Aluer Or Ngu ken Ibanave yô, Tese Ér Aôndo Venda Nanaa?

AÔNDO yange kaa a Mbaiserael mba tsuaa mbara ér: “Icanor nana̱ de lu hen we ga.” Kwagh lu nahan sha ci u Tindi u i na ve la tese ér gba u a nengen sha atsanaior, shi a deen ior a anzô a i ne ve yô. (Duteronomi 15:​1-4, 7-10) Nahan icanor yange ma nan lu ken Mbaiserael ga, sha ci u Yehova tôndo zwa ér una ver ve dedoo. Nahan kpa, iveren la har sha mkor u kuran Tindi, kpa Mbaiserael tativ gema venda u kuran Tindi.

U ngu wer, mba yange ve lu a akaa kpuaa tseegh la yô, Aôndo venda a venda ve ga, di er mba yange ve lu a akaa guduu la kpa lu ikyav i tesen ér Aôndo lumun ve kpee ga nahan. Mbacivir Aôndo kpishi lu ken ibanave. Profeti Amoshi lu icanor u kuran ilev, shi eren tom sule ashighe ashighe. (Amoshi 1:1; 7:14) Shighe u ijen gba ken Iserael sha ayange a profeti Eliya la, hingir u Eliya una lu vea kwasecôghol ugen u Aôndo er ivande ve anmwe na kua anmkure na kera bee ga, sha shighe u ijen la cii la. Eliya vea kwasecôghol la yange ve hingir mbainyarev ga, kpa lu kwagh u kuren ugbayol vev mba hange hange tseegh Yehova na ve ye.​—⁠1 Utor 17:​8-16.

Uaahe vea fatyô u nan or nana hingir oribanave kpoo. Aikyôr kua angev mbua fatyô u yangen or kwagh eren sha shighe kpuaa shin ken uma u nan cii. Shi ku kpa ka u na ior ve hingir ancôgholov man kasev mba côgholov. Mbamlu mba vihin mban je kpa, ka ikyav i tesen ér Aôndo venda or ga. Kwagh u yange er Naomi man Rutu la ka ikyav i kôron ken ishima i tesen ér Yehova we mbaibanave ikyo. Shin er ku u noov mba kasev mban gbihi ve ken ibanave tsung nahan kpa, Yehova Aôndo ver ve dedoo shi nenge sha a ve kpaa.​—⁠Rutu 1:​1-6; 2:​2-12; 4:​13-17.

Sha kpôô yô, ibanave ka ikyav i tesen ér Aôndo venda or ga. Mba ve lu civir Aôndo sha mimi cii vea fatyô u lun a vangertiôr ken mkaanem ma Tor Davidi ma ma kaa ér: “Ngise m lu iyev, hegen m bee iyol, nahan kpaa, mayange m ngu a nenge i ta orperapera kera ga, shin tsombor u nan kpaa u sônon kwaghyan ga” la.​—⁠Pasalmi 37:⁠25.

[Foto u sha peeji 8]

Shin er Naomi man Rutu lu ken ibanave tsung nahan kpa, Aôndo ver ve dedoo shi nenge sha mbamgbe vev kpaa