Ú eren msen hanma shighe kpa? Ior kpishi mba eren, mba ve ne Aôndo jighjigh ga je kpaa. Kpa er nan ve ior ve eren msene? Ken tar u France yô, ashighe agen ior kpishi ka ve er msen shin ve gbidye kwar sha kwagh ér i “saan ve iyol tseegh.” Mba eren msen sha u civir Aôndo ga, er ior kpishi ken veghertar u Yuropa la nahan. Kpa ka ve keren “bemshima u msen a ve a mi la.” Dugh amba ne sha yô, mbananjighjigh mbagenev ka ve er msen hen shighe u kwagh a gbe ve la tseegh, shi ve soo ér Aôndo a na ve kwagh u ve sen un la her ave ave je.—Yesaia 26:16.

We di ye? U nenge wer msen ka gbenda u wasen we u henen sha kwagh tsembelee di tsô shinii? Wea lu or u ú ne Aôndo jighjigh yô, u ngu nengen a iwasen i msen ken uma wou kpa? Shin u nenge wer ka wea er msen kpa u zough a kwagh u u sen la sha won ga? Bibilo ia wase u u nengen er msen a lu kwagh u nan or mpeveryol tseegh tsô ga, kpa a lu gbenda u vesen u kporom hen Aôndo yô.