Bibilo ka takerada u u tse kpishi yô. U tsa kuma shighe nena? Yange i hii u ngeren Bibilo shighe u shi anyom er 1513 u a mar Yesu la. Ken tar u China yô, lu shighe u tsombor u tor u i yilan un ér Shang la yaan tor u China la. Shi yange i hii u ngeren Bibilo anyom kar 1000 cii i va hii Kwaghaôndo u Mbabuda ken tar u India ye.—Nenge ngeren u a lu a itinekwagh ér, “ Akaa a I Doo u Se Fa sha Kwagh u Bibilo Yô,” la.

Saa takerada ua lu sha inja i ior vea ôr a kav shi ua gba ve kwagh ve, vea dondo ityesen i u ye. Bibilo ka imba takerada la. I̱ na mbamlumun mba kuman sha mbampin mba ve hembe lun a inja ken uma cii la.

U tesen ikyav yô, alaghga ka u pine wer, ‘Ityôkyaa i se lu uma jim yô ka nyi?’ Ior ndera keren mlumun sha mpin ne anyom udubu imôngo, man zan zan hegen kpa mba a zua a mi ga. Nahan kpa, se fatyô u zuan a mlumun sha mpin ne ken ityough ki hiihii man ki sha uhar ken takerada u hiihii ken Bibilo, u i yer ér Genese la. Ken mtom ma Genese mara, Bibilo pase kwagh u “sha hiihii” la je hii lun kuma anyom ubiliôn imôngo yô. Lu usha, kua asan man azuku-asan man tar u se tem sha u ne. (Genese 1:1) Bibilo er nahan cii yô, maa i pase akaa a yange i er ve tar hingir ijiir i akaauma lun sha mi la, sha adondo adondo. I̱ pase er yange akaauma anza kposo kposo hingir u lun yô, kua uumace kpaa, shi i̱ pase ityôkyaa i akaa ne cii a lu yô.

Bibilo ngi a kwaghwan u injaa ua wasen se u sôron mbamzeyol mba se tagher a mi ayange ayange la yô. Kwaghwan la taver u kaven ga. A taver ga sha atôakyaa ahar.

Hiihii yô, kwaghôron u Bibilo ngu wang, shi ngu jighilii, shi a kôr ken ishima. I nger Bibilo sha asember kpishi a a gande mkav wase shin sha asember a pasen akaa a se nengen a mi noon ga la ga, kpa i nger i sha asember man akaa a se fe yô. Akaa a a taver u kaven la je kpa i nger a sha asember a sha akaa a se fe shin se nengen a mi ayange ayange la.

Ikyav i tesen yô, Yesu yange ôr anzaakaa a taver ga sha akaa a ior ve fe shin ve nengen a mi ayange ayange la, sha u tesen ve kwagh er a kôr ve ken ishima yô. Anzaakaa kpishi nga ken kwaghôron na u ior kpishi ve yer ér Ityesen i sha Uwo, u i nger ken ityough 5 zan zan 7 ki takerada u ken Bibilo u i yer ér Mateu la. Orgen u pasen asember a ken Bibilo yange yila ityesen i Yesu ne ér “kwaghôron u wasen ior” shi nenge ér i ôr se akaa la “sha u se seer mfe tseegh tsô ga, kpa ka sha u se dondo  akaa la, nahan se eren kwagh sha tindi.” U fatyô u ôron mtom mara been ken atô u miniti 15 zan zan 20, nahan a kpiligh we iyol u nengen ér mkaanem ma Yesu mara ma taver u kaven ga, kpa ma gem ma lu a tahav kpishi yô.

Kwagh u sha uhar u a ne ve Bibilo i taver u kaven ga yô, ka akaa a Bibilo i er kwagh sha mi la. Bibilo ka takerada u ukwaghhir shin kwaghalôm ga. Kpa er takerada u i yer ér The World Book Encyclopedia la u kaa nahan, Bibilo hemba ôron “kwagh u ior mba duen ati man mba sha kwarkyaa ga, kua ityom ve, man ishimaverenkeghen ve, kua akaa a yange ve er, man a ve fatyô u eren ga la.” Taver se u ôron akaa a i nger sha kwagh u ior mba ngise mbara man akaa a yange er sha ayange a ve la ga, shi taver u kaven ityesen i i lu ker la kpaa ga.—Mbaromanu 15:4.

Saa a gber takerada ken zwa u u fe la ve, u ôr u, u kav ye. Nyian ne, ikyav tese ér Bibilo ngi ken zwa u u fatyô u ôron i kaven yô, wea lu han han shin wea due ken hanma tar kpaa. Nenge er i hii ve kwagh a fetyô u lun nahan yô.

Mgem u Bibilo. Yange i hii ngeren Bibilo ken zwa Heberu man zwa Aramic man zwa Grika. Nahan lu ior mbalamen ijô ne tseegh faantyô u ôron i ye. Yange mbagemankwagh mba tseen ishima nôngo kpoghuloo gema Bibilo ken ijô igen kpaa. Iniôngon ve la wase kpishi, nahan hegen i gema Bibilo jimin cii shin avegher a i ken ijô i kuman er 2,700 nahan. Kwagh ne tese ér ior mba hemban iyenge sha tar vea fatyô u ôron Bibilo ken zwa u i yese ve a mi la.

Mgber u Bibilo. Akaa a yange i hii ngeren Bibilo a mi, er akôv a inyam man ityakerada i i er sha papiru nahan, lu akaa a ngôôr vihin ga. Nahan yange aa yaan tsegh yô, i gba u a dugh kwagh u i nger kimi la a hide a nger ken akôv a inyam shin ityakerada i papiru i he, sha er loho la ua saa ga yô. Ukôpi mbara yange ve taver ishe kpishi, nahan lu ior kpuaa tseegh faantyô u yamen ye. Kpa orgen u i yilan un ér Gutenberg yô yange va due a ikyekye i gberen ityakerada, anyom kar hemba 550 hegen. Kwagh la wase u seer samber a Bibilo sha tar kpishi. Kwaghtôvon ugen tese ér, i samber a Bibilo jimin man avegher a i hemba ukôpi ubiliôn utaan.

Ma takerada u kwaghaôndo ugen môm kpa i samber a mi er Bibilo nahan ga. Kwagh ne tese wang je ér, Bibilo ka takerada u i doo u u ôr, u kav yô. Nahan kpa, u ôron i kaven la ka kwagh u cuku ga. Kpa u fatyô u zuan a iwasen. U zua a mi hana? Man u zua a mtsera ker nena? Ôr ngeren u a dondo ne tsô u fa.