1. Batisema ka kwagh u hange hange sha ci u nyi? (Nenge foto u a lu sha mhii u ngeren ne la.)

HANMA inyom yô, mbahenen Bibilo udubu imôngo ka ve er batisema. Ve kpishi ka agumaior, shin mbayev mba kiriki. Alaghga i yese ve ken mimi. U ngu môm ken vee? Aluer ka nahan yô, u kuma iwuese. Batisema ka kwagh u i gbe u Mbakristu vea er keng yô, shi ka kwagh u hange hange u nan or myom.​—⁠Mat. 28:​19, 20; 1 Pet. 3:⁠21.

2. Hii nan ve i gbe u se cia shin se palegh u tseghan iyol yase sha ci u Yehova ga?

² Er batisema ka a bugh se gbenda u zuan a averen kpishi nahan kpa, shi ka a va se a tom kpaa. Sha nyi gbenda? Sha iyange i i er u batisema la, u na mlumun wer een sha mpin ne, a kaa ér: “Ú gema ishima sha asorabo ou shi ú tsegha iyol you sha ci u Yehova wer u er ishima na sha ci u naagh ku Yesu Kristu a ne la vee?” Batisema wou la tese ér u tsegha iyol you sha ci u Yehova. Yange u er iceghzwa i doon tsung a Yehova wer u soo un shi kwagh u eren ishima na la hemba gban we kwagh a hanma kwagh ugen cii. Kwagh la ka  iceghzwa i numben a mi ga. Gba u u vaa afanyô sha iceghzwa i u er laa? Ei, mayange ga cii. Aluer u wa iyol you sha ikyev i Yehova yô, mayange u vaa afanyô ga. Kpa aluer u er nahan ga yô, nenge ase kwagh u una due ker ne! Or u nan lumun ér Yehova a hemen nan ga yô, nan ngu sha ikyev i hemen u Satan. Kwagh gba Satan sha myom wou ga. Jighilii yô, aluer uma u tsoron kar u sha ci u u ta ikyaa a Satan, u gema u venda hemen u Yehova yô, a saan Satan iyol.

3. Er u tsegh iyol you sha ci u Yehova yô, ka averen a nyi u zough a mini?

³ Er u sue Satan ga yô, nenge ase averen a u tsegh iyol you shi u er batisema, u hingir Orkristu ve, u zough a mi ne. Er u ne Yehova uma wou hegen ne, u fatyô u ôron a vangertiôr a hemba ave a tse nahan wer: “TER ta ikyaa a mo, me kera cia ga, ka nyi je or á ereme?” (Ps. 118:⁠6) Kwagh ugen môm ngu u a hembe ian i civirigh i u lu a mi u tan ikyaa a Aôndo shi un kpa lumun we la ga.

4, 5. (a) Ka sha nyi gbenda nahan iyoltseghan i lu tom u i gbe u u er iyol youwe? (b) Ka mbamtaver mba nyi nahan i lu agumaior tseegh a tagher a mi ga?

⁴ Er u er batisema u hingir Orkristu yô, ikyar i u ye a Yehova la har sha mbamaren ou ga. Sha nahan yô, hegen gba u u er tom iyol you sha ci u myom wou, aluer u ngu hen ya vea mbamaren ou je kpaa. Gba hange hange u u umbur kwagh la sha ci u nyi? Sha ci u u fatyô u fan mbamtaver mba u va tagher a mi ken hemen la ga. Ikyav i tesen yô, aluer yange i er u batisema shighe u u lu wanye u kiriki la yô, alaghga mbamnenge man mbamtaver ou vea va gema zum u hingir gumor shin gumkwase gayô u gande kera la. Gumkwase ugen ôr kwagh ne nahan ér: “Ashighe kpishi ishima ia vihi ma wanye ker ér kyeeke i iyangemar i wanye ugen kar nan sha makeranta, sha ci u nan ngu Orshiada u Yehova yum ga. Kpa anyom nga a karen kpuaa yô, isharen i yaven a or la i va taver ken a nan kpishi, nahan i gba u nana tese ér nan lumun vangertiôr ér kwagh u kuran atindi a Yehova la, ka gbenda u hemban doon hanma shighe cii.”

