Ken washika u apostoli Paulu u Aôndo mgbegha un nger hen Titu la, Paulu kaa ér agumaior, kua Titu kpaa, ve nôngo ve lu “ikyav i tesen sha aeren a dedoo.” (Ti 2:6, 7) Ken mkur u ityough kin ne la, a tese ér i wanger ior mba Yehova sha er vea fatyô u lun mba “asema a tsee ve u eren akaa a dedoo” yô. (Ti 2:14) Tom u pasen shi tesen ior kwagh u Tartor u Aôndo la, ka môm ken akaa a dedoo shon. Aluer u ngu gumor yô, u fatyô u eren tom a gbong gbong wou u iyolough la u eren ishuen pania shin pania u keke la je he?—Anz 20:29.

Aluer u soo u eren pania yô, sôr akaa ken uma wou ver vough sha er u fatyô u eren nahan yô. (Lu 14:28-30) Ikyav i tesen yô, aluer u ngu eren tom u pasen kwagh hanma shighe la nahan, u zuan a inyaregh ki kuren mbamgbe ou nena? U er nan ve u naan ahwa a i gbe u mbaeren pania vea naan laa? Sôn Yehova ken msen a wase u. (Ps 37:5) Lam vea mbamaren ou sha kwagh u u soo u eren ne, kua mba ve fetyô u eren pania la kpaa. Maa er akaa a a wase u u kuren awashima wou la. Yehova una ver ishimatseen man iniôngon you i u lu tesen ken mcivir na la keng, a bunde ga!

NENGE VIDIO I AGUMAIOR NGA NAN YEHOVA ICIVIR LA, MAA NA MLUMUN SHA MBAMPIN MBA VE DONDO NE:

• Ka mbamtaver mba nyi mbagen ve hembe sha er vea lu upania, man ve hemba ve nena?

• Mbamaren vea fatyô u wasen mbayev vev u hingir upania nena?

• Ka hange hange u veren ashighe a duen kwaghpasen sha ci u nyi?

• Mba ken tiônnongo vea fatyô u taver pania ishima shi wasen nan nena?

• Ka averen a nyi mba ve lu upania la ka ve zua a mini?