Ka sea tsua akaa a se er sha u civir Yehova yô, se hemba eren tom a agee ase sha inja. (1 Ko 9:26) Mkur u tar ne kera shi ica ga, nahan akaa a se tsough u eren la ka a wase se u eren tom a shighe u a mase shin ne sha inja. (Ef 5:15, 16) Shighe u ne tem u eren mcivir u hen tsombor yô, ne fatyô u tsuan akaa a ne er ken inyom i tom i i lu van ne yô. Antakeda u mkombo ne una fatyô u wasen we, sha ci u ngu a ngeren mba ve pase akaa a u fatyô u eren msen sha mi nahan tsuan u eren yô.—Yak 1:5.

Ikyav i tesen yô, mba hen tsombor vea fatyô u wasen or môm sha er nana er pania u keke yô. Aluer u nenge wer u fatyô u nan ahwa la ga yô, pine upania mba mlu ve a zough a u wou yô. (Anz 15:22) Gayô pine ma pania shighe u u lu eren mcivir u hen tsombor yô. Maa nger ashighe a u duen kwaghpasen yô. Yange wea vande eren pania yô, hide gbidye kwar nenge aluer mlu wou gema sha inja i u fatyô u hiden eren pania hegen yô.

Mbagen hen tsombor wou vea fatyô u eren ishuen pania uwer môm shin a hemba nahan kpa? Aluer tahav ou kuma ga je kpa, u fatyô u eren ishuen pania sha u pasen kwagh ahwa kpuaa hanma iyange. Wea duen kwaghpasen sha Lahadi man Sati tseegh sha ci u u yaren tom shin u ze makeranta je kpa, u fatyô u tsuan uwer u u lu a memyol ker, gayô uwer u u lu a ukasua utaan yô. Nger shighe u u soo u eren ishuen pania la sha kalenda, shi nger ayange kua ashighe a u duen kwaghpasen la kpaa.—