Paulu man Shila yange ve wa icam ve wuese Aôndo shighe u ve lu ken purusu la. (Aer 16:25) Sha ayange ne kpa, shighe u mbacivir Yehova a vese imôngo lu ken afo a mbakwarev a Mbanazi hen gar u Sachsenhausen, ken tar u Jamani la kpa ve wa atsam a Tartor, kua mba i yem a ve uikyangen ken Siberia la. Akav ne tese er atsam a lu a tahav mbu taver Mbakristu mba ve lu tagher a atsan la ishima yô.

Ica a gba ga je tsô ijô igen kpishi ia zua a takerada u atsam u he, u ú lu a itinekwagh ér “Sing Out Joyfully” to Jehovah (Wa Yehova Icam sha “Iember”) la. Se zuan a kôpi wase u atsam ne je, doo u se henen a shighe u se lu eren mcivir u hen tsombor la, sha er se kôr a yô. (Ef 5:19) Se er nahan yô, icighan jijingi una wase se u umbur a shighe u se tagher a atsan yô. Atsam a Tartor a a fatyô u wasen se u veren ishima sha ishimaverenkeghen yase. Shi a a fatyô u wasen se shighe u se tagher akaa karen jighjigh wase yô. Heela tseegh ga shighe u i saan se iyol yô, ishima ka i mgbegha se u wan atsam a sagher iyol a nga a na se iember tsung la ‘taver taver . . . a amo a iember.’ (1Kr 15:16; Ps 33:1-3) Yô, se nôngo nen sha afatyô wase cii se waan nen atsam ase a Tartor ne saan saan!

NENGE VIDIO I ICAM I YANGE I TAVER MBATOMOV ASEMA LA, MAA NA MLUMUN SHA MBAMPIN MBA VE DONDO NE:

• Ka nyi yange i na ve Anmgbian Frost hingir u dughun icama?

• Icam la yange i taver anmgbianev mba ken afo a mbakwarev a ken gar u Sachsenhausen la ishima nena?

• Ka akaa a nyi se tagher a mi ayange ayange aa atsam a Tartor ne aa fatyô u taver se?

• Ka hanma atsam a Tartor nahan u soo wer u hen u kôr ken ityou?