fatyô u eren la. Pase nan kwagh u ken jijingi u yange u tsua u eren, shi u va er un ve saan we iyol kpishi la jighilii, shi ôr nan kwagh ne sar sar. Alaghga a lu inja er mhen ne ka u ikyoo ga nahan, kpa ka a wase kpen kpen. Anmgbian ugen u a lu ortamen shi a eren tom pania, u i yer un ér Victor la, kaa ér: “Shighe u m lu iyev la, ortamen ugen pinem mbampin mba injaav kpuaa sha akaa a m wa ishima u eren la. Mbampin mbara wasem m hii u henen sha kwagh u tom u pasen kwagh la kpoghuloo.” Shi mbatamen mba ve fe tom ve tsembelee la ka ve pase var var er i lu hange hange u tsaase anmgbianev shighe ve lu iyev la yô, sha u nan ve ityom ken tiônnongo i vea fatyô u eren la. Aluer i hii u tesen agumaior iyev nahan yô, kwagh ne una wase ve u tsuan akaa a ken jijingi a vea er shighe u vea va we ikyondo shi akaa a danen ve kpa aa lu kpishi la.—Ôr Pasalmi 71:5, 17. *

6. Ka gbenda u injaa u nyi Yesu yange dondo sha u tsaase mbageneve?

⁶ Shi u fatyô u kenden isharen i orngohol  ityesen la sha u pasen nan kwagh u nana er la, kua atôakyaa a a ne ve u soo wer nana er kwagh shon la kpaa. Aluer u pase nan atôakyaa yô, u ngu dondon ikyav i Yesu, Ortesen u Hemban la. Ikyav i tesen yô, cii man a na mbaapostoli nav tom u geman ior hingir mbahenen la yô, Yesu yange ôr ve ityôkyaa i na ve gba u vea ungwa kwaghwan la yô. A kaa ér: “Tahav mbu Sha man mbu sha won cii i wam sha ikyev.” Shi a kaa ér: “Nahan yô, za nen, za gema nen akuraior cii a̱ hingir mbahenen.” (Mat. 28:18, 19) U fatyô u dondon gbenda u Yesu tsaase mbagenev la nena?

7, 8. (a) Mbatamen vea fatyô u dondon gbenda u Yesu tsaase mbagenev la nyian nena? (b) Ka a inja u wuese or u nan lu ngohol ityesen la nan je? (c) Ka mbamhen mba nyi i dugh a mi, mba vea fatyô u wasen mbatamen u tsaase mbageneve? (Nenge ngeren u kiriki u a lu a itinekwagh ér, “ Er Ka I Tsaase Mbagenev Yô” la.)

⁷ Pase orngohol ityesen la wer kwagh u i kaa ér nana er la har sha Bibilo. Aluer u er nahan yô, u wase nan u henen sha akaawan a Bibilo, a lu atindi Bibilo tseegh tsô ga. Ikyav i tesen yô, aluer u kaa a ma anmgbian wer nana ovur ihyundu sha akaateman ken Iyou i Tartor sha er a lu sha ashe wang yô, u fatyô u ôron Titu 2:10 vea nan shi pasen nan er tom u i we nan ken Iyou i Tartor la u lu tom u “hweegh sha ityesen i Aôndo Oryiman wase” yô. Shi kaa a orngohol ityesen la wer nana hen sha kwagh u anmgbianev mba nomso man mba kasev mba ken tiônnongo la, nahan nana nenge er aluer nan er tom ne ve a wase ve yô. Aluer u ngu lamen vea orngohol ityesen la sha ambaakaa ne nahan yô, kwagh ne una wase nan nana hemba veren ishima sha kwagh u wan ior ikyô la, a kwagh u dondon atindi la. Nahan nana zua a msaanyol u or ka nan zua a mi shighe u anmgbianev mba nomso man mba kasev mba ken tiônnongo ve lu zuan a iwasen sha tom u nan lu eren la yô.

⁸ Heela tseegh ga, i de hungur we u wuese orngohol ityesen la sha iniôngon i nan lu nôngon ér nana dondo mbamhen mba u dugh a mi la ga. Gba hange hange u u er kwagh ne sha ci u nyi? Sha ci u aluer u wuese orngohol ityesen la sha mimi yô, nana vese ken jijingi, er mngerem ka ma wase kon u vesen nahan.—Nenge Mateu 3:17.

9. (a) Ka mtaver u nyi mbatamen mba ve lu ken ityar i lun a kwagh ave la ka ve tagher a mi sha kwagh u tsaase mbagenev laa? (b) Agumaior agen ver kwagh u mimi hiihii ken uma ve ga sha ci u nyi?