⁵ Jighilii yô, ka agumaior tseegh a tagher a mbamtaver mba hev ga. Ior mba ve er batisema shighe u ve gande kera la je kpa, ka ve tagher a akaa kpishi a yange ve ver ishima ér aa fatyô u karen jighjigh ve u nan ga yô. Akaa ne aa fatyô u lun mbamzeyol mba ken ivese shin mnyoon gayô tom. Sha mimi yô, hanma or nana fatyô u tagher a akaa a a na a gba u nana tese ér nan na Yehova jighjigh yô, aluer nan ngu wanye shin organden je kpaa.​—⁠Yak. 1:​12-14.

6. (a) Ka sha nyi gbenda nahan iyol i u tsegh sha ci u Yehova la, i hembe hanma kwagh ugen ciilii? (b) U fatyô u henen nyi ken Mbafilipi 4:​11-13?

⁶ Aluer u umbur wer kwagh môm hemba iceghzwa i u er a Yehova la ga yô, kwagh la una wase u u za hemen u civir Yehova sha mimi ken hanma mlu cii. Kwagh ne tese ér u ôr a Tor u hemban sha won cii la wer u za hemen u civir un aluer azende a ou shin mbamaren ou de u eren nahan je kpaa. (Ps. 27:10) Hanma mlu u u nyer ker cii, sôn Yehova a na u tahav, sha er u fatyô u eren sha iyoltseghan you la yô.​—⁠Ôr Mbafilipi 4:​11-13.

7. Inja i u eren tom sha ci u myom wou a “mciem man ikyarikyase iyol” la ér nyi?

⁷ Yehova soo ér we u lu ijende na. Kpa cii man u za hemen u lun ijende na shi eren tom sha ci u myom wou la yô, a gba u u nôngo kwagh. Jighilii yô, Mbafilipi 2:12 kaa ér: ‘Eren nen tom sha ci u myom wen a mciem man ikyarikyase iyol.’ Mkaanem man tese ér, aluer u tagher a nyityô mtaver je kpa, gba u u time sha gbenda u u fatyô u zan hemen u lun ijende i Yehova shi zan hemen u civir un sha mimi la. De gbe tôôn tsô wer u fatyô u eren nahan ga. Ior mbagenev mba ve civir Aôndo ica i gbe la je kpa, ve tsume gbenda. Sha nahan yô, ka akaa a nyi u er ve u fatyô u eren tom sha ci u myom wouwe?

8. Bibilo i henen sha tseeneke wase la wa nyi man nyi kere, man kwagh ne ngu hange hange sha ci u nyi?

⁸ Ikyar i u ye a Yehova la wa akaa ahar ker; ka u keghen ato a na shi lamen vea na je la. Bibilo i henen sha tseeneke wase la, ka gbenda u vesen u se keghen atô a Yehova yô. Kwagh ne wa u we ôron Bibilo shi gbidyen kwar sha Mkaanem ma Aôndo man ityakerada yase i i har sha Bibilo la, sha er u zua a mfe yô. Shighe u u lu eren kwagh ne yô, umbur wer Bibilo i henen ka makeranta u zan ga. I de lu inja er u ngu henen akaa, kôron ken ityough sha er u va pase ikyaren ga. Bibilo i henen sha gbenda u injaa la ngi er zende u u ze sha er u tôv shi u seer fan aeren a Yehova agen la nahan. Kwagh ne una wase u u kporom ikyua a Aôndo, nahan un kpa una kporom ikyua a we.​—⁠Yak. 4:⁠8.

