Washika u ken Tar u Ghana Iyange i A Kera Tsule Kwange Na u Il Ga La

M NENGE a na yô, lu er m lu henen mer una lu la ga. A hua riga u pupuu elemee, a tsule kwange u il u gbanger kpishi shin iwenge, a wa iju dông a kegh iyol u nôngon num shi lu angahar gbilin kpaa. A vihi sha ishi; a kura icul sha lu kenger sulaa. A bon ashe, lu tswam tswam, mlu na jimin cii tese ér ngu a gbong gbong iyol kpishi.

Fese nahan maa a nule gagher a gba keren ave sha ahumbe ngoron. A gema uwer a gbidye sha bamber kon ugen, bamber kon shon pav ker avegher ahar. Shi a tsuwe a gba jingir sha ahumbe fiin fiin, ave na man angahar lu yemen sha ahumbe zeee inja er a soo u tumen or u nan til u nôngon kwagh a na nahan. Man ka or u a tindi ér i va hen Bibilo a na ne je kpa?

Tsô m kporom ikyua a na, m na un uwegh, m pine mer, “Ka we zan u lu Kojo ye ga? I kaam ér u soo wer i va hen Bibilo a we.” A zua uwegh a mo maa a se daalaa, a saan sha ishi. Ashe na kera lu tswam tswam ga, kpa lu sha inja i or u nan soo u henen kwagh yô. Tsô a kaa ér, “Een, a doom kpishi u henen Bibilo. Se hii hanma shighe?”

Tsô se tema ken won u iyou na sha varenda u cuku, se lu a Ubibilo asev man ityakerada yase i henen kwagh. Hemba kundun iyol heen shi huan kpaa shi or nana za se iyol heen ga. Se lu se utar tseegh: Mo man Kojo kua anikya na. Anikya ne kehe ga, lu a ice i nyian sha ityou er idyer nahan shi lu a anice u pupuu shin gbem, nahan mluashe na hôm kpishi shi lu sha inja i zan iyol kpaa. Nahan kpa, a doo ashe shi a wa iniumbe kpaa shi kwagh hange un kpishi; lu zenden kera daalaa, unden sha ityakerada yase, ngohol abiro ase shi wan ave ken akpa a riga ase keren kwagh u una dugh yô. Nahan cii kpa ishima za Kojo her ga, a ver ishima sha kwagh u se lu henen la, gadia hoghol un a zayol u anikya na ne, vough er ka i var ormaren a ayôôso man zayol u mbayev mba nan nahan. Kojo pinem mbampin kpishi, nahan m fa je mer sar un tsung u fan kwagh u se lu henen la. Alaghga num na u nôngon la tese un u lun sulaa, sha ci u gbe lumun kwagh tsô ga, saa a ôr un a wanger un shi a tese un ken Ruamabera cii ve una lumun ye.

Kwaghhenen wase lu zan hemen doo doo. Kpa shighe kar yô, m nenge num ugen lu zan hemen ken ishima i Kojo, man lu num u kiriki ga. Iyange igen yô, a kaa a mo ér, “Kwagh môm doom ishima shin tar ne ga saa anumbe a keren jido tseegh.” Er kwagh ne yô, m mase kaven er num u nôngon u doo or ne ishima tsung yô, gadia lu kwagh u a na ishima na cii sha mi shi hen fa u eren kpishi yô. Zum u lu anyom 26 la, a fa num u nôngon tsema tsema, je yô a nyôr sha iaven i tsulen kwange u il; ka iorov kpuaa tseegh ve  ar sha iaven ne shin vea fatyô u aren sha iaven ne ye.

M fa kwagh u Kojo una tsua u eren jighilii ga. Kpa m nenge mer a kav er anumbe na a nôngon num vihin mbagenev iyol la a zough sha mhôônom ma kôron man ieren i kundu kundu i i gbe u Mbakristu vea lu a mi la ga yô. Nahan kpa, m fa mer ior mba ve hembe vihin tu a na je kpa mimi u ken Bibilo wase ve ve gema inja. Aluer Kojo ngu a ishima i mimi yô, un kpa Mkaanem ma Aôndo ma a gema un kure kure. Nahan gba u me wa ishima a na kpee je.

Iyange igen atetan, se mba ngur kuren kwaghhenen wase yô, se ôr ivur Bibilo igen i i bende a Kojo vough er or ta un iju i nyoon tsung nahan yô. Lu un iyol na je ôr ivur la ye. I̱ kaa ér, “TER ngu karen orperapera kua iferor kpaa; or u ipira i doo nan la yô, A kôr nan ihyom.” (Pasalmi 11:5) Tsô a hide a kimbir mkaanem man teghelee ér, “Or u ipira i doo nan la yô.” Ashe na a yange nyian kpishi, una norom sha kwagh ve a hide ijime ga la maa hingir pivee. A mough ityough sha a kenger mo sha ishi maa a se teghelee. A kaa a mo ér, “M tsua kwagh u me er kpaa.”