⁹ Ka i lu mbatamen mba ve lu ken ityar i lun a kwagh ave kpishi la ican tsung u taver anmgbianev mba ve er batisema, mba hemban anyom 20 shin 30 nahan la ishima ér ve tume ityough eren akaa a ken tiônnongo. Yange se pine mbatamen mba ken ityar i Abuter, mba ve fe tom ve tsema tsema la ser  ve pase se er i hii ve ve hen ér agumaior agen ka a soo u seer eren ityom i ken tiônnongo ga yô. Ka kwagh u vesen u se zua a mi ken akaa a ve ôr la je ne: Shighe u agumaior agen lu vesen a vese la, i taver ve ishima u tsuan akaa a ken jijingi a vea er ken uma ve ga. Mimi yô, agumaior agen yange soo u tsuan akaa a ken jijingi a vea er yô, kpa mbamaren vev gema taver ve ishima u zendan akaa a taregh! Sha nahan yô, agumaior ne ver kwagh u mimi hiihii ken uma ve ga.—Mat. 10:24.

10, 11. (a) Ortamen nana fatyô u wasen ma anmgbian u nan soo u seer eren ityom ken tiônnongo ga la kure kure, nana gema mnenge u nan la nena? (b) Ka avur a Ruamabera a nyi ortamen nana fatyô u timen sha mi vea anmgbian la, man ka sha ci u nyi? (Nenge ngeren u shin kpe la.)

¹⁰ Aluer ka inja er ma anmgbian nan soo u seer eren ityom ken tiônnongo ga yô, a gba u u nôngo kwagh kpoghuloo shi u wa ishima a nan kpishi ve u fatyô u geman mhen u nan la ye. Er orsule ka nan kôôm imende i iyiav mbi nan mbigen kure kure, sha u timin mbi ikyon ér mbi kamber sha mi, mbi vese jighilii la nahan, we kpa u fatyô u wasen anmgbianev mbagenev kure kure vea kav er i gbe u vea gema mnenge ve, nahan vea lumun u seer eren ityom ken tiônnongo yô. Kpa u er kwagh ne nena?

¹¹ Nôngo kpoghuloo kôr ijende a anmgbian u u soo u tesen nan la. Pase nan nana fa er i gbe u nana wase tiônnongo yô. Maa shighe a karen yô, tema vea nan time nen sha avur a Bibilo agen jighilii shi wase nan nana gbidye kwar sha kwagh u iyol i nan tsegh sha ci u Yehova la. (Orpa. 5:4; Yes. 6:8; Mat. 6:24, 33; Luka 9:57-62; 1 Kor. 15:58; 2 Kor. 5:15; 13:5) Alaghga u pine nan wer, ‘Shighe u u tsegha iyol you sha ci u Yehova la, lu nyi u tôndo wer u er sha ci na?’ Wase nan nana lu a ishima i seer eren tom ken tiônnongo sha u pinen nan wer, ‘Shighe u u er batisema la, u hen wer yange a lu Yehova ken ishima nena?’ (Anz. 27:11) ‘Yange a lu Satan di ken ishima nena?’ (1 Pet. 5:8) Shi fa wer, aluer u tsua avur a Bibilo sha inja, u ôr vea nan yô, kwagh ne una wase nan kpishi je.—Ôr Mbaheberu 4:12. *

12, 13. (a) Ka ieren i nyi Elisha tese shighe u u lu ngohol ityesen laa? (b) Yehova yange ver Elisha doo doo sha mtil na u sha mimi la nena?

¹² Hide ne agumaior, a i gbe u ne wase tiônnongo la di ye? Ka ieren i nyi ne lu a mi ve ia wase ne u zan ikyura? Se na mlumun sha mbampin mban, sha u timen sha akaa agen a yange er orngohol ityesen ugen sha ayange a tsuaa la yô.

¹³ Profeti Eliya yange kaa a Elisha ér a va lu wanakiriki na, anyom kar hegen nôngo u kuman 3,000. Elisha lumun her ave ave je u lun wanakiriki na, shi er profeti u been iyol ne ityom i sha kwarkyaa ga sha mimi. (2 Utor 3:11) Maa Eliya tsaase Elisha anyom ateratar nga kar yô, Elisha kav er ica a gba ga tsô Eliya una de tom u u lu eren ken Iserael la yô. Hen shighe ne, Eliya kaa a wanakiriki na Elisha u a tsaase un tsembelee ne ér a de u dondon un ijime, kpa Elisha kaa a Eliya kwa tar ér: “Me undu u ga.” Yange kange ishima u lun vea ortesen na shighe gôgônan. Yehova kpa ver Elisha sha jighjigh na man mtil u a tile sha mimi la sha u nan un ian i nengen er i tôô Eliya i yem a mi sha gbenda u kpiligh iyol yô.—2 Utor 2:1-12.

14. (a) Mbangohol ityesen vea fatyô u dondon ikyav i Elisha la nyian nena? (b) Gba hange hange u orngohol ityesen nana lu jighjigh sha ci u nyi?

¹⁴ U fatyô u dondon ikyav i Elisha nyian nena? A na u ityom yô, lumun i fese, a lu i sha kwarkyaa ga je kpaa. Fa wer ortesen wou ka ijende you, shi pase un a fa er u lu a iwuese kpishi, er a lu nôngon kwagh sha ci wou yô. Gbenda u u lu ungwan ityesen na la, a tese ér u ngu kaan a na wer: “Me undu u ga.”  U hemban cii je yô, hanma tom u a ne u cii, er u sha mimi wou cii. Kwagh ne ngu hange hange sha ci u nyi? Ka er u tese wer u ngu jighjigh shi ngu a mimi iyol ve mbatamen vea lu a vangertiôr ér Yehova soo ér i seer nan we ityom ken tiônnongo ye. —Ps. 101:6; ôr 2 Timoteu 2:2.

