Kporom Hen Aôndo

“Umbur Mo Aôndo Wam, Verem Doo Doo”

KWASEKRISTU ugen u civir Aôndo sha jighjigh, u yange nenge ér un gba kwagh môm môm ga yô, nger ér: “M hen mer Yehova fa anza am vindi vindi, nahan a tsa sha won kpa me doo un ishima, shin una lumun mo ga.” We kpa ishima vande zan we iyol nahanaa? U hen wer u gba kwagh sha ishigh ki Aôndo ga, nahan a tsa kpa una lumun we ga shinii? Aluer ka nahan yô, alaghga u zua a ishimataver ken mkaanem ma i nger ken takerada u Nehemia 13:31 la.

Nehemia, u lu gomna u Mbayuda ken derianyom u sha utaan Cii man Shighe u Yesu la, yange nôngo sha afatyô na cii ér una er ishima i Aôndo. Yange hemen Mbaiserael gbenda u hiden maan girgar u Yerusalem, shin er mbaihyomov hendan a ve kpoghuloo nahan kpaa. Yange ver ishima ér hanma or kura atindi a Aôndo, shi yima mba i lu kighir ve la, shi hide maa jighjigh u nan u ior nav Mbaiserael. Aôndo yange nenge a kwagh u orjighjigh ne er la je kpa? Yehova yange lumun a Nehemia je he? Se fatyô u zuan a mbamlumun sha mbampin mban ken mkaanem ma masetyô ma i kur takerada u i yer u sha iti na a mi la.

Nehemia er msen wener: “Umbur mo Aôndo wam, verem doo doo.” * Ishima yange i za Nehemia iyol ér Aôndo una nenge a aeren a na a dedoo la ga, shin Aôndo una hungur a na shinii? Mayange ga. A̱ shi nan kpa, Nehemia yange una fa kwagh u mbangeren Bibilo mba tsuaa mbara vande ôron sha u pasen er ka i doo Yehova a mba ve civir un sha jighjigh kua akaa a dedoo a ve er la yô. (Ekesodu 32:32, 33; Pasalmi 56:8) Nahan yô, kanyi yange lu sônon Aôndo ér a̱ ere? Takerada ugen kaa ér, ishember i ken zwa Heberu i í gem ér “umbur” la, inja i i̱ yô “ka u or eren kwagh u a doo nan ishima, u a hungur nan ga la.” Er Nehemia fa er msen a lu a tahav yô, lu sônon Aôndo ér a̱ umbur un sha gbenda u tesen ér doo un a na shi a̱ ver un doo doo kpaa.—Nehemia 2:4.

Yehova una ungwa msen u Nehemia sôn un ér a umbur un ne je he? Se fatyô u kaan ser, a vande ungwan un kera je. Hiihii yô, mde u Yehova yange de ér msen u Nehemia ne kpa i̱ nger un a̱ lu ken Ruamabera la ka gbenda môm u se fe ser, yange ungwa msen u Nehemia sôn ér, a̱ umbur un sha gbenda u tesen ér doo un a na yô. Nahan kpa, ‘un u a ongo msen’ la shi una seer ungwan msen u Nehemia er a ishima i môm la.—Pasalmi 65:2.

Aôndo shi una va seer nan Nehemia injar sha akaa a dedoo a yange er sha ci u mcivir u mimi la cii. (Mbaheberu 11:6) Ken tar u he u perapera u Yehova a tende zwa u van a mi la, una ver Nehemia doo doo sha u nderen un shin mbakpenev. * (2 Peteru 3:13; Mpase 21:3, 4) Ken tar u he u Nehemia una zua a ian i lun uma gbem sha won ken paradiso shin tar la, una kav ér, mimi je, Yehova umbur un shi a ver un doo doo kpaa.

Msen u Nehemia ne tese mimi u mkaanem ma Tor Davidi yange ôr ne, ér: “U ver orperapera doo doo, TERE, U kase un a mkomshima er ka sha akuvautya nahan.” (Pasalmi 5:12) Mimi je, Aôndo nengen a iniôngon i se nôngon ser se er ishima na la, shi i gba un kwagh kpaa. Aluer u ngu nôngon sha afatyô wou cii wer u civir un yô, lu a vangertiôr wer una umbur we sha gbenda u tesen ér doo un a we shi una ver u doo doo kpaa.

[Ngeren mba shin kpe]