Er Loho u Yesu Kristu u Bende a Mlu Wou La

“M va sha u ve̱ zua a uma, ve̱ zua a mi wuee je.”—YOHANE 10:10.

JIGHILII yô, Yesu Kristu yange va shin tar ér una va na a na kwagh, lu u una va ngohol a ngohol kwagh ga. A na uumace iyua i injaa tsung sha tom na u pasen kwagh la, iyua ne ka loho u u pase mimi sha kwagh u Aôndo man awashima na la. Mba ve ongo loho shon, ve dondo kwagh u ú er la vea lu a uma u dedoo hegen je, man Mbakristu mba mimi nenge ér kape i lu vough je la. * Kpa kwagh u vesen ken loho u Yesu pasen la yô, ka iyua i i hembe lun a inja cii la. Iyua shon yô ka uma na u vough u yange na sha ci wase la. Mkpeyol wase u tsôron har sha u se wan ikyo sha vegher u vesen u loho na ne.

Kwagh u Aôndo man Kristu ve na La Yesu yange fa ér gba u una kpe ku u nyoon tsung sha ikyev i mbaihyomov nav. (Mateu 20:17-19) Nahan kpa, ken mkaanem nam ma i fe ma dedoo, i nger ken Yohane 3:16 la, a kaa ér: ‘Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.’ Shi Yesu kaa ér un va sha u una ‘na uma Na a̱ hingir ipaan sha ci u ior kpishi.’ (Mateu 20:28) Er nan ve yange kaa ér a tôô uma na kera ga, kpa gema kaa ér una na uma naa?

Dooshima u a hembe akaa cii la na yô, Aôndo ker gbenda u yiman uumace sha ikyev i isholibo i̱ i mar ve a mi la kua akaa a isholibo i ve a mi la, ka mlu u vough ga man ku je la. Aôndo er kwagh ne sha u tindin Wan na u môm môm la shin tar sha u va kpe ku u nan nagh. Yesu na iyol na u eren kwagh ne, yange na uma na u vough la sha ci wase. Kwagh u Aôndo a ne, i yer ér ipaan ne, ka iyua i hemban cii i Aôndo a ne uumace yô. * Ka iyua i ia fatyô u nan or uma u tsôron yô.

Kwagh u i gbe u ú er la Ipaan ka iyua hen a we kpa? Ngura ka we u kaa ye. U tesen ikyav yô: Tôô ase wer orgen kôr akwati u i we iyua ker yô ngu nan we. Jighilii yô, a fatyô u hingir iyua you ga, saa u kporom u ngohol i. Nahan kape Yehova a ker iyua i ipaan sha uwegh a lu nan we je la, kpa iyua ne ka i you ga, saa u kporom u ngohol i. U kporom u ngohol iyua ne nena?

Yesu kaa ér ka mba ve ne un “jighjigh” la vea zua a injar i uma u tsôron ye. Jighjigh u nan wa kwagh u ú eren ken uma wou la ker. (Yakobu 2:26) Inja i u nan Yesu Kristu jighjigh yô, ka u eren kwagh zuan sha akaa a yange ôr shi er la. Saa u fa Yesu kua Ter na dedoo ve u fatyô u eren nahan ye. Yesu kaa ér: “Uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”—Yohane 17:3.

Yesu yange pase ior loho ugen anyom kar kuma dubu uhar hegen, man loho shon gema mlu u ior umiliôn imôngo sha tar cii. U soo u seer fan kwagh u loho shon man er we kua mba hen tsombor wou ne zua a iveren ken u, man a lu hegen tseegh ga, kpa a lu gbem sha won kpa? A saan Mbashiada mba Yehova iyol u wasen we.

Ngeren mba dondon mban vea seer pasen we kwagh u Yesu Kristu, or u yange pase loho u ua fatyô u geman uma wou gbem sha won yô.

[Ngeren mba shin kpe]