Orgban u a Kom Icivir Yô
Kporom hen Aôndo
Orgban u a Kom Icivir Yô
‘ITYÔKYAA i se lu uma jim yô ka nyi?’ I lu nahan u hen sha mpin ne vee? Mba ve ne jighjigh ér uma gba duen tsô la fatyô u zuan a mlumun sha mpin ne ga. Kpa mba ve lumun ér ka Yehova Aôndo a lu Imbor i uma la yô, kwagh ve ngu nahan ga. (Pasalmi 36:9) Ve fa ér ityôkyaa ngi i Yehova a gbe se yô. I pase ityôkyaa shon ken Mpase 4:11. De se nenge er mkaanem ma apostoli Yohane nger ne ma pase ityôkyaa i se lu uma yô.
Yohane pase er mbaatsamev mba shaav ve lu wan atsam wuese Aôndo yô, ér: “We, Ter Aôndo wase, U kuma u ngohol iengem man icivir man agee gadia U gba akaa cii man ka sha ishima You kpaa a lu, shi i gbe a kpaa ye.” Ka Yehova tswen a kom imba icivir la ye. Sha ci u nyi? Sha ci u a “gba akaa cii.” Nahan yô, doo u ishima ia mgbegha akaauma a Aôndo a gbe a, a lu a kwaghfan kpishi la cii aa er nyi?
I kaa ér Yehova kuma u ‘ngohol’ iengem man icivir man agee. Sha kpôô yô, ka un a hembe iengem man icivir kua agee sha won cii ye. Kpa uumace kpishi kav er i lu un a gbe akaa cii ga. Kpa, ior mbagenev mba, mba ve nengen a “mlu Na u i nengen a mi sha ashe ga la” ken akaa a a gbe la yô. (Mbaromanu 1:20) Mba a iwuese kpishi, nahan asema mgbegha ve mba nan Yehova iengem man icivir. Mba pasen hanma or u i sar nan u ungwan cii ér ka Yehova a gbe akaa cii sha inja ye, sha nahan yô a kuma u se na un icivir.—Pasalmi 19:1, 2; 139:14.
Kpa Yehova ngohol agee hen mbacivir un nena? Jighilii yô, kwagh u i gbe un a gba môm una fatyô u nan Orgban u hemban cii la agee ga. (Yesaia 40:25, 26) Kpa er Aôndo a gbe se sha inja i mlu na yô, a wa aeren a na agen ken a vese, môm ken aeren shon yô ka agee. (Genese 1:27) Aluer kwagh u Orgban se a er sha ci wase ne doo se kpishi yô, ishima ia mgbegha se se civir un shi se wuese un sha agee ase man tahav asev cii. Nahan er ma se yar tom a agee ase cica cii sha u keren akaa ase yô, se nenge ser Yehova Aôndo kuma u ngohol agee ase cii, nahan se mba civir un.—Marku 12:30.
Nahan yô, i gba se sha ci u nyi? Mpase 4:11 mase kuren ér: “Ka sha ishima You kpaa a lu, shi i gbe a kpaa ye.” Se gba iyol yase ga. Ka sha ishima i Aôndo se lu uma ye. Sha nahan yô, aluer se mba keren akaa ase a uma wase cii yô, se zua a mkom mayange ga. Aluer se soo u zuan a bem ishima man iember man mkom ken uma yô, doo u se fa kwagh u a lu ishima i Aôndo yô, shi se eren akaa a a lu sha ishima na kpaa. Ka nahan man se fa ityôkyaa i i gbe se shi se lu uma kpaa ye.—Pasalmi 40:8.
[Picture Credit Line on page 19]
NASA, ESA, and A. Nota (STScI)