9. Ka akaa a nyi a a wase u u henen kwagh sha tseeneke wouwe?

⁹ Nongo u Yehova due a akaa kpishi a a wase u u henen kwagh tsembelee yô. Ikyav i tesen yô, ngeren u i duen a mi sha ijiir yase i sha Intanet i jw.org/tiv, u a lu a itinekwagh ér “Sha Ci u Agumaior,” ape i nger ér “Agumaior” la, una wase u u dondon akaa a u lu henen ken Bibilo la. Shi akaa a wasen or u henen kwagh a a lu hen itinekwagh i “Bibilo Tese Ér Nyi?” sha jw.org/tiv la, aa fatyô u wasen we u lumun a akaa a u ne jighjigh a mi la. Akaa a wasen or u henen kwagh ne aa fatyô u wasen we u henen fan gbenda u u pase mbagenev akaa a u ne jighjigh a mi yô. I due a igbenda igen i henen kwagh ken ngeren u ken zwa Buter u a lu a itinekwagh ér “Young People Ask . . . How Can I Make Bible Reading Enjoyable?” (Mbampin Mba Agumaior A Pinen La . . . Me Er Nan Ve Bibilo i Ôron ia Doomo?) la, ken Awake! u Aipor 2009 la. Bibilo i henen shi gbidyen kwar sha mi la, ka gbenda u injaa u ua wase u u eren tom sha ci u myom wou yô.​—⁠Ôr Pasalmi 119:105.

10. Gba hange hange u or u nan er batisema nan hingir Orkristu la nana eren msen sha ci u nyi?

¹⁰ Er kwaghhenen u sha tseeneke wase la, a lu gbenda ugen u keghen ato a Yehova nahan kpa, msen u eren gema di ka gbenda u se lamen a na yô. Gba u Orkristu nana nenge msen ér ka kwagh u i gbe u nana gbaa eren tsô, u a lu a iwasen ga ze, shin ka ma kwagh u nan ‘ikyôrlaghen’ u ka a wase nan u zan ikyura ken ma kwagh u nan lu eren la ga. Kpa msen ka gbenda u se lamen vea Un u a gbe se  la kpôô kpôô yô. Yehova soo ér we u lamen a na. (Ôr Mbafilipi 4:⁠6.) Aluer u tagher a nyityô ishimanyian kpa, kwaghwan u injaa u Bibilo i we se ne una wase u, ér “haa akaa a zan we iyol cii sha TER.” (Ps. 55:22) U na jighjigh a kwagh ne mimi kpa? Anmgbianev mba nomso man mba kasev umiliôn imôngo mba, mba vea fatyô u pasen we vangertiôr ér kwagh ne wase ve yô. We kpa kwagh ne una wase u!

11. Gba u u sughun Yehova hanma shighe cii sha ci u nyi?

¹¹ Msen ka a bugh u gbenda u er kwagh i hemba di u sônon Yehova wer a wase u tseegh tsô la. Bibilo kaa ér: “Lu nen a ishughun.” (Kol. 3:15) Ashighe agen se fatyô u veren ishima yase cii sha mbamzeyol asev, je yô, se kera umbur averen kpishi a se zough a mi la ga. Er nan ve u kange ishima wer, hanma iyange yô, u hen sha akaa atar a u fatyô u wuese Yehova sha mi la ga? Maa sugh Yehova ken msen sha averen shon. Gumkwase ugen u i yer un ér Abigail, u yange er batisema sha anyom 12 yô, kaa ér: “M nenge mer Yehova hemba kuman iwuese a hanma orgen sha won cii. Hanma ian i se zough a mi cii, gba u se sugh un sha uiyua mba a ne se la. Ashighe agen ka m pine iyol yam mpin u yange m ungwa ne, mer: Aluer kper sev av se kav ser, akaa a se sugh Yehova sha mi nyian ga la cii saa yô, ka nyi se shi a mini?”

12, 13. Ka hange hange u we henen sha gbenda u u bende u nenge er Yehova a doo la sha ci u nyi?

