Tese Ônov Ou

Rebeka Kegh Iyol u Eren Ishima i Yehova

ITI i Rebeka ka iti i í fe i dedoo sha ajiir kpishi nyian yô. U fa ma or u nan ye iti la kpa?— * Rebeka lu kwase u injaa u i er kwagh na ken Bibilo, takerada u hemban zan gwa sha tar cii la. Kanyi u fe sha kwagh u kwase nee?— Doo u se hen kwagh u Rebeka sha ci u ikyav na la ia wase se u civir Yehova, Aôndo u mimi la.

Rebeka ngu kwase u sha uhar u yange va hingir u civir Yehova sha mimi, u i ter kwagh na ken Bibilo yô. U fa kwase u hiihii u i ter un la kpa?— Ka Sara, kwase u Aberaham. Sara yange bee iyol kera cii, mase maren Isaka—wan na u môm môm la ye. De se nenge ase er Rebeka yange kegh iyol u eren ishima i Yehova yô, man er Isaka zua a na la kpaa.

Aôndo yange yila Aberaham man Sara ér ve due ken gar u Haran ve yem ken tar u Mbakanaan, hemba anyom 60. Aberaham man Sara mba been iyol kumbur kumbur yô, Yehova tôndo zwa a ve ér vea mar wan, iti na a lu Isaka. Sha mimi yô, mbamaren mba Isaka vea soo un dedoo. Sara tsa anyom 127 maa kpe, shighe la wan na Isaka gande or. Ku u ngô na vihi un ken ishima kpen kpen. Aberaham soo ér Isaka a er kwase ken Mbakanaan ga sha ci u ve lu ior mba civir Yehova ga. Nahan a tindi wanakiriki na, man a̱ shi nan kpa wanakiriki ne lu Elieser, ér a za er kwase sha ci u Isaka ken ityô na ken gar u Haran u gba ica hemba ukilomita 800 la!—Genese 12:4, 5; 15:2; 17:17, 19; 23:1.

Shighe kar yô, Elieser kua mbashiren Aberaham  tom mbagenev va nyôr ken Haran a urakumi pue, ve tôô ikyav man uiyua sha ci u kwasehe. Ve za tile hen kpe ijôr sha ci u Elieser fa je ér ka a lu atetan yô, ior ve va kesen mngerem sha ci u ilev vev man icombor ve. Elieser er msen ér kwase u una tsua sha ci u Isaka yô, i lu u una sôn nan mngerem ve nana kaa ér: “Me na urakumi ou kpaa, ve̱ ma” la.

Man lu kwagh u er vough je la. Rebeka va nyôr hen ijôr la, lu wankwase u “doo ashe tsung” yô. Elieser sen un mngerem yô, a kaa ér: “Me kese me na urakumi ou kpaa ve̱ ma, i̱ kuma ve.” Er “a hide shin ijôr ayem, a za kese mngerem” la, Elieser hôn ashe sha a na, “lu ving.” Nenge imba la sha wono! Gba u Rebeka una kese mngerem a kuma ugalôn mbamngerev 250 una na urakumi pue mba imura kôr mbara ve vea ma a kuma ve ye!

Elieser na Rebeka uiyua mba dedoo, shi Rebeka ôr un er un lu wan u Betuel, anmgbian u Aberaham yô. Rebeka lôhô Elieser man mba ve lu vea na la ér ve za sha ya i za tese ve “ijiir i tsan.” Tsô a gber ayem sha er una za ôr ve sha ya er ve lu a iorvannya mba Aberaham a tindi ve, ve mough ken tar u Kanaan je yô.

Tien u Rebeka, Laban nenge a uiyua mba taver ishe mba i na ingyôr na la shi mba kaan un or u Elieser a lu yô, a kua a na, a nyôr a na ken ya ve. “I ver un kwaghyan inya er a̱ ya; kpa a kaa er: Me ya ve ga, saa me vande ôron kwagh u m ve ne ve.” Nahan a pase ve ityôkyaa i Aberaham a tindi un yô. Betuel man kwase na man Laban cii doo ve, ve lumun a kwagh u ivesegh la.

Elieser man mba ve lu a na la mba ye kwaghyan kera yô, ve yav. Kpernan sev mbu aven yô, Elieser kaa ér: “Nam nen gbenda, m̱ yem hen terem.” Kpa tien u Rebeka man ngô na soo ér abunde kpa ve tsa “er ayange pue nahan.” Mba pin Rebeka aluer una soo u yemen vea Elieser imôngo yô, a lumun kpase wener: ‘Me yem.’ A kera timbir ga je maa a yem vea Elieser imôngo. Mba za nyer hen ya yô, a hingir kwase u Isaka.—Genese 24:1-58, 67.

U hen wer yange lu Rebeka zange u undun tsombor na man akar a na yemen hen ijiir i icaa, er fa wener alaghga una kera nenge a ahuraior na ne ga laa?— Ei, yange lu un zange ga. Nahan kpa Rebeka zua a iveren sha ci u a kegh iyol u eren kwagh sha ishima i Yehova. A hingir kwase u i va mar Oryiman, Yesu Kristu ken tsombor na yô. Se kpa aluer se kegh iyol u eren ishima i Yehova yô, se zua a iveren er Rebeka nahan.—Mbaromanu 9:7-10.

[Ngeren u shin kpe]

MBAMPIN:

▪ Rebeka lu ana, man lu han Elieser zua a naa?

▪ Er nan ve Aberaham soo ér Isaka a vôso kwase ken Mbakanaan ga?

▪ Rebeka yange tese ér una lu kwase u dedoo nena?

▪ Se er nyi ve se lu er Rebeka nahana?