Yesu yange kaa a mbadondon un ér ve za gema ior ve hingir mbahenen. (Mt 28:19) Kwagh ne wa u pasen ior kwagh shi tesen ve. Nahan doo u se pinen ayol ase sha ashighe ashighe ser, ‘Me er nan ve me seer fan igbenda i hange hange i geman ior hingir mbahenen nee?’

Gba u se keghen ser ior ve va hen a vese ga, kpa gba u se keren ior mba ‘injaav’ sha gbashima. (Mt 10:11) Ka sea due kwaghpasen nahan, se mba keghen a keghen iyol u lamen a ior mba se ‘kohol ve’ la kpa? (Aer 17:17) Er apostoli Paulu pase Lidia kwagh sha gbashima yô, a hingir orhenen.—Aer 16:13-15.

TESE VIDIO I ZA HEMEN U PASEN KWAGH SHIGHE U IAN I DUGH MAN SHA UYA UYA A “UWER GBAN SHIO” LA, MAA NA MBAMLUMUN SHA MBAMPIN MBA VE DONDO NE:

• Samuel yange tese ér un ngu lôôn ivor i mimi sha gbashima, zum u una eren akaa na ayange ayange la nena?

• Gba u se taver ishima se pasen kwagh sha hanma gbenda cii sha ci u nyi?

• Ka unô u fatyô u pasen ve loho u Tartor la, shighe u u lu eren akaa ou a ayange ayange laa?

Aluer se soo u geman ior ve hingir mbahenen yô, gba hange hange u se er kwagh a hemba di u nan ve ityakerada tsô la. Gba u se hiden se za sôron ve shi se henen Bibilo a ve sha er se wase ve vea vese ken jijingi yô. (1Kor 3:6-9) Nahan kpa, aluer se nôngo kwagh kpoghuloo ser se tese or mimi sha kwagh u Tartor, kpa mbamtsera due ker kpishi ga ye? (Mt 13:19-22) Gba u se za hemen u keren mba asema a ve a lu er ka “inya i dedoo” la.—Mt 13:23; Aer 13:48.

TESE VIDIO I ZA HEMEN U PASEN KWAGH KEN IGBAR SHI GEMA IOR VE HINGIR MBAHENEN A “UWER GBAN SHIO” LA, MAA NA MBAMLUMUN SHA MBAMPIN MBA VE DONDO NE:

• Solomon man Mary yange ve ur ivor i mimi i i lu ken ishima i Ezekiel man Abigail la nena?

• Ka nyi i gbe u ia lu a washima wase shighe u se lu pasen kwagh sha hanma gbenda cii, kua kwaghpasen u ken igbar laa?

• Se fatyô u hemban nan ishima sha tom u tesen mbagenev mimi la nena?