¹² Tor Davidi u sha ayange a tsuaa u Yehova wase un shighe u tagher a mbamtaver kpishi mba vihin tsung la, yange ôr mkaanem man ken icam kaa ér: “Bende, nenge nen, TER ka u doon je; saan or u nan suur sha a Na la, iyol.” (Ps. 34:⁠8) Ivur ne tese er kwagh u a er u kpôô kpôô la, una wase u yô. Ka wea ôr Bibilo man ityakerada yase shi wea za mbamkombo mba Mbakristu yô, u ungwa akaa a taver we ishima a a er mbagenev ken uma, a tesen er Aôndo a wase ve ve ze hemen u civir un sha mimi yô. Kpa er u lu vesen ken jijingi ne, gba u u nenge er Yehova a lu wasen we ken uma wou yô. We u bende u nenge er Yehova a doo je kpa?

¹³ Gbenda u injaa ngu u Mbakristu cii ve bende ve nenge er Yehova a doo yô. Gbenda shon yô, i lôhô se cii ér se kporom ikyua a Aôndo man Wan na. Yesu kaa ér: “Ma or nana fatyô u gban van her a mo ga, saa Ter u A tindim la, Una urugh nan.” (Yoh. 6:44) U nenge wer mkaanem man bende a we je kpa? Alaghga ma gumor nana kaa ér, ‘Ka mbamaren av Yehova yange urugh ve ye, nahan mo m gbe dondon ve tsô.’ Kpa shighe u u tsegha iyol you sha ci u Yehova shi u er batisema la, u tese wer u ya ikyar i doon tsung a na. Hegen ne, a fa u sha mimi je. Bibilo pase se wang nahan ér: “Aluer Aôndo Una doo or ishima yô, nan kpaa Aôndo fa nan.” (1 Kor. 8:⁠3) Hanma shighe cii, nôngo tese wer u ngu a iwuese tsung sha ian i u lu a mi ken nongo u Yehova la.

14, 15. Tom u pasen kwagh la, ua fatyô u wasen we u seer taver jighjigh wou u nan nena?

¹⁴ Gbenda ugen u u fatyô u benden nengen er Yehova a doo yô, ka u we kaven er a lu suen we ken tom u pasen mbagenev kwagh u jighjigh wou u nan la. U fatyô u eren kwagh ne shighe u u lu pasen kwagh man sha makeranta yô. Mbagenev yô, ka i taver ve u pasen mbakwav ve kwagh sha makeranta. Alaghga u fa er i hii ve ka i taver ve yô. Sha ci u u fa kwagh u vea er shighe u i pase ve kwagh la ga. A fatyô u hemban taver we cii u lamen a ior kpishi a u we lamen a wanye u ne lu kelase môm yô. Ka nyi ia fatyô u wasen we?

¹⁵ Hen er i hii ve u lumun a akaa a u ne jighjigh a mi la yô. Akaa a wasen or u henen kwagh a a lu hen ijiir yase i sha Intanet i jw.org/tiv la, nga ken zwa wouwee? Aluer u fa jighilii ga yô, tôô shighe ker akaa ne. I er a sha gbenda u aa wase u u henen sha kwagh u u ne jighjigh a mi la, man er i hii ve u ne jighjigh a  mi la kua er u pase mbagenev akaa a u ne jighjigh a mi la yô. Aluer u na jighjigh taveraa shi u wa iyol tsembelee yô, kwagh ne una mgbegha u u eren shiada sha ci u iti i Yehova.​—⁠Yer. 20:​8, 9.

