Bibilo Gem Ior

WANKWASE ugen u teen msôrom hen baa, u yange fa ityuhwanev shi maan msôrom kpishi kua mcimbim ma bom kpaa yô, yange gema uma na nena? Kanyi yange i na ve orpatii ugen u kôr kwaghaôndo ihyom yô hingir or u eren kwaghaôndoo? Ordasenda ugen ken tar u Russia, u lu or u tesen udasenda mbagenev num u nôngon yô, yange hemba mbamzeyol mba nyi ve hingir Orshiada u Yehovaa? Ôr ase kwagh u iorov mba utar mban ve ôr shin heen ne.

“M hide m doo vea ngôm hegen.”—NATALIE HAM

I MAR UN KEN INYOM I: 1965

TAR NA: AUSTRALIA

INJAOR I YANGE LU YÔ: YANGE MAAN MCIMBIM MA BOM

YIASE YAM: M vese hen angar u kiriki ugen u i ker ishu her yô, mba yer gar ne ér Robe. Gar ne ngu ken imbusutariyan i tar u Australia. Uhôtee mba hen agar a kiriki er gar u Robe ne nahan, ka ajiir a ior kpishi ve kumban her yô. Mbamaren mba hen angarev mba kiriki mba banen hen uhôtee ga, nahan ônov vev kpa ka ve hingir u vesen hen ajiir a ior ve me msôrom kpishi kua taav shi ve soo iliam i dang kpaa yô.

Shighe u m kuma anyom 12 la nahan, m hii u man taav, shi m fa ityuhwanev wue wue shi m zuan vea ngôm ga. M va kom anyom 15 yô, mbamaren av kera lu imôngo ga, iwer ngi kar 18 nahan yô, m undu ya. M hunden msôrom shi m maan mcimbim ma bom shi m wa ijimba kpaa. Ishima yange i vihim ker shi m fa kwagh u m lu sha mi jighilii ga. Kpa er m hen num u nôngon kua ityesen i tesen kasev u kuran ayol a ve shighe u or te num sha a ve la kuma anyom ataan yô, m tôô mer me fatyô u nengen sha iyol yam. Nahan cii kpa, shighe u mea lu tswen, mea ngure henen sha kwagh u uma wam yô, m ure kpishi, nahan m gba eren msen hen Aôndo mer a̱ wasem. Mea eren msen yô, m kaa a Aôndo mer “de kaan a mo wer za adua ga.”

Shighe kar yô, boki wam ugen u soo kwaghaôndo kpa gema zaan adua môm ga yô nam Bibilo. Un kpa yange maan mcimbim ma bom er azende a ase agen la nahan. Kpa, gema senge ér un na Aôndo jighjigh a ishima na cii; yange lam a mo ér mo m er batisema, nahan m lumun. Tsô a za a mo hen ber ugen u lu ikyua yô, a za erem batisema shimi. Hii hen shighe la zan zan, m hii u henen mer m ngu ikyua a Aôndo, kôôsôô je. Nahan kpa, mayange je m ôr Bibilo ma shighe môm ga.

GBENDA U BIBILO GEMA UMA WAM LA: Ken inyom i 1988 la, Mbashiada mba Yehova uhar va kuma uwegh sha hunda wam. U môm ken a ve pinem ér “U fa iti i Aôndo kpa?” Tsô a ôrom Pasalmi 83:18 ken Bibilo na, ijiir la kaa ér: “Sha er ve̱ fa er We, u iti You i lu [Yehova, NW] la, i lu We tseegh U lu Uhembansha sha tar cii yô.” Kwagh ne kpiligh mo iyol saa her! Mba yemen cii yô, m mough m naha mato kuma ukilomita 56, m za hen shôôpu  igen i teen ityakerada i Mbakristu, m za tôô mbamgem mba Bibilo mbagenev m nenge hen ivur ne shi m ker iti shon ken dikishenali igen kpaa. Nahan m ne jighjigh mer iti i Aôndo ér Yehova yô, shi m gba henen mer kanyi igen kpa m fe ga.

Ngôm yange vande kaan a mo ér Mbashiada mba Yehova ka ior mba kwagh ve a cimin kpishi yô. Akaa a yange m pande m fa sha kwagh ve la, na yô m hen mer mba soon u biishi a ior ga shi ve fa u ember uma kpaa ga. Nahan m gba henen mer vea hide vea vam inya kwagen yô, me yer. Kpa mba vem inya yô m kera yer ga. M lôhô ve mer ve nyôr ker, maa se hii u henen Bibilo imôngo je.

Hanma kwa u yange a va hen Bibilo a mo yô, m pase ikyeren yam, Craig, kwagh u m hen la. Iyange igen yô, ishima vihi un ker kpishi, tsô a tsuwe takerada u m henen Bibilo a mi la sha ave am kera, a gba ôron u iyol na. A ôr u, ukasua mba kar utar yô, a kure ikyaa ér un zua a mimi sha kwagh u Aôndo kpaa. Shighe kar yô, mo vea Craig se de u man mcimbim ma bom shi se de u man ikyôhô kpishi kpaa, shi tom wam u teen msôrom hen baa la kpa m de u. Er se soo u eren akaa a Bibilo i tese la yô, se nenge ser doo u se vôso ayol a ase.

IWASEN I M ZOUGH A MI LA: Sha shighe u mo vea Craig se hii u henen Bibilo la nahan, se lu nôngon u paven boki. Kpa hegen ne, Craig ngu nomom u fan kwagh kpen kpen, shi se mba a ônov uhar mba doonashe. Heela tseegh ga, se mba a azende a doon se ishima a se civir Aôndo imôngo yô.

Sha hiihii la, er ngôm ungwa ér mo m ngu kohol imôngo vea Mbashiada mba Yehova yô, ishima vihi un a mo. Nahan kpa, ishima vihi un lu sha ci u akaa a i ôr un sha iyol i Mbashiada la. M hide m doo vea ngôm hegen. M kera nengen iyol yam mer m ngu icaverkwase ga. Kpa uma wam gema ngu zan ikyura hegen shi m fa ityôkyaa i m lu uma yô, shi m nenge mer isharen yam i yan ikyar vea Aôndo la kpa m ngu kuren i.—Mateu 5:3.

“M hen akaa kpishi a kpiligh mo iyol ken Bibilo.”—ISAKALA PAENIU

I MAR UN KEN INYOM I: 1939

TAR NA: TUVALU

INJAOR I YANGE LU YÔ: ORPATII

YIASE YAM: I marem ken Nukulaelae, icile i doonashe igen ken tyeku i Pacific la; icile ne hingir vegher u tar u Tuvalu hegen. Upasetô kpishi mba yange ve za makeranta ken kôleeji ugen ken tar u Samoa yô, lu hen ucile mba hen tar wam ne. Ior mba hen ucile mban yange ve tôô ér ka tom ve u koson upasetô kua icombor ve ayange ayange shi nan ve ajiir a tsan kua hanma kwagh u hemban doon cii. Kwaghyan yange una yina ior mban vea icombor ve je kpa, i gba u vea na upasetô mban kwaghyan kpee je.

Pasetô u hen icile yase la yange nengen sha makeranta u hen angar wase la shi tesen kwaghaôndo man ayenge, ashighe agen yô a tese gbaa-kwaghhenen u i yer ér geography la kpaa. M umbur er shighe ugen la pasetô ne gbidye mbayevmakeranta mbagenev coholoo je, ve hingir awambe iyol tseegh yô. Nahan kpa, lu kwagh u or môm tsô nana huna ga, kua mbamaren mba mbayev mban je kpaa. Yange i naan pasetô ne icivir kpishi er ngu Aôndo iyolna nahan.

 Yange m kom anyom pue yô, i za wam ken makeranta u gomoti ken icile igen; lu makeranta u gomoti u ú lu hen ijiir la cii je la. Yange m been makeranta yô, gomoti tôôm tom. Hen shighe la, ucile mban lu sha ikyev i tar u Ingila, i yilan ve ér Gilbert man Ellice. M er tom ken agbaatom kpishi zan zan m va mase hingir orvesen u ipipaabaver i gomoti igen. Hanma kwagh lu zan doo doo zan zan iyange i m gber washika u orgen u ôron ipipaabaver ne nger sha u vaan iyol sha kwagh u inyaregh ki í lu vihin kpishi sha u wan agoyol sha mve u Tor u Ingila la. Or u yange nger washika ne musan iti na, nahan orvesen wam pinem ér mo m pase un iti i or ne jim jim. M venda u ôron un, nahan ior kpishi hingir u ungwan kwagh u ayôôso a ase ne.

Kwagh ne yange er ica gba ga maa m de tom, m nyôr pati. Yange m hemba ishangen ken Nukulaelae, nahan i tsuam m hingir Minista u Nengen sha Kwagh u Kpengaeren man Awen a injaa kua Akaa a injaa a Igbetar agen. Shighe kar yô, gba u ior mba ken icile i Kiribati (i ngise i yilan i ér Gilbert la) man icile i Tuvalu (i ngise i yilan i ér Ellice la) vea zua a tseeneke ve sha ikyev i tar u Ingila, nahan gomna kaa a mo ér un soo veren mo orhemen u icile i Tuvalu la. Nahan kpa, yange m soo mer ior ve de nengen mo ér m ngu or u eren kwagh a msertar u Ingila la ga. Nahan m venda iantom ne; er m lu sha iantom ne ga nahan kpa m gema m kperan ishangen i lun sha ian i vesen ken tar la. M gba ishangen la. Ishangen ngi been yô, m hide m yem ken icile yam vea kwase wam, m za tema shin agar.

GBENDA U BIBILO GEMA UMA WAM LA: Ior mba ken ucile mban cica cii yange ve nengen iyange i lahadi ér ka Iyange i Memen, lu mo tseegh m nengen iyange la nahan ga ye. Mo yô, lu iyange yam i nahan tso shi kôron ishu je la. Yange m soo mer ior ve nengem ér mo ngu or u eren kwaghaôndo ga. Terem yange pasem er ieren yam ne i vihi un kpishi kua mbagenev kpaa yô. Kpa m kange ishima mer mayange me lu ken ma côôci ga.

Ken zende wam ugen u m za ken Funafuti, icile i̱ i̱ lu gartamen u Tuvalu la, anngôm u nomso u kiriki ugen lôhôm mkombo u Mbashiada mba Yehova. Shighe kar yô, Orshiada ugen u eren tom u mishen nam umagazin mba Iyoukura man Awake! kpishi ér mo m za ôr ve. Shi a nam takerada ugen ér m ôr, takerada ne tese wang ér atesen a ucôôci kpishi mba ve senge ér ve mba Mbakristu la due hen mbafanaôndoga. M ôr takerada la kwa imôngo. M hen akaa kpishi a kpiligh mo iyol ken Bibilo, kua kwagh u Bibilo i pase wang ér gba u Mbakristu vea kuran Iyange i Memen ga la. * M pase kwase wam akaa a m lu henen ne nahan fese je maa a de u zan adua.

Nahan cii kpa, m soo mer kwagh môm tsô a̱ zuam a kwaghaôndo ga. Anyom kar kuma er ahar nahan, kpa kwagh u m hen la hungur mo ga. Ken masejime yô, m nger ormishen u ken icile i Funafuti la washika, m pase un ker mer kumam u geman uma wam hegen. Ormishen ne maa mough nyôr tso va sha u va tesen mo Bibilo. Terem fe ér m soo u hingir Orshiada u Yehova yô, ishima vihi un a mo kpishi. Kpa m kaa a na mer, m hen akaa ken Bibilo kpishi sha ikyev i Mbashiada mba Yehova, nahan mo yô ka kwaghaôndo u tsough je ne.

IWASEN I M ZOUGH A MI LA: Ken inyom i 1986 la, i erem batisema m hingir Orshiada u Yehova, inyom kar i môm yô, kwase wam kpa er batisema. Ônov asev mbakasev mba uhar mbara kpa hen kwagh u Bibilo i tese la, nahan ve kpa ve tsua u hingir Mbashiada mba Yehova.

Doom kpishi u lun ken nongo u kwaghaôndo u ú lu a mbahemenev, mba i pav ve i ver kposo a ishamior igen i zan adua ga nahan, man kape Mbakristu mba sha derianyom u hiihii la kpa kwagh ve lu je la. (Mateu 23:8-12) Shi mba dondon ikyav i Yesu a iyol hiden a mi ijime, nahan mba pasen ior kwagh u gomoti u Tartor u Aôndo la. (Mateu 4:17) M sugh Yehova Aôndo kpishi er a nem ian i henen mimi sha kwagh na man sha kwagh u ior nav nahan!

“Mbashiada yange ve kighir mo a ityesen i môm i môm ga.”—ALEXANDER SOSKOV

I MAR UN KEN INYOM I: 1971

TAR NA: RUSSIA

INJAOR I YANGE LU YÔ: OR U TESEN IOR NUM NÔNGON

 YIASE YAM: Yange i marem ken gar u Moscow. Hen shighe la gar ne lu gartamen u tar u Soviet Union. Tsombor wam lu hen iyaagh ki vesen ki gen. Mbawanndor a vese kpishi eren tom imôngo hen ateiwa ugen. M umbur er yange ve saa gban ijir sha kwagh wam, kaan ér mo m ngu wanye u zan iyol kpishi, nahan me kpe iyev shin me yem purusu keng keng yô. Yange m kom anyom pue nahan je tsô m per tindi nahan dasenda kôrom.

M va kom anyom 18 yô, i kighir mo m hingir orshoja u kuran ijootar. Anyom nga kar ahar yô, m hide hen ya. M hii u eren tom ken ateiwa, kpa tom la doom ishima ga. Tsô m za hingir ordasenda u kôron num ken gar u Moscow; m lu or u tesen udasenda mbagenev num u nôngon sha ave. M wasen u kôron mbaiv mba ken gar u Moscow shi yange m za kôron num sha ajiir a i lu eren ayôôso ken tar u Russia cii. Vanger yange a puur mo ker, ishimavihin yam la i lu er iyôgh ki ka a hure ki a̱ pase ve ki tsue tuaang nahan. Yange mea za hide hen ya yô, ashighe agen m tsa sha gambe môm vea kwase wam ga; i lum er me yav sha gambe môm vea na yô me vihi un iyol ken mnya nahan.

GBENDA U BIBILO GEMA UMA WAM LA: Yange m hiin u henen Bibilo vea Mbashiada mba Yehova yô, m mase nengen mer uma u eren ipila u m lu a mi la zua sha kwagh u Bibilo i̱ tese ga. Shi m nenge kpaa mer doo u me de u man taav shi me pande msôrom. Nahan kpa, m hen mer me fatyô u den tom wam la ga, sha ci u m lu a ma tomavee u me eren me koson tsombor wam ga. Shi m lu henen mer me fatyô u zenden pasen ior kwaghaôndo er Mbashiada mba Yehova ve eren nahan ga.

Shighe kar yô, m hingir u nan jighjigh mer kwagh u i nger ken Bibilo la cii ngu vough. Kwagh u i nger ken Esekiel 18:21, 22 la surum ishima kpishi. Ijiir la kaa ér: “Aluer iferor nana gema á undu asorabo a nan cii, a nan lu eren la [yô] . . . , á kera umbur ma iferkwagh i môm i nan er ga.”

Doom kpishi er Mbashiada yange ve kighir mo a ityesen i môm i môm ga, kpa ve gema ve tôv sha akaa a m lu henen la vea mo nahan. Yange m kohol umagazin vev kuma er 40 shin hemba nahan, m ôr ve cica cii ken atô u kasua utar. Kwagh u m hen ken umagazin mban ne na yô, m na jighjigh mer m zua a kwaghaôndo u mimi.

IWASEN I M ZOUGH A MI LA: Cii man m hii u henen Bibilo yô, mo vea kwase wam se lu nôngon u paven ivaa yase la. Kpa ivaa yase doo hegen. Kwase wam yange kohol mo se hii u henen Bibilo imôngo, shi se tsua ser se civir Yehova imôngo. Hemba saan tsombor wase iyol hegen. Shi yange m hide m zua a tom ugen u ú hendan a atindi a Bibilo ga yô.

Shighe u m hii u pasen kwaghaôndo sha uya uya la, ishima i nyian mo kpishi, i lum ken ishima vough er yange i lum shighe u sea soo u za ta num sha ma ijiir nahan. Hegen ne ishima ka i gbam shimi, zum u or soo u hiin mo iyongo je kpaa. M hen u wan ishima a ior kure kure. Vihim kpishi er yange m vihi shighe kpishi sha ugbilinmbaakaav nahan, kpa gema doom hegen er m lu eren kwagh u injaa a uma wam nahan. Doom u eren Yehova Aôndo tom a agee am cii shi doom u wasen mbagenev kpaa.

[Ngeren u shin kpe]