Ken uwer u Setemba ne, se nôngo nen sha afatyô wase cii se hii Bibilo i henen a ior sha hanma ya ken antakeda u Lu Uma Gbem! la. Mbapasenkwagh vea fatyô u eren ishuen pania nan ahwa 30. Se er kyampen i vesen ne nena?

• Zum u U Hii Zuan a Or Yô: Er tom a ngeren u ken ijime u antakeda ne sha u kenden isharen i or, maa tese nan er ka se hen Bibilo a ior yô. De hungur ior mba yange u lamen a ve la ga, kua mba yange u sôron ve la. Yange vea venda u henen Bibilo kpa, alaghga gbenda u he u henen kwagh a ior ne ua doo ve kua antakeda u he ne cii. Aluer u za hen ya man or ngu ga yô, de veren antakeda ne her ga. Shi aluer or tese isharen ga yô, de we antakeda ne ken washika tindin nan a mi ga. Kômatii u Nengen sha Tomshiren ken Tiônnongo una fatyô u seer ayange a duen kwaghpasen ken uwer shon.

• Aan Agen: Aluer tiônnongo wou eren tom a ikyekye i tuur ityakeda yô, wa antakeda u Lu Uma Gbem! la kpa shimi. Pase or u i sar nan u ôron antakeda ne la wer, aluer nan soo yô u hen Bibilo a nan gbilin. Tese nan er se henen Bibilo a ior yô kpase, gayô er nahan shighe ugen. Ortamen u nengen sha tomshiren una fatyô u tsuan mba ve fe u pasen kwagh tsembelee yô, ér ve za hii Bibilo i henen a ior sha ajiir a i eren kpenga yô. Shi u fatyô u hiin Bibilo i henen a mba u eren tom vea ve shin mba yange u pase ve kwagh shighe u ian due yô.

Yesu yange wa se tindi ér, ‘za gema nen ior ve hingir mbahenen,’ “tesen nen ve.” (Mt 28:19, 20) Sha nahan yô, kyampen i vesen i se lu eren a antakeda u Lu Uma Gbem! ne, i wase se u eren kwagh ne.