16. Ka nyi alaghga ia wase u ve a kera taver we u lamen a mbagenev sha akaa a u ne jighjigh a mi la ga?

¹⁶ Nahan kpa, aluer u wa iyol je kpa, alaghga a taver we u lamen sha akaa a u ne jighjigh a mi la. Anmgbian u kwase ugen u a lu anyom 18, u yange er batisema shighe u lu anyom 13 la kaa ér, “M fa kwagh u m ne jighjigh a mi yô, kpa ashighe agen ka i lum ican u pasen mbagenev kwagh u m ne jighjigh a mi la.” Ka a nôngo a zayol na ne nena? A kaa ér “Ka m nôngo m gba ishima shimi. Mbayevmakeranta mba se lu kelase môm la ka ve lamen sha akaa a ve eren la gbar gbar. Gba u mo kpa me eren nahan gbar gbar. Nahan ka m ôr kwagh beelee er, ‘Yange m lu tesen ior Bibilo sha iyange igen la, nahan . . . ’ Maa m za hemen a kwagh u m hii u ôron la. Er ka m hii sha u ôron kwagh u ken Bibilo ga nahan kpa, ashighe kpishi ka i sar mbagenev u fan kwagh u ka m er shighe u m lu tesen ior Bibilo la. Ashighe agen ka ve pine mbampin sha kwagh shon. Er m lu hemban dondon gbenda ne la, m ngu fan u eren tom a u seer a seer. Ka mea been yô, i saan mo iyol!”

17. Mnenge u u lu a mi sha kwagh u jighjigh wou u nan la una fatyô u wasen we u lamen a mbagenev nena?

¹⁷ Er u lu nan mbagenev icivir shi kwagh ve a lu gban we ishima la, alaghga tsô ve kpa vea er a we nahan. Olivia u a lu anyom 17 hegen, u yange er batisema shighe u lu wanye la kaa ér: “Hanma shighe u yange mea lamen vea mbagenev yô, i cier mo iyol u van a kwagh u Bibilo ker, sha ci u m henen mer vea va nenge ér mo m soo kwagh u kwaghaôndo yum.” Maa va hii u lun a mnenge ugen. Er Olivia ma hemba veren ishima sha mciem nam la yô, a kaa ér: “Agumaior kpishi fa kwaghmôm sha kwagh u Mbashiada mba Yehova ga. Ka se tseegh se lu Mbashiada mba ve fe ye. Sha nahan yô, ieren yase ia fatyô u benden a gbenda u ve nengen se la. Kpa aluer se mba cian ve ashe shin ka taver se u pasen ve kwagh u jighjigh u nan wase, gayô kunya kôr se shighe u se lu lamen a ve la di ye? Aluer kwagh ngu nahan yô, alaghga vea nenge se ér mlu wase la ka se kwagh u tan ihyagh a mi ga. Aluer se lam a ve vangertiôr ga yô, alaghga vea er kwagh a vese sha inja ga je kpaa. Nahan kpa, aluer se lam a ve gbar gbar man a vangertiôr sha kwagh u se ne jighjigh a mi la, je yô, se mba eren nahan hanma shighe yô, a shi nan kpa, vea gema nan se icivir.”

18. Ka akaa agen a nyi nahan i gbe u u er, sha ci u myom wouwe?

¹⁸ Er se nenge nahan, kwagh u eren tom sha ci u myom wou la, ka tom u kiriki ga. Akaa agen a i gbe u u er ve kwagh a lu nahan yô, ka u ôron Mkaanem ma Aôndo shi gbidyen kwar sha mi shi eren msen hen Yehova shi henen sha igbenda i Yehova a ver u doo doo la. Aluer u er akaa ne yô, aa wase u u hemba lun a vangertiôr wer Yehova ka Ijende you. Maa kwagh la una mgbegha u u lamen a mbagenev sha akaa a u ne jighjigh a mi la.​—⁠Ôr Pasalmi 73:⁠28.

19. Doo u u nôngo u er tom sha ci u myom wou hegen sha ci u nyi?

¹⁹ Yesu kaa ér: “Aluer anti or a sar nan ka van a Mo ityô yô, nana̱ nyiman iyol i nan, nana̱ tôô [kon u mtsaha] u nan, nana̱ dondo sha a Mo.” (Mat. 16:24) Kwagh ne tese wang ér kwagh u lun orhenen u Yesu, kua u tseghan iyol you shi eren batisema la, ka tom u i gbe u we Orkristu u er yô. Nahan kwagh ne una bugh u ian i zuan a averen kpishi hegen shi va zuan a uma u tsôron ken tar u he u Aôndo la. Sha nahan yô, u ngu a ityôkyaa i vesen i zan hemen u eren tom sha ci u myom wou!