Mpin u Mbaôron Takerada Ne

Aluer Adam Yange Lu Vough Yô, Yange Er Isholibo Inja Nena?

Adam fatyô u eren isholibo sha ci u Aôndo gba un, na un ian i eren kwagh u a soo yô. Kwagh u i kaa ér Adam lu vough la nzughul ken ato sha ci u Aôndo na un ian ne yum ga. Jighilii yô, ka Aôndo tseegh a lu vough a ikighir shio ye. (Duteronomi 32:3, 4; Pasalmi 18:30; Marku 10:18) Mlu u vough u ken hanma orgen shin kwagh ugen cii ngu a ikighir. U tesen ikyav yô, alaghga u ngu a ihô i esen, i u fatyô u tôndon inyam a mi vough er u soo la yô, kpa u fatyô u man iyue a ihô laa? A fatyô u kaan ér kwagh ngu vough, aluer i er kwagh u i we ishima u eren a mi la er i soo u eren la yô.

Nahan Aôndo yange gba Adam, wa ishima ér a er nyi jimi? Awashima u Aôndo yô, lu u Adam a mar ior mba fan kwagh mba lun a ian i eren kwagh u ve nenge i doo ve yô. Nahan mba Aôndo una doo ve ishima shi vea soo igbenda na la cii, vea tsua a ishima ve u kuran atindi a na. Nahan yô, yange gba or sha inja i nana gbaa ungwan imo na tsô ga, kpa lu sha inja i nana ungwan imo na sha ci u nan soo u ungwan imo na yô. (Duteronomi 10:12, 13; 30:19, 20) Luun er Adam yange una lu a mfe u tsuan ihyembeato ga yô, kwagh ne ma tese ér ngu or u vough u i ne nan ian i eren kwagh u nan nenge i doo nan la ga. Bibilo pase se er Adam yange er tom a ian i lu a mi i eren kwagh u a nenge i doo un la yô; i̱ kaa ér yange dondo kwase na sha u peren tindi u Aôndo wa ve sha kwagh u “kon u mfe u fan kwagh u dedoo man kwagh u bo la.”—Genese 2:17; 3:1-6.

Nahan yô, Aôndo gba Adam a mshi sha gbaa u tsuan kwagh u dedoo man u bo, ka nahan ve kan shio u tsuan kwagh u dedoo shin hendan a imeen yee? Cii man Adam hemba ato yô, Yehova Aôndo vande tôvon akaa a yange gba shin tar la, kua uumace mba hiihii mbara kpaa, nahan mase kuren wener hanma kwagh lu u “doon tsung.” (Genese 1:31) Nahan Aôndo gba Adam a mshi iyol ve hingir u una er isholibo ga; ibo lu i Adam eeng. (Genese 3:17-19) Adam yange ma de ér dooshima na hen Aôndo man mdoo u kwagh u dedoo doo un ishima la a̱ mgbegha un una hemba ungwan imo i Aôndo a nyityôkwagh igen, kpa er nahan ga.

Fa wer, Yesu kpa shighe u va shin tar la lu or u vough er Adam nahan. Yange i wa iyav mbu Yesu er ônov mba Adam mbagen nahan ga, kpa lu sha tahav mbu icighan jijingi, nahan lu a mshi ken a na u una yange un u hendan a imeen ga. (Luka 1:30, 31; 2:21; 3:23, 38) Nahan Yesu za hemen u ungwan imo i Ter na a ishima na, or kpa kighir un ga, shin er tagher a ameen a taver kpishi nahan kpaa. Nahan Adam ya ibo sha gbenda u yange er tom a ian na i eren kwagh u a nenge i doo un la, gadia a per tindi u Yehova wa un yô.

Kpa er nan ve Adam yange tsua u hemban Aôndo ato? Yange hen wener aluer un hemba ato kpa una sôr ieren na la shinii? Ei, gadia apostoli Paulu kaa wener, “Adam yô, i tsugh un ga.” (1 Timoteu 2:14) Kpa Adam nenge hemba doon un u eren ishima i kwase na, u vande yan ityamegh ki kon u i ta ve icin sha mi la. Isharen i Adam i ungwan imo i kwase na la hemba isharen na i ungwan imo i Orgban na. Sha kpôô yô, shighe u i na Adam ityamegh ki kon u i ta ve icin sha mi la, yange ma tamber ma hen er ihyembeato ia vihi un a Aôndo yô. Adam yange ma tese ér Aôndo doo un ishima kpishi, kwagh môm una pav un a dooshima ne ga, kpa a dooshima ne shio yô, lu u Adam una ngôôr gban ken imeen ga, kua imeen i kwase na kpaa.

Adam er isholibo cii ve mar ônov ye, nahan ônov nav cii mar ve ve lu vough ga. Kpa, se mba a ian i eren kwagh u se nenge i doo se la er Adam kpa lu a mi nahan. Yô, se henen nen sha mdoom ma Yehova a iwuese ken asema a ase shi Aôndo a̱ doo se ishima tsung, gadia a kuma u se ungwa imo na shi se civir un kpaa.—Pasalmi 63:6; Mateu 22:36, 37.