“Lu Nen Mbakaven Aôndo”
Kporom Hen Aôndo
“Lu Nen Mbakaven Aôndo”
KWAGH er vihi yô, erdoo man mhôônom ma kôron man mde u asorabo man dooshima ban ken ior kpishi ainge. We u ngu a aeren ne kpa? Er i lu nahan, u hen ken ishima you wer, wea nôngo nan nan kpa u fatyô u lun a aeren a dedoo ga vee? Aluer se mba a ishima i i puun se a puu yô, alaghga se hen ser akaa er anza ase a bo shin ma kwagh u a vande eren se u doon ga nahan, una na yô mayange se fatyô u lun a aeren a dedoo ga. Kpa, Bibilo tese se mimi u surun se asema ne. I tese ér Un u a gbe se la fa wener hanma wase yô nan ngu a ishima i nana fatyô u maan aeren a dedoo ken a nan kure kure yô.
Mkaanem ma Aôndo wa Mbakristu mba mimi kwagh ér: “Nahan yô, lu nen mbakaven Aôndo er ônov mba doon ishima nahan.” (Mbaefese 5:1) Mkaanem man tese wanger wanger ér Aôndo na mbacivir un jighjigh tsung. Nena yô? Yehova Aôndo yange gba or sha inja i mlu Na, sha ibeen Na. (Genese 1:26, 27) Nahan yô, Aôndo gba uumace na ve aeren a a lu er a na nahan yô. * Nahan kwagh u Bibilo i kaa ér Mbakristu ve “lu . . . mbakaven Aôndo” la, ka inja er Yehova iyol na ngu kaan a ve ér: ‘M na ne jighjigh. M na jighjigh mer er ne yen nahan kpa, ne fatyô u nôngon u lun er mo nahan.’
Ka aeren a Aôndo agen a nyi nahan se fatyô u kavene? Avur aa á dondo vea ivur i í kaa ér se kav Aôndo la na mlumun sha mpin ne. Aluer u ver ishima yô, Paulu hii mkaanem nam ma a we se kwagh ér se kav Aôndo ne sha ishember i “nahan yô” la. Ishember ne wever aeren a i vande teren ken ivur i ken ijime la va magh sha kwaghwan u kav nen Aôndo la; man aeren shon yô ka sar sar man mhôônom ma zungwen man u den ayol a ase kwaghbo. (Mbaefese 4:32; 5:1) Paulu gema kaa a Mbakristu ken ivur i í lu ken hemen u kwaghwan ne la ér ve eren akaa ken uma ve aa á tese ér mba a dooshima u tangen iyol ga yô. (Mbaefese 5:2) Sha kpôô yô, Yehova Aôndo ver se ikyav i hemban cii i se dondo sha kwagh u lun sar sar man u zungwen mbagenev mhôônom sha mimi shi den ve kwaghbo wuee man u eren kwagh a ve sha dooshima kpaa.
Kpa se soo u lun er Aôndo nahan sha ci u nyi? Nenge ase ityôkyaa i vesen i Paulu a ter ken kwaghwan na ne; a kaa ér: ‘Lu nen mbakaven Aôndo er ônov mba doon ishima nahan.’ Kwagh ne kôr u ken ishima ga he? Yehova nengen mbacivir un ér mba ônov nav mba doon un ishima. Wanye u kpuaa ka nan nôngo ér nana lu er ter u nan nahan, nahan Mbakristu mba mimi kpaa mba nenge ér vea lu er ter ve u sha la nahan.
Yehova kighir uumace ér ve kav un ga. Er ma a kighir se yô, a gema a na se ian i eren kwagh u se nenge i doo se yô. Nahan wea soo u kaven Aôndo shin wea soo u kaven un ga kpa, ngula mase shin ishima you. (Duteronomi 30:19, 20) Kpa, i de hungur we er u lu a ishima i u fatyô u maan aeren a Aôndo ken a we nahan ga. Nahan cii kpa, aluer u soo u kaven Aôndo yô, gba u u vande fan aeren a na man igbenda na keng keng. Bibilo ia wase u ú hen aeren a Aôndo vighe vighe man igbenda na, gadia aeren a na aa a doo je i gande la na yô ior umiliôn umliôn mba kaven un.
[Footnote]
^ Kwagh u i er ken Mbakolose 3:9, 10 la tese ér m-gbe u Aôndo a gbe se sha inja i ibeen na la ka sha kwagh u aeren a un kpa a lu a mi la. I wa mba ve soo u eren ishima i Aôndo cii kwagh ér ve haa “orhe iyol” u i sôr un “sha inja i ibeen i [Aôndo] u A gbe un la.”