Hii inyom ne je, se hemba lun a shighe u wan agoyol u umbur ku u Kristu. Aluer Ku-Umbur u Yesu gba sha iyange i Hiitom shin Tomahar shin Tomatar shin Tomanyiin gayô Tomataan ken ma kasua yô, a kera er Mkombo u Uma Wase man Tom Wase ken kasua la ga. Aluer Ku-Umbur u Yesu gba sha iyange i Sati shin Lahadi ken ma kasua yô, a kera na kwaghôron u ken igbar ken kasua la ga, shi a hen Iyoukura kpaa ga. U fatyô u sôron akaa veren, sha er u hemba eren tom a shighe u i seer ne je he? Gba u u sôr akaa u ver vough vough sha ci u mkombo u injaa ne, er sha ayange a mbaapostoli la kpa lu nahan. (Lu 22:7-13; km 3/15 1) Akaa agen kpa nga a i gbe u se er sha er se hemba zuan a mtsera ken mkombo ne yô. Se er kwagh ne nena?

• Hen er u za mkombo ne ve a wase u yô.—1Kor 11:23-26

• Er msen shi hen sha kwagh u mlu wou a Yehova.—1Kor 11:27-29; 2Kor 13:5

• Ôr shi gbidye kwar sha avur a Ruamabera a a pase er Ku-Umbur u Yesu u lu a inja yô.—Yoh 3:16; 15:13

Mbapasenkwagh mbagenev ka ve ôr shi ve gbidye kwar sha Bibilo i ôron sha shighe u umbur u ku u Yesu, i i tese ken antakerada U Timen ken Ruamabera Ayange Ayange la. Mbagenev ka ve ôr avur a Bibilo a a lu ken caate ne la. Mbagen di ka ve hide ve ôr ngeren mba Iyoukura mba ve pase kwagh u Ku-Umbur u Yesu kua dooshima u Yehova man Yesu ve tese se la. Hanma gbenda u henen kwagh u u tsough cii yô, u wase u u seer kporom ikyua a Yehova man Wan na.