Mo man Kojo se mba eren tom u u hembe doon se ishima cii la hegen, se na ayol a ase se mba eren tom u tesen ior; se mba tesen hanma or u nan kegh ato a vese cii akaawan a ken Bibilo gbilin. Iyange igen sev mbu aven yô, se wa iyol u za sôron gumor ugen, iti na ér Luke.

Se mba moughon u yemen yô, se due gbenda ken kasua ugen, gbenda shon hoghol shi ior ngee sha u kpishi. Ukenti lu sha akpe a gbenda kpishi shi mbateen akaa wa nongo sha u suuluu a ikyav vev mbi teen, ve lu teen mkem ma nyian man ma il shi se nenge a akese a tomato man atuur shi se nenge a uredio man anema man atsahur man ice i cirin sha ityou man ikyav mbi yôron man utse mbaakôvough kua mbaalaha. Agumaukase lu zenden a akaayan a human doon sha ityou shin ugbangi. Ve lu nyôron hen atô u ior sha kwaghfan sha er tulugh u human doon u iyue i ve lu zenden a mi la man ishu ombor man akambe a kaan kua akôôr una ta or u ijen i ker nan sha ahenga a doo nan nahan nana yam kwaghyan ve la yô. Iwa man ivo man ikyegh lu eren amo ningir ior shin angahar. Uredio lu kuhwan ding ding, akaahendan lu tôngon shi ior kpa lu yôôso kpishi.

Se kar anhua u vihin ashe ugen se due kasua la imbusu; se mba ze deghôô yô, se za ar hen iyou igen i i ye tsegh yô, i nger kwagh sha tse kpande i var shami ér: “Long Journey Spot” (“Ijiir Memen i Mbazan Zende u Icaa”). Luke, gumor u poson anyom 20 kpuaa mough va tile sha hunda yila se ér se nyôr ker se va mem oo. Se mba nyer yô, se nenge i ver ahu a ikyon man amise a ikyon ken aba man shin mbaakwati kpishi shi i kange ahu akar akar i ver her kua avur a ikyon kpaa; akaa ne cii lu a anmgbian u ngô u Luke u kwase u a we ior icigh yô. Aluer u nenge a icigh ki a we ior ne yô, u fa je wer a ndera eren tom ne anyom imôngo; ka i kume ki, i haa mngerem sha ki, i kase; i na jighjigh ér ki been hanma ityô uange cii. Luke lu keghen se a kegh. A ese ijiir la tsembelee a ver agbur a teman atar. Se tema ikyua ikyua, inja er se zua anu nahan, maa se hii u henen Bibilo.

Lu Kojo lu tesen Luke Bibilo ye. M tema m lu ungwan er agumaior a ahar ne lu timen sha kwagh u Bibilo i pase ér ka ityôkyaa i ican i yan i ngee shin tar kpishi la. Shighe u Kojo nalegh uwegh lu wasen Luke u bughun Bibilo yô, m gba kenger er ave na a a tsoghul kpishi la lu bughun ikya Bibilo yô. Tsô m umbur er semberee ne ave la lu ave a nôngon num a mi yô. Mkaanem ma Aôndo dugh aeren a bo a yange ya tor ken a na, a á dumbur ken tar u u ban a aeren a dedoo ne, nahan ma gema un a hingir u lun a aeren a dedoo, er mhôônom ma kôron man dooshima nahan. Sha kpôô yô, Kojo er zegekwagh u iniumbe ga.

Se mba ngur hiden yô, se nenge a or ugen tema hen itine mangoo. Se hii iliam a na, nahan a kegh ato zulee a lu ungwan er Kojo bugh ivur Bibilo lu ôron yô. Va fe ér se mba Mbashiada mba Yehova yô, a mough gagher a tile sha, a kaa sha ishima vihin ér: “M soo kwagh wen ga!” Vanger mor Kojo ker kpishi. Kpa a hide a gba shi mi, a kaa kera teghelee. Maa se yem ayasegh.

Er se lu yemen la, Kojo kaa a mo ivarvase ér: “Or la a ôr kwagh la nahan ishima tsuwem ker kpishi. U fa kwagh u ma m er a na kpa?” M se teghelee, m kaa mer “m fa.” Un kpa se, tsô se za hemen a zende wase.