Washika u ken Tar u Nicaragua

“U Za Sôôn hen Ifi u Coco yô, Goom ken Iyan”

“NAHA mato u taver iyol shi lu a mashin u urugh mato shi haa mkurem kpishi. Anngôm, amgbiôr ngee sha gbenda la, aa uve akaver a mato wou cii. U za sôôn hen ifi u Coco yô, goom ken iyan.”

Ka ormishen ugen u se eren tom imôngo yange tindim a loho ne ye; loho na ne taver mo ishima ga cii. Nahan kpa, m mough zende ne Tomahar pepe, m lu zan mkohol u Mbakristu ken Wamblán, angar ugen ken imbusutarimese i tar u Nicaragua.

M mough zende ne sha use shin tse-mato wam u taver iyol. M kar sha gbenda u kootar, u ú kar ken ityar kposo kposo ken tar u Amerika la. M za nyer hen gar u Jinotega yô, m kaha m yem sha gbenda u i hee kootar ga yô; mba yer u hen ijiir la ér feo, shin vihiashe. Cii man m due gar la imbusu yô, m nenge a ukenti uhar. Iti i u môm ér Ivande i Aôndo, ugen la di ér, Mnder u Shin Ku.

Gbenda ne ngu a agungu man ugyoom kpishi. Sha ajiir a ijem lu vegher ne man vegher la cii, m za kure kure. Gbenda ne za a mo zan zan m za kar ikyua a ber u lihen hen pev ugen sha ityough ki uwo u abeen cir u cii yô. Er m lu karen ken iikpii i abeen la nahan je kpa, m ta ashe m nenge a ikyon i lun a uimondon man nunoo sha mi.

Er m za sôôn hen igyoom igen yô, m nôngo u tan sha bôôsu ugen u lu van sha atô gbenda yô. Lu duen mnyim ma ilen kpir kpir shi akaver na lu tsendan agboghol kpaa. Ken tar u Nicaragua yô, udelaba mba taver inja ka ve nger iti-kwav ve sha ajingi a mato ve, inja er: Kurutya shin Yese shin Tayar gayô Ortato nahan.

Ka kom iyange sha tembe yô, m za ar hen ukpuunkpuun mba Pantasma. Heela la m nenge a ya ugen u í maa sha ikyon yô, i ese tembe ya la tsembelee. Ya shon lu inja er ka foto u ken takerada u ngise nahan; m ôr nahan sha ci u m nenge a Orbeenyol ugen tema sha benci, aniwa yav hen tine kon, agumabua ahar di tile, i kange a igbur shi i zer ikyekye i kperan a kpera sha mi. M za ngur karen hen angar ugen yô, m nenge mbayev kpishi lu hiden makeranta. Ve huwa akondo a makeranta a kwer; er ve lu zenden sha igbudu van yô, lu inja er ka agôndoamnger a a lu kpianger va tan sha tar nahan.

Er m za mgbôghom a gar u Wiwilí yô, iyange ta kpishi, shi m nenge a ifi u Coco la, man lu kwa wam u hiihii u nengen a ifi ne je ne. Or ka nana lu ken gar la han kpa nan ungwa ihyuran i zegeifi ne. Tsô m umbur gbendatesen u ikyar-tom wam la, nahan m goom ken iyan m yem sha gbenda u zan ken Wamblán, u lun umai 23 la; u vihi kpishi.

M naha mato sha avande man shin amgbiôramnger, shi m per iwar kuma anigheni shin itiankarinyiin nahan. Er m lu nôngon mer me palegh agber a amgbiôr a uman bughun ikwe yô, m za num a num ihyundu. I mough i cir sha mo kpishi je yô, m ma a ma i kuaa. Gbenda ne za gbem za mase kuren, tsô m nenge a gar u Wamblán, ape  m lu zan la; gar ne ngu shin pev ken ikyô.

