Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mbamlumun sha mbampin mban yô:

Gba u mbamaren mba ve lu ushirmbaiorov la vea time sha kwagh u zwaa la tsembelee shighe u ve lu wasen mbayev vev ken jijingi la sha ci u nyi?

Alaghga mbayev vea hen zwa u hen ijiir i ve lu la ken makeranta man hen mba ve kase ve la. Aluer wanye nan fa zwa hemba môm yô, a wase nan. Gba u mbamaren vea time vea fa tiônnongo u aluer mbayev vev mba zan mbamkombo her ve vea hemba kaven mimi shi vea hemba vesen ken jijingi yô; aluer ka tiônnongo u a eren mkombo ken zwa u i lamen hen ijiir i ve yem shir la, shin ka u a eren mkombo ken zwa u mbamaren mba ve yem shir la kpaa. Mbamaren mba ve lu Mbakristu la ka ve ver kwagh u mlu u mbayev vev u ken jijingi la hiihii a akaa a ve mbamaren ve hembe soon la.​—⁠w17.05, peeji 9-11.

Shighe u Yesu pine Peteru ér: “M hemba doon we ishima a mbana” la, lu eren tom a ishember i “mbana” la u tesen nyi? (Yoh. 21:⁠15)

Ka inja er Yesu lu ôron kwagh u ishu i i ver ikyua ikyua la, shin lu ôron kwagh u kpenga u kôron ishu la nahan. Yesu yange kpen kera yô, Peteru hide yem lu za eren kpenga na u kôron ishu la. Gba u Mbakristu vea fa mnenge u ve lu a mi sha kwagh u tom u uke la wang.​—⁠w17.05, peeji 22-23.

Aberaham yange ôr a kwase na ér a kaa ér un ngu anngô na u kwase sha ci u nyi? (Gen. 12:​10-13)

Jighilii yô, Sara lu ter môm vea Aberaham. Luun er Sara kaa ér un ngu kwase u Aberaham yô, alaghga ma i wua Aberaham, nahan ma kera fatyô u tseren tsombor u Aôndo tôndo zwa ér una na un la ga.​—⁠wp17.3, peeji 14-15.

Lu gbenda u nyi Elias Hutter due a mi u wasen mba ve soo u henen zwa Heberu laa?

Yange soo u wasen mbayevmakeranta ve fa mkposo u atiakaa a ken zwa Heberu a ken Bibilo la, man ati a i zor sha atiakaa shon la. Sha nahan yô, yange a gber atiakaa a i zor ati agen sha mi la sha asangaabaacaa a ilen, kpa a geman ati a yange zor a sha atiakaa shon la yô, a gber a sha asangaabaacaa a ilen ga. Bibilo i New World Translation of the Holy Scriptures​—⁠With References la kpa ka gbenda u i nger ati a shin kpe, a a zor sha atiakaa a ken avur a Bibilo je la.​—⁠wp17.4, peeji 11-12.

Ka atôakyaa a nyi nahan a a wase Orkristu u henen sha kwagh u lun a gbuuka sha ci u kuran iyol i nan hen uumace mbagenev laa?

Ka atôakyaa shon agen je ne: Aôndo nenge uma ér ka icighankwagh. Yesu yange kaa a mbadondon un ér ve tôô usanker sha u kuran ayol a ve a mi ga. (Luka 22:​36, 38) Gba u se gema usanker asev se var indyuhar a mi. Uma hemba ngun a inja a akaa a iyolough. Se mba we imoshima i mbagenev ikyo, nahan se soo u veren ikyav i dedoo. (2 Kor. 4:⁠2)​—⁠w17.07, peeji 31-32.

Kwagh u Mateu a nger sha kwagh u mhii u uma u Yesu shin tar ne la kaha a kwagh u Luka a nger la sha ci u nyi?

Mateu pase kwagh u Yosev, er gbenda u Yosev er kwagh shighe u kav ér Maria wa iyav la, man er Aôndo kaa a na ér a yem ken Igipiti, nahan shighe a karen yô, a hide la. Luka di pase kwagh u Maria. Ikyav i tesen yô, a ôr kwagh u shighe u Maria za Elisabetu inya la, kua gbenda u er kwagh shighe u kav ér wanakiriki Yesu lu ken tempel her la.​—⁠w17.08, peeji 32.

Ka akaa agen a nyi a er Bibilo, kpa i ze hemen u lun here?

Shighe ka una karen yô, inja i asemberatii a yange i er tom a mi ken Bibilo la kpa a gema. Mbamgem mba sha kwagh u hemen u tar na yô, zwa u ishamior kpa gema. I hendan a mgem u Bibilo ken ijô i ishamior.​—⁠w17.09, peeji 19-21.

Se mba a ortyom u a kuran se yôô?

Ei. Yesu yange ôr kwagh u mbatyomov mba mbahenen nav ér mba kenger ishigh ki Aôndo. (Mat. 18:10) Yange lu kaan ér kwagh u mbahenen nav gba mbatyomov ishima, lu ôron ér mbatyomov mba kuran ve asange asange sha ivande ga.​—⁠wp17.5, peeji 5.

Ka nyi i lu dooshima u hemban cii laa?

Ka dooshima u a har sha akaawan a vough, u i yer ér a.gaʹpe la, a lu dooshima u hemban cii ye. Dooshima ne wa u tesen or erdoo shi eren a nan kundu kundu kpa ker. Heela tseegh ga, dooshima ne dondon akaawan a doon tsung, er u tangen iyol ga nahan.​—⁠w17.10, peeji 7.