Kporom hen Aôndo

“M Fa Atsan a Ve”

Ekesodu 3:​1-​10

“ICIGHAN, icighan, icighan, kape TER . . . A lu la.” (Yesaia 6:⁠3) Mkaanem ma Aôndo a ne i nger ne ma tese ér Yehova Aôndo ngu wang sha gbenda u hemban cii. Alaghga u pine wer, ‘mlu u wang u Aôndo ne na yô, kwagh gba un sha kwagh wase ga shi ka u se fatyô u zan ikyua a na ga shinii?’ ‘Imba icighan Aôndo ne nahan una wa ikyo sha kwagh wam, mo orsholibo u m yen ne je he?’ De se time sha mkaanem ma taver se ishima ma Aôndo ôr a Mose, ma i nger ken Ekesodu 3:​1-10 la.

Iyange igen er Mose lu kuran ilev yô, a nenge a kwagh u kpiligh un iyol, a nenge ageva lu yeghen usu, kpa “ageva la hia ga.” (Ivur 2) Tsô a kporom ikyua ér una za nenge zegekwagh u kpilighyol la. Nahan Yehova lam a Mose ken atô u usu la sha ikyev i ortyom, ér: “Tsuwa akôv shin angahar a ou kera, gadia ijiir i u til her ne, ka icighanjiir je.” (Ivur 5) Nenge ase yô, er usu u u lu yeghen ken ageva la tile sha mlu u icighan Aôndo hen ijiir la yô, ijiir la cii hingir icighanjiir!

Icighan Aôndo ne yange lam a Mose lu sha ityôkyaa je. Aôndo kaa a na ér: “M nenge ican i ior Av mba ve lu ken Igipiti la, shi M ungwa mliam vem ma ve lu vaan mbatorough a ve la, gadia M fa atsan a ve la.” (Ivur 7) Aôndo yange fa ican i ior nav lu yan la; shi ungwa mliam vem ma ve lu vaan yilan un la kpaa. Yange tôô ér ka un je i lu eren un ican ye. Ungwa kwagh u Aôndo ôr ne: “M fa atsan a ve la.” Takerada ugen ôr kwagh u ishember i “M fa” la ér: “Ishember ne tese mlu u ken ishima man ikyo i wan kua mhôônom ma kôron.” Mkaanem ma Yehova ôr a Mose ne ma tese ér ngu Aôndo u wan ior nav ikyo.

Tsô Aôndo er nena? Yange kunya kôr un a kôr a ve shin ungwa mliam vem haa iyol tseegh tsô ga. Akaa a yange nenge shi ungwa la mgbegha un er kwagh. Yange wa ishima ér una yima ior nav, una due a ve ken tar u Igipiti, una yem a ve ken “tar u atumbabua man iyough ve dumbur ker yô.” (Ivur 8) Lu sha ityôkyaa ne Yehova tindi Mose, kaa a na ér: “Due a ior Av . . . ken tar u Igipiti” ye. (Ivur 10) Mose yange za ityom i Yehova tindi un la, nahan ken inyom i 1513 C.S.Y. (Cii man Shighe u Yesu) la, a mase duen a Mbaiserael ken Igipiti kera.

Yehova gema kposo ga. Nyian kpa mbacivir un vea fatyô u lun a vangertiôr ér atsan a ve lu yan la nga myer hen a na ga, shi ongo mliam vem ma ve vaan ve yer un la kpaa. A fa atsan a ve ye la vindi vindi. Mhôônom ma ker Yehova a mba ve civir un sha mimi la tseegh tsô ga. Aôndo u mhôôn ne ngu a er kwagh sha u wasen ve gadia “ka Un a koson” ve ye.​—⁠1 Peteru 5:⁠7.

Mhôônom ma Aôndo mara ma ne se ishimaverenkeghen. Sha iwasen i Aôndo yô, se uumace mba se yen ne se fatyô u dondon atindi a Aôndo a perapera, a a lu wang la, nahan una lumun se. (1 Peteru 1:​15, 16) Kwase Kristu ugen u yange ule kpishi shi uma due un ishima yô, zua a msurshima zum u a ôr kwagh u ngise er Mose hen ageva la. A kaa ér: “Aluer Yehova er inya hingir icighankwagh yô, alaghga tsô mo kpa ishimaverenkeghen ngi sha ci wam. Kwagh ne wasem kpen kpen.”

Ishima mgbegha u ker u seer fan kwagh u icighan Aôndo, Yehova je he? Se fatyô u yan ikyar a Yehova kangenaa, gadia A “fa mlu wase, A umbur er se lu vuulevu je yô.”​—⁠Pasalmi 103:14.