15, 16. (a) Ka sha igbenda i nyi nahan Elisha na ortesen na iciviri? (Nenge foto u a lu sha mhii u ngeren ne la.) (b) Ka nyi Elisha yange er i i na ior mba ve lu eren tom profeti vea na imôngo la lu a vangertiôr ken a naa?

¹⁵ Kwagh u Elisha, u yange kar tile sha ityough ki Eliya la, tese er anmgbianev vea fatyô u nan mbatamen mba ve fe tom ve tsema tsema la icivir nyian yô. Yange Eliya man Elisha mba ze uprofeti mbagenev ken Yeriko inya, mba ngur hiden yemen yô, ve kar hen Ifi u Yordan la. Maa “Eliya kôr riga na, hure, gbidye sha mnger, nahan ma tôndo.” Nahan mba peren ifi ne sha tareghnyaagh cii yô, ve gba “ôron kwagh yemen.” Ikyav tese wang ér Elisha hen ér un fa hanma kwagh ga. Zan zan shighe u Eliya kar undun un la, Elisha lu umbur mkaanem ma ortesen na ôr a na la. Maa Eliya kôndo yem Sha, ken ibeenegh ki gen. Elisha za hidi hen Yordan yô, a gbidye ikyondo i Eliya la sha mnger, maa a pine genger genger ér, “TER, Aôndo u Eliya, ngu hana?” Kwa ne kpa, mngerem mara tôndo.—2 Utor 2:8-14.

¹⁶ U nenge er ivande i hiihii i Elisha er la, lu kwaghmôm a ivande i masetyô i Eliya er la kpa? Kwagh u er la tese se nyi? Ikyav la tese wang ér, Elisha yange nenge wener, er i gem hemen i ne un hegen yô, maa fese je gba u una gema eren kwagh er un nenge la ga. Kpa er yange za hemen a gbenda u Eliya er tom na la yô, kwagh la tese ér Elisha lu a icivir sha ortesen na Eliya, nahan ior mba ve lu eren tom profeti vea na imôngo la lu a vangertiôr ken a na. (2 Utor 2:15) Nahan cii kpa, ken atô u anyom 60 a Elisha er tom profeti la, Yehova mgbegha un er uivande kpishi hemba mba Eliya er la ica je. Er we kpa u lu ngohol ityesen nyian yô, ka nyi i doo u u hen ken ieren i Elisha laa?

17. (a) Mbangohol ityesen nyian vea fatyô u dondon ieren i Elisha la nena? (b) Shighe ka una karen yô, Yehova a wase mbangohol ityesen nena?

¹⁷ De nengen wer, a seer we ityom ken tiônnongo yô, fese je maa a gba u u gema eren kwagh sha gbenda u u kaha kposo a u i vanden eren la ga. De gbe geman gbenda u i lu eren kwagh la tsô wer sar u u kwagh a gema ga, kpa ka mbamgbe mba tiônnongo shin kwagh u nongo u Yehova u tese la ka a na ve i gba u a gema eren kwagh gbenda ugen kposo ye. Er Elisha yange na Eliya icivir sha u zan hemen u dondon igbenda na, shi na ior mba ve lu eren tom profeti vea na imôngo la ve lu a vangertiôr ken a na la nahan, we kpa u fatyô u nan mbatamen mba ve fe tom ve tsema tsema mbara icivir sha u zan hemen u dondon igbenda ve i i zough sha kwagh u Bibilo i tese la, nahan nan mba u lu civir Aôndo vea ve imôngo mbara u lun a vangertiôr ken a we. (Ôr 1 Mbakorinte 4:17.) Nahan kpa, u seer fan tom yô, we kpa u wase tiônnongo u dondon igbenda i he i eren kwagh, i nongo u Yehova, u u lu yemen hemen hemen la, u ve a mi la. Jighilii yô, shighe a karen yô, Yehova una fatyô u wasen we u eren ityom i hemban i ortesen wou la, er yange wase Elisha nahan.—Yoh. 14:12.

18. Kwagh u tsaase anmgbianev ken atôônanongo la ka kwagh u vesen nyian sha ci u nyi?

¹⁸ Se mba sônon ser mbamhen mba i dugh a mi ken ngeren ne man u karen la ve mgbegha mbatamen kpishi u tôôn shighe tsaase mbagenev. Shi se mba sônon ser anmgbianev mba ve kom u a tsaase ve la kpa ve ngohol ityesen i i soo u nan ve la ave ahar, shi ve er tom a mi sha kwaghfan sha u nengen sha ikyumuile i Yehova. Aluer ve er nahan yô, kwagh ne una na atôônanongo a sha tar cii a a taver ken jijingi, shi una wase se asange asange u tilen sha mimi ken ashighe a doon tsung, a a lu van la.