Kpernan sha use er ahwa anyiin man tiôn nahan, lu inja er hanma or nder kera kpaa nahan. Anom a ikyegh tôngo sha use kpishi, nahan m nder faa, tsô m mough m due ken won m zende sha godobi u vesen m sen shin hemen. Ahumbe a sha uwo a á lu tan la, iv a ihuma i bredi u ior lu kaan yô.

Er sev av yô, m nenge a ufoto mba doonashe mba paradiso mba ior mba kperan akaa mba hen ijiir la kpera sha ukpekpe ajiir kposo kposo yô. Ukenti mba sha akpe a igbenda var ungeren kposo kposo mba yôôn msôrom ma nyohon. Ufoto mba vesen mba i var sha akpe a igbenda la lu a uityendezwa mba ugomoti utar mba karen ken ijime er a ior yô. Ior haa usemetu hen inya maa ahungwa-akôngo sha ugbangban mba engem ashe.

Yange mea zua a or je m sugh nan mer, Adiós sha ishughun i ior mba ken tar u Nicaragua. Ior mba m lu sughun ve la cii saan ishigh sha a mo, ve lam a mo kundu kundu. Kpa er mba karen gbenda sha anyinya man ujaki lu zan se ayôôso ato yô, se kende a imo sha.

Sha iyange i Tomataan aikighe, ior mba van mkohol u ayange ahar la hii u va nyôron a icombor ve. Mbagenev va angahar, mbagenev sha anyinya, mbagenev shin mato. Mbayevnomso man mbayevkasev mba kiriki mbagen zende angahar ahwa ataratar, man lu mbaabakpa ve wa ye. Er i wa ubom mba hônon ior, mba i yer ér Land mines la hen kpeifi ape ior ve peren la nahan kpa, ve cia ga ve per, man er hiin lu shin ifi la kpishi nahan kpa ve wa ikyo ga. Mbagenev mba ve va mkohol ne sha ajiir a icaa yô, va a kwaghyan kpuaa tsô; ve jiir cinkafa ve nungwa ahôm a igyoo sha mi. Ior mban cii va nyi?

Ve va u va taver ishimaveren i ve lu a mi ér tar ua doo ken hemen la. Ve va ér i pase ve Bibilo vea ungwa. Ve va u va civir Aôndo.

Ka kom iyange i Sati yô, ior mban cica cii kohol ken adeda u lun haav paa paa, ve hemba iyenge 300; ve tema sha ubenci man mkônom ma robaa. Ungô lu nan anikyundanev vev atumba. Sule igyoo man sule ikyegh lu her ikyua, nahan uzendenya mban lu zan ior ayôôso ato.

Iyange ngur kôndon sha tembe yô, hii u tseenyol; tsee iyol je bee er or nana kera fatyô u teman ken adeda la ga nahan. Nahan kpa, ior kegh ato ungwa akaawan a Bibilo a i lu ôron ve la cii. Ve lu bughun avur a Bibilo a mba nan kwaghôron lu ôron la nengen shimi, shi ve wa atsam a a har sha avur a Bibilo yô, shi ve kegh ato ve ungwa mbamsen mba i er sha ci ve la kpaa.

Mkohol been sha iyange la yô, m kohol mbaganden mbagenev se er anumbe vea mbayev mba kiriki. Se mba been yô, se tôô shighe se nenge atôakaa a ken mkohol a mbayev mban nger shin ityakerada la. Shi m tese ve ufoto mba asan man azuku-asan sha kômputa wam. Doo mbayev mban kpishi shi saan mbamaren vev iyol kpaa.

Kpa mkohol ne ngôôr ga tsô kure, nahan ior gba hiden sha ajiir a ve. Iyange i mkohol kure la, kpernan sev mbu aven yô m mough; m lu umbur kwagh u azende am a he ne shi m kav er ve doom ishima tsung yô. M kange ishima mer me lu er ve nahan, me lu a ieren i kwagh kuman mo shi me veren ashe a Aôndo kpaa.

[Pictures on page 29]

Ior mough ajiir a icaa a icombor ve va mkohol u ken Wamblán la