Mkaanem ma Aôndo ma a fatyô u geman uma wase. (Heb 4:12) Nahan kpa, saa se na jighjigh ser Bibilo ka “mkaanem ma Aôndo” ve ia kura se shi ia tese se kwagh u se er shi ia wa se kwagh ye. (1Te 2:13) Se er nena ve jighjigh u se ne Bibilo la una seer tavera?

Ôron Bibilo kpuaa hanma iyange. Er u lu ôron la, nenge akav a a tese wang ér ka Yehova a nger i yô. Ikyav i tesen yô, time sha kwaghwan u a lu ken Anzaakaa la, shi nenge er kwaghfan u ker la a zough sha mbamlu asev nyian yô.—Anz 13:20; 14:30.

Hii u henen Bibilo. Nôngo fa akav a a tese wang ér lu icighan jijingi mgbegha ior ve nger Bibilo yô. Za sha itinekwagh i “Bibilo” maa nenge ngeren u “Ka Aôndo A Ne I nger Ye” la, ken Takerada u Tôvon sha Kwagh ú Mbashiada mba Yehova la. Shi u fatyô u seer taver jighjigh u u ne we loho u Bibilo gema ga la sha u timen ken ngeren u a lu ken Takerada u Wasen We u Henen Mkaanem ma Aôndo sha itinekwagh i “Loho u Bibilo” la.

NENGE VIDIO I ER I HII VE SE NE JIGHJIGH . . . A MKAANEM MA AÔNDO YÔ LA, MAA NA MLUMUN SHA MBAMPIN MBA VE DONDO NE:

• Kwaghkpelan u yange i zua a mi sha kpekpe u tempel ugen ken gar u Karnak ken tar u Igipiti la tese mimi u Mkaanem ma Aôndo nena?

  Mlumun wou

• Er nan se fe ser loho u Bibilo la gema ga?

  Mlumun wou

• Er i hii ve Bibilo i lu her zan zan nyian ne tese ér ngi Mkaanem ma Aôndo nena?—Ôr Yesaia 40:8

  Mlumun wou