Kporom Hen Aôndo

A Fa “Asema a Ônov mba Iorov”

2 KRONIKU 6:29, 30

KA AN wase je ishima i nyian nan sha ci u mbamtaver man mbamzeyol mba uma ne ga? Ashighe agen ka i lu se inja er ma or nana fatyô u kaven mbamzeyol mba se lu nôngon a mi la shin mnyoon u ken ishima yase jighilii ga nahan. Nahan kpa, or gema ngu u nan fe mlu u ken asema a ase vindi vindi yô, or shon yô ka Yehova Aôndo. Se fatyô u zuan a msurshima ken mkaanem ma Solomon ma ma lu ken 2 Kroniku 6:29, 30 la.

Solomon er msen shighe u i lu tseghan tempel u ken Yerusalem ken inyom i 1026 Cii man Shighe u Yesu la. Ken msen u Solomon, u alaghga yange er kuma miniti pue la, a wuese Yehova, er a lu Aôndo u eren kwagh a ior nav sha mimi, man er a kur uityendezwa nav shi a ongo msen kpaa yô.—1 Utor 8:23-53; 2 Kroniku 6:14-42.

Solomon zamber a Aôndo ér a̱ ungwa msen u mbacivir un ve eren la. (Ivur 29) Shin er Solomon ter atsan kposo kposo nahan kpa (ivur 28), á pase ér hanma or u civir Aôndo yô, nan fa “mvihi u nan” shi nan kav er i lu nan ken iyol sha ci u “ican i nan” la yô. Alaghga or nana zungwe sha ci u ma mzeyol u nan lu a mi yô, orgen di nana lu yan ican ken ishima sha ci u ma mzeyol ugen kposo je.

Aluer ka nyityô mzeyol je mbacian Aôndo ve lu a mi kpa, ityôkyaa ngi i vea tôô akaa a zan ve iyol la tswen ga. Ken msen u Solomon er la lu ôron kwagh u or u civir Aôndo u ishima i mgbegh nan ker ve nan “naregh ave” a nan sha u eren msen hen Yehova a ishima i nan cii la. * Alaghga Solomon umbur shighe u yange ishima za ter na, Davidi iyol kpishi ve ôr kwagh kaa ér: “Haa akaa a zan we iyol cii sha TER” la.—Pasalmi 55:4, 22.

Zum u or er msen hen Yehova a ishima i môm yô, una er nena? Solomon zamber a Yehova ér: “Ungwa Sha, sha ijiir You i teman la, de nan isholibo i nan, na hanma or sha ieren i nan cii.” (Ivur 30) Solomon fa er un u a “ongo msen” la a we mbacivir un jimin cii ikyo yô, man er a we hanma ve asange asange ikyo kpaa yô. (Pasalmi 65:2) Yehova wasen ior nav er i gbe u una wase ve la, man iwasen ne wa mde u Aôndo a den orsholibo u nan hir hen a na a ishima i nan cii la asorabo a nan la kpa ker.—2 Kroniku 6:36-39.

Er nan ve Solomon yange fa dedoo ér Yehova una ungwa mzamber u or u civir un u nan gem ishima laa? Solomon za hemen a msen na la, kaa ér: “Er [we Yehova] U fe ishima i nan yô (gadia ka We tseegh U fa asema a ônov mba iorov ye).” Yehova lan mnyoon shin ican i alaghga hanma or u civir un sha mimi nana lu a mi ken ishima i nan la ga, shi we ikyo sha kwagh u mnyoon u nan u ken ishima la kpaa.—Pasalmi 37:4.

Se fatyô u zuan a msurshima ken msen u Solomon ne. Alaghga uumace er se nahan, vea kav mlu u ken atô u ishima yase la, ‘mvihi wase’ man ‘ican yase’ la vindi vindi ga. (Anzaakaa 14:10) Kpa Yehova fa asema ase, man kwagh wase gba un ishima kpen kpen je. Aluer se er msen hen a na, se pase un er i lu se ken ishima yô, a hemba lun se ican ga u wan ishima a akaa a zan se iyol la. Bibilo kaa a vese ér: “Gema nen ishima i nyian yen la cii, haa nen sha a Na, gadia ka Un A lu koson ne ye.”—1 Peteru 5:7.

[Ngeren u shin kpe]