Akaa a I Tsenge Ôron Ér Aa Er sha Shighe Wase ne Yô

BIBILO tsengaôron ér Tartor u Aôndo ua va a bem u tsôron man msaanyol shin tar. (Daniel 2:44) Ken Msen u Ter Wase la, Yesu kaa a mbahenen nav ér ve eren msen ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Yesu yange ôr mbahenen nav kwaghôron u profeti u injaa sha Uwo u Olev; yange tsenga teren akaa a aa er sha shighe u Tartor la ua mgbôghom kpishi la sha ati ati. Akaa a Yesu ter ne cii kohol nga ikyav i mkurtar, man mbaasemaamimi vea nenge a ikyav ne wanger wanger. We u ngu nengen a akaa a á lu ikyav i mkurtar, a i ter shin heen ne kpa?

Ityav Mbi Akuraior. Yesu tsengaôron ér: “Ikyurior igen ia mough ityav a ikyurior igen; tartor ugen kpaa ua mough ityav a tartor ugen.” (Mateu 24:7) Cii man inyom i 1914, inyom i í nôngo ityav mbi tar cii mbi sha môm mbira la, ior hemban nôngon ityav hen haregh ve tseegh. Kpa yange i nôngo Ityav mbi Tar Cii mbi sha Môm ken ityar kposo kposo sha tar shi lu hen shighe la ior hii u varen ikyav mbi numugh mbi vihin tsung mbi uumace lu a vande fan ga la ye. U tesen ikyav yô, yange i tôô ubom  shin igirgi i purugh i ior hii u eren hen shighe la i za ta sha ajiir a mbaaderapupuu, i wua ior kpishi. Yange i wua ushoja sha ikyav mbi utyaav mbi i lu varen kpishi hen shighe la je falegh gba. Ushoja mba kuman miliôn 65 za ityav mbin; ushoja mba ve kpe ken ityav mbin shin ve vihi ayol la kuma tiôn u iyenge ne. Er derianyom u sha 20 la lu zan hemen yô, ityav lu hemban wuan a wua ior cii. Or u timen sha akaa a mbayiase ugen kaa ér Ityav mbi Tar Cii Mbi sha Uhar la wua ior ngee je or môm fatyô u fan iyenge i ushoja man mbaaderapupuu mba ityav mbin wua la jighilii ga. Man zan zan hegen kpa mba nôngon ityav heregh.

Ijen Gba ken Ityar Kposo Kposo. Yesu yange tsengaôron ér, “ijen ia gba.” (Mateu 24:7) Ken inyom i 2005 la magazin ugen u i yer ér Science la kaa ér: “Ior mba kuman iyenge miliôn 854 sha tar cii (ka iorov 14 ken atô u hanma iorov deri ken iyengeior i sha tar jimin cii je la) mba ye kwagh ka kom ve ga shin mba a mba a kwagh u vea ya ga kuaa.” Ken inyom i 2007 la gbaatom ugen u Mzough u Ityar Cii la kaa ér ityar 33 ngi a kwaghyan kuma u koson ior vev ga. Ior mba kahan sule u uyia sha tar jimin cii ka hemban ave a tse, nahan a er nan man kwagh a lu nahana? Hiihii yô, mba yisan inya i ma i kaha iyiav mbi koson ior a mi la sha u kahan iyiav mbi eren mkurem ma matoo a mi. Pipaabaver i ken tar u South Africa i í yer ér The Witness la kaa ér, “sam uyia u i eren mkurem man haan ken zege mato u eren anumbe a mi kwa môm tseegh la kuma u koson or môm a mi ken inyom jimin.” Kwaghyan ngu taver ishe ken ityar i í lu a kwagh ave ga la, nahan or ka nana lu a annyar je kpa i gba u nana tsua kwagh u nana yam yô, er u yamen kwaghyan u nana ya aikighe shin kuren ma mgbe u hange hange ugen a mi, inja er u yamen icigh ki menan shin bologo u cirin wuhe nahan.

Ityartenger i Vesen. Yesu kaa ér: “Ityartenger i vesen ia lu.” (Luka 21:11) Aluer ka u er ior kpishi mba yan ican hegen sha ci u ityartenger yô, ka u shami. Ken inyom i 2007 la, R. K. Chadha, or u ken tar u India u a timen sha kwagh u tartenger yô, kaa wener, “tar ngu hemban tenger sha ajiir kposo kposo ayange ne. . . . Or môm fa er i hii ve i lu nahan ga.” Bee kera yô, er iyengeior i lu seer a seer sha ajiir a tar u hembe tenger la yô, ior mba tartenger u lu wuan la mba seer a seer iyenge. Ken inyom i 2004 la tareghnyaagh u Ityeku i India la tenger, nahan ityeku la kpianger wua ior kpishi. Gbaatom u i yer ér U.S Geological Survey la kaa ér ka inyom “i ior hemba kpen ku u tartenger ken atô u anyom a karen er 500 nahan je ne” man “hii shighe u i hii u fan kwagh u tartenger je ka tartenger môm tseegh u hembe wuan ior a u ngun ye.”

Iangev mbi Taver u Sôron. Yesu tsengaôron wener, “ubombauangev” vea lu. (Luka 21:11) Iangev mbi i fe mbi ica i gbe man iangev mbi hev mbi kôron ior sha tar ka hemban ave a tse man taver u zuan a mcimbim ma sôron iangev mbin. U tesen ikyav yô, ityar kpishi zua ave ér ia bee a angev mbu iyol hian mbu amunan a ne ior la kpa mba kanen shio, gadia angev mbun mbu gande uumace ave. Heela tseegh ga, iangev mbi se fe mbi ica i gbe la mbi wuan ior umiliôn umiliôn, er houghbar u a lu kôron ior ayange ne vea angev mbu AIDS imôngo la nahan, kua iangev mbi hev mbigenev kpaa. Mzough u Mkpeyol u Tar Cii la kaa ér “or môm ken iorov utar ken iyengeior i sha tar jimin mba a houghbar hegen.” Mzough ne shi kaa ér anyigôr u i yer ér HIV, u ka a wua tahav mbu nôngon a angev ken iyol la na yô houghbar ngu samber ken ityar kpishi. Hanma sekônd yô, houghbar ngu a tsar or, man houghbar kera ngu lumun icigh ayange ne tsembelee ga. Magazin u i yer ér New Scientist la kaa ér ken inyom i 2007 la i zua orgen ken tar u Yuropa a houghbar u “venda u been shin er i na un hanma icigh ki houghbar ki se fe cii nahan kpaa.”

Aeren man Anza a Ior Nga Vihin Seer a Seer. Yesu kaa ér, “sha ci u mvende u vendan atindi una seer a seer nahan dooshima u mbagenev kpishi una ndôhôr.” (Mateu 24:12) Ka Yesu tseegh yange  tsengaôron kwagh u mvihi u aeren a ior ga, apostoli Paulu kpa tsengaôron kwagh ne. A ôr kwagh u “ayange a masejime” a ican a aa va cii man Tartor u Aôndo ua mase timen tar ne kera la. “Ior vea hingir mbawan ayol a ve ikyo tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve ikyo ga man mbamoron ayol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la.” (2 Timoteu 3:1-5) U nenge wer ior mba eren anza a bo ne kpoghuloo hemba er ngise ve eren nahan ga he?

Yesu man Paulu yange ve ter akaa a tse a a vande eren man aeren a ior man akaa a patii a a ne ve tar u lu vihin imba ne cica cii ga. Nahan kpa, akaaôron a profeti a ve ôr la tsenga pasen akaa man aeren a se lu nengen a mi ainge ne vough vough. Kwagh u ken hemen yô ngu nena? Kwaghôron u profeti Yesaia u yange ôr kwagh u mve u Mesiya vough la shi pase mbamgem mba dedoo mba Tartor u Aôndo ua va a mi shin tar la kpaa. Se ôr nen ase kwagh u mbamgem mban ken ngeren u a dondo ne.

[Picture on page 6]

‘Ikyurior igen ia mough ityav a ikyurior igen’

[Picture on page 7]

‘Ubombauangev’ vea lu

[Credit Line]

© WHO/P. Virot