“Loho u Dedoo u Tartor Ne Yô Á Ôr U”

“Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”​—MATEU 24:14.

Inja i Mkaanem Man: Luka u a nger takerada u Ivangeli la kaa ér Yesu “gba zenden nyôron ken agar a tamen man angarev mba kiriki, lu ôron kwaghaôndo, pasen Loho u Dedoo u tartor u Aôndo.” (Luka 8:1) Yesu iyol kaa ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:43) Yange tindi mbahenen nav ér va za pase loho u dedoo ken agar a kiriki man a vesen, shi shighe kar yô, a kaa a ve ér: “Né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.”—Aerenakaa 1:8; Luka 10:1.

Er Mbakristu Mba sha Ayange a Tsuaa Mbara Er Kwagh u Yesu Kaa Ne Yo: Mbahenen mba Yesu yange ve timbir u eren kwagh u Yesu kaa ér ve er ne ga. “Hanma iyange kpaa ve lu gban uwer ga sha u tesen man u ôron ken tempel man ken uya er Yesu ka Kristu.” (Aerenakaa 5:42) Hanmaor ken nongo u Kristu cii pasen kwagh, lu nongo u akpamaior kpuaa tseegh eren nahan ga. Or u timen sha akaa a mbayiase, u i yer un ér Neander la kaa ér: “Or u i yer ér Celsus u yange hii ngeren akaa a dang sha Kwaghaôndo u Mbakristu la, yange naha Mbakristu tar kaa ér ka mbatôndon iyôngo aive man mba sôron akôv man mbahuan akôv a inyam, man mba ve fe takerada cuku kpaa ga shi ve gbe kwagh ga la, ve pasen ivangeli sha gbashima ye.” Orgen u i yer un ér Jean Bernardi yange nger ken takerada na u i yer ér The Early Centuries of the Church la ér: “Yange gba u [Mbakristu] vea za hanma ijiir cii vea za pase kwagh, shi vea lamen a hanmaor cii. Vea pasen kwagh sha akôm a igbenda man agar a vesen man sha ityembekasua man ken uya mba iorov. A ngohol ve shin a ngôhol ve ga kpaa . . . . Lu u vea pase kwagh zan zan a ar sha akighir a tar je.”

Ka Unô Ve Eren Kwagh Ne Nyiana? Pristi u côôci i Anglican ugen, u i yer un ér David Watson yô, nger wener: “Ka er côôci i kanshio u pasen  kwagh shi tesen ior sha gbashima ve nyian ior kpishi ve soo u civir Aôndo ga ye.” Orgen u i yer un ér José Luis Pérez Guadalupe, u a gber takerada u i yer u ér Why Are the Catholics Leaving? la, nger kwagh sha kwagh u ityom i mbaadua mba i yer ve ér Evangelicals man Adventists la, kua mbaadua mbagenev kpaa, ér “mba pasen kwagh sha uya uya ga.” Sha kwagh u Mbashiada mba Yehova yô, a nger ér: “Ka ve zenden sha uya uya ve pasen kwagh.”

Mnenge u mimi man u doon tsung u orgen u i yer un ér Jonathan Turley, i nger ken takerada u i yer ér Cato Supreme Court Review, 2001-2002 la kaa ér: “Ka a ter kwagh u Mbashiada mba Yehova yô, fele je ior kpishi ve hen kwagh u ior mba ve ze sha uya mba iorov sha ashighe a hagher la. Hen Mbashiada mba Yehova yô, u pasen kwagh sha uya uya la, ka di u ôron ior kwagh u jighjigh ve u nan tseegh tsô ga, kpa ka kwagh u hange hange u ve eren sha u taver jighjigh ve u nan yô.”

[Ngeren u kiriki u a lu sha peeji 9 la]

Ka Unô Ve Lu a Aeren a Mbakristu Mba Mimi la Nyiana?

Er ngeren mba se tim sha mi ne ve pase yô, Ruamabera tese ér ka unô ve lu a aeren a Mbakristu mba mimi la nyiana? Er iniongo i kwaghaôndo i i senge ér ka i Mbakristu la i lu udubu imôngo nahan kpa, umbur kwagh u Yesu yange ôr a mbadondon un ne: “Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha yô.” (Mateu 7:21) Aluer u fa mba ve eren ishima i Ter, nahan ve lu a aeren a Mbakristu mba mimi la, shi u ngu kohol a ve imôngo yô, u fatyô u va zuan a averen a tsôron ken Tartor u Aôndo. Se mba lôhôn wer ser pine Mbashiada mba Yehova, mba ve va ne u magazin ne la, ve seer pasen we kwagh u Tartor u Aôndo, kua averen a ua va a mi la.—Luka 4:43.