Mpin u Mbaôron Takerada Ne

Tartor U Aôndo Ngu Ken Ishima Youwee?

Ior kpishi nyian na jighjigh ér mlumun sha mpin ne ka een. U tesen ikyav yô, takerada u pasen asemberakaa u i yer ér The Catholic Encyclopedia la kaa ér: “Inja i tartor u Aôndo yô . . . ka gbenda u Aôndo a hemen asema a ase la.” Ka kwagh u mbahemenev mba aduaav kpishi ve tesen ior je ne. Sha mimi yô, Bibilo tese ér Tartor u Aôndo ngu ken asema a ioro?

Mbagenev hen ér ka Yesu iyolna je yange hii tesen ér Tartor u Aôndo ngu ken asema a ior ye. Kpa ka kwagh u Yesu yange ôr je ne: “Tartor u Aôndo ngu hen a atô wen je.” (Luka 17:21, NW) Ubibilo mbagenev kaa hen ijiir ne ér: “Tartor u Aôndo ngu ken a ven je.” Mbagen je yô kaa ér ken “iyol yen je.” Ka kwagh u Yesu yange ôr je Ubibilo mban ve er laa? Sha kpôô yô, yange lu kaan ér Tartor u Aôndo ngu ken asema a ioro?

Hiihii yô, tôv ase sha kwagh u a lu ishima i or yô. Ka a ôron kwagh u ishima i or ken Bibilo yô, i lu ôron kwagh u or u ken atô la, ape mbamhen man inja man mlu u or jim jim a lu la. Alaghga mhen u ior ve lu a mi ér zegekwagh er Tartor u Aôndo nahan ngu ken asema a ior, sha ci u ngu gem ior shi ngu ve a aeren a dedoo ken a ve la una doo mbagenev kpishi, kpa ityesen ne kôr inya je kpa?

Bibilo kaa ér: “Ishima i wa atseregh je hemba hanma kwagh cii, i vihi je gande.” (Yeremia 17:9) Yesu iyolna kaa ér: “Ka ken ateghatô ken asema a ior je akaabo a henen, man idya i eren, man iiv, man iwoo-or, man shi ivaa i vihin sha idya, man u tômon akaa, man afer a eren a dang. . . . ve dugh ye.” (Marku 7:20-22) Hen ase sha kwagh ne: Ka ishima i or, i í lu vough ga ne i ve a akaa a vihin kpishi a se lu nengen a mi ne ga zee? A er nan man Tartor u Aôndo u ú lu vough la ua due hen imba ijiir ngila nahana? Sha mimi yô, ishima i or kera ngi wang er Tartor u Aôndo ua due ker ga, vough er a fatyô u zôron tur sha ishishagh ga nahan.—Mateu 7:16.

Kwagh u sha uhar yô, time ase sha kwagh u ior mba Yesu lu lamen a ve zum a ôr mkaanem ma ken Luka 17:21 ma ior kpishi ve lan ma ga ne. Luka 17:20 kaa ér: “Er Mbafarishi pine Un shighe u tartor u Aôndo ua va yô, A gema A kaa a ve er.” Mbafarishi yange ve lu mbaihyomov mba Yesu. Yesu pase wener mbaimangerev mban vea nyôr Tartor u Aôndo ga. (Mateu 23:13) Yô, aluer Mbafarishi vea nyôr Tartor u Aôndo ga yô, shi Tartor la ua lu ve ken asema he? Mayange ga! Nahan yô, lu nyi Yesu lu ôrono?

Ubibilo mbagenev mba yange i nger ve tsembelee yô, gema mkaanem ma Yesu man er i gem ma ken Bibilo i New World Translation la nahan. Ubibilo mbagen kaa ér Tartor u Aôndo “ngu a ven” shin “ngu hen atô wen.” Tartor u Aôndo yange u lu hen atô u ior kua Mbafarishi sha shighe la nena? Ka Yesu Yehova Aôndo yange tsua ér a lu Tor u Tartor la ye. Nahan Yesu, Tor u i tsough la lu hen atô u ior mbara. Yange tese ve kwagh u Tartor u Aôndo shi er uivande kpaa, nahan kwagh ne wase ve u tsengan fan kwagh u Tartor la ua er yô. Nahan yô, Tartor la lu hen atô ve jim jim.

Sha kpôô yô, Ruamabera sue mhen u ior ve kaan ér Tartor u Aôndo ngu ken asema a ior la cuku cuku kpaa ga. Tartor ne ka gomoti jim jim, u una va a mbamgem shin tar ne kpôô kpôô, er uprofeti yange ve tsenga ôron nahan.—Yesaia 9:6, 7; Daniel 2:44.