Or Nana Fatyô u Ôron Bibilo Kaven Kpa?

“Tsombor wam yange u ôron Bibilo hanma iyange i Lahadi. Kpa yange i doom u ôron Bibilo shon yum ga. Shin er m na jighjigh mer Bibilo ka Mkaanem ma Aôndo nahan kpa, akaa kpishi a m ôron ker la taver mo u kaven.”​—⁠Steven, or u ken tar u Britain.

“Shighe u m lu anyom 17 la, m nôngo mer me ôr Bibilo. Kpa er i̱ taver mo u kaven yum yô, m de kwagh u i̱.”​—⁠Valvanera, kwase u ken tar u Ishpania.

“Yange m ôr Bibilo kwa môm sha a ci u m nenge mer er m lu Orkatoliko yô, doo u me ôr i̱. Yange tôôm anyom atar u ôron Bibilo jimin cii been! Kpa m kav kwagh u m ôr la cuku tseegh tsô.”​—⁠Jo-Anne, kwase u ken tar u Australia.

ZAN zan nyian kpa, ka Bibilo i lu takerada u ú hembe ngeen sha tar cii ye. I̱ za hemen u lun takerada u ior ve hembe yamen yô, shi í hemba gberen i ken ijô kposo kposo a hanma takerada ugen cii shi í er Bibilo sha icer i ungwan a ungwa man i sha CD kua i sha DVD hemba hanma takerada ugen cii. Nahan kpa, ior kpishi mba ve lu a Bibilo ka ve ôr i kpa i taver ve u kaven. We kpa Bibilo i taver we u kavenee?

Aôndo Soo Ér Se Kav Mkaanem Navaa?

Bibilo kaa ér: “Icighanruamabera cii ka Aôndo A ne i nger ye.” (2 Timoteu 3:16) Sha kpôô yô, ka Yehova Aôndo a ne se Bibilo ye. Nahan a soo ér se kav Mkaanem nam man je he? Shin yange na i nger Bibilo i taver u kaven sha apera ér i lu asande a ior kpuaa, inja er mbahemenev mba aduaav man mbatimen ken Bibilo nahan tseegh ve kav i̱ yee?

Ôr ase avur aa a dondo ne ken Bibilo you:

“Tindi u m we u nyian ne a hemba u agee ga, man ngu ca kpaa ga.”—Duteronomi 30:11.

“Mbugh u akaaôron a Ou ne iwanger, man shi ne mba ve lan kwagh mkav kpaa.”—Pasalmi 119:130.

“Hen shighe la [Yesu] ember ken Icighan Jijingi, A kaa er: M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikyundanev a yô.”—Luka 10:⁠21.

Avur ne pase wang ér Aôndo u a ne i nger Bibilo la soo ér u kav Mkaanem nam. Nahan kpa, mbaasemaamimi kpishi ka i taver ve u ôron Mkaanem ma Aôndo kaven. Kanyi ia wase u we? Ngeren mba ve dondo ne tese akaa atar a aa wase u u̱ ôron Bibilo kaven yô.