Hii nan ve mbamkohol mba vesen mba i eren hanma inyom la ka ve na i saan se iyol yumu? Er sha ayange a Mbaiserael la kpa lu nahan, mbamkohol asev mba vesen ka ve bugh se aan a civir Yehova vea anmgbianev asev uderi uderi, shin udubu udubu je kpaa. Akaa a doon a ka i ôr se la nga a wase se u lun kôôsôô a Yehova. Ka se zua a shighe u lun vea icombor yase man azende ase nahan i saan se iyol. Er mbamkohol mban ve lun se a inja kpishi nahan yô, ka se nôngo se za sha ayange a atar la cii.

Shighe u se zough a ian i kohol imôngo yô, doo u se ker u eren kwagh sha ci u mtsera wase tseegh ga, kpa se henen sha igbenda i se fatyô u tesen mbagenev dooshima la kpaa. (Ga 6:10; Heb 10:24, 25) Aluer se bugh anmgbian u nomso shin u kwase hunda, shin se tsôr mkônom ma se tema sha mi la tseegh yô, a tese ér se mba keren mtsera u mbagenev kpaa. (Fil 2:3, 4) Mbamkohol mba vesen shi ka ve bugh se aan a injaa a zuan a azende a he. Zum u i bee mkohol shin cii man i hii mkohol gayô shighe u i dugh ahumbe la cii, awashima wase i lu u lamen a ma or u se lu a vande fan nan ga yô, sha er se seer fan ayol yô. (2Ko 6:13) Azende a ka se kôr sha mbamkohol mban la aa fatyô u lun azende ase gbem sha won! Kwagh u hemban cii yô, zum u mbagenev ve nenge a dooshima wase u mimi la yô, alaghga vea va civir Yehova a vese imôngo.—Yh 13:35.

NENGE VIDIO I “DOOSHIMA BEEN MAYANGE GA”! MBAMKOHOL MBA ITYAR I ITYAR LA, MAA NA MLUMUN SHA MBAMPIN MBA VE DONDO NE:

• Yange i tese anmgbianev mba i tsua ve ér ve za mbamkohol mba ityar i ityar ken inyom i 2019 la dooshima nena?

• Er nan ve mzough man dooshima u ior mba Yehova ve lu a mi la a kpilighyol yumu?

• Mbahemenev mba Shin Itine yange ve tese dooshima u Mbakristu la nena?

• Dooshima u Mbakristu la yange wase anmgbianev mba ken tar u Jamani man South Korea u lun ken mzough nena?

• Ka nyi i gbe u se kange ishima u eren?