U a Nengen Ér Se Gba Kwagh La
Kporom hen Aôndo
U a Nengen Ér Se Gba Kwagh La
ALAGHGA “ishima ia na se ibo.” Mkaanem ma ken Bibilo man tese ér ashighe agen ishima yase ia na se puu ayol a ase a kar ikyaa inya. Se zer henen ser se kuma u Aôndo una tese se dooshima shin una nenge sha a vese ga. Kpa Bibilo kaa a vese ér: “Aôndo hemba ishima yase man A fa akaa cii kpaa.” (1 Yohane 3:19, 20) Aôndo fa se hemba er se fe ayol a ase la. Alaghga gbenda u a nengen se la kaha kposo a gbenda u se nengen ayol a ase la. Nahan yô, Yehova Aôndo, un u mhen na a hembe cii la nengen se nena? Se zua a mlumun sha mpin ne ken injakwagh igen i kôron ken ishima i Yesu yange ôr acin ahar yô.
Sha shighe ugen la Yesu kaa ér “mba teen mbaatsator uhar sha toro.” (Mateu 10:29, 31) Yesu ôr ken Luka 12:6, 7 ér: “Mba teen mbaatsator utaan sha toro uhar gaa? Mô ve môm kpaa i hungul Aôndo ga. . . . De cie nen ga; mbaatsator kpishi je kpaa ne hemba ve inja.” Injakwagh i i taver ga kpa i ker ken ishima kpishi ne tese se er Yehova a nengen hanma or u civir un yô.
Atsator lu môm ken inyon i gban ishe ga i ior yamen yaan yô. A shi nan kpa Yesu yange nengen er atsan a ukase yamen annyon u ndahar kpishi ne ken kasua za koson icombor ve yô; alaghga ngô na je kpa yamen annyon ne. Yange or a lu a toro môm tseegh, u a kom sule utaan sha inyaregh ki ainge kpaa ga la kpa nan yam mbaatsator uhar. Annyon ne yange gba ishe ga je yô, or nana tôô toro uhar yô, nan yam mbaatsator unyiin shi i seer nan môm sha mi i bee utaan.
Yesu kaa ér atsator môm kpa “hungul Aôndo ga” shin una “gba gban shin inya ga,” saa Ter una fa. (Mateu 10:29) Yange atsator una vihi iyol una gba shin inya shin una tema sha u keren kwaghyan kpa Yehova a fa. Yehova nenge ér annyon u yange un gba ndahar kpishi, u a lu inja er a gba kwagh ga ne ndahar kpishi je u una hungur un ga. Sha mimi yô, a gba un kwagh, gadia ka kwagh u uma je. U nenge a kwagh u Yesu soo ér se fa ken injakwagh ne kpa?
Ashighe kpishi Yesu yange una tesen ior yô, a tôô akaa agen a kar sha agen; yange a ôr kwagh u akaa a kiriki nahan a tese er a fatyô u karen kwagh u un er la sha akaa a vesen kpaa yô. U tesen ikyav yô, Yesu kaa ér: “Ugugôô, mba lee ga, mba sondo kpaa ga, mba a ityumbe ga, mba a una kpaa ga, nahan kpaa Aôndo koson ve; ne ne hemba inyon inja tsung je gaa?” (Luka 12:24) Kwagh u Yesu soo ér se fa ken injakwagh i mbaatsator la due wang hegen: Aluer Yehova nengen sha annyonov mba ndahar kpishi mban yô, hile uumace mba ve soo un shi ve civir un ne ve una nenge sha a ve ga yee?
Mkaanem ma Yesu man tese ér doo u se hen ser se yina u Aôndo u a ‘hembe ishima yase’ ne una wa se ikyo ga ze. Doo se kpishi er se fe ser Orgban se nengen a kwagh u dedoo ken a vese u se nengen a mi ga yô.
[Picture Credit Line on page 15]
Mbaatsator: © ARCO/D. Usher/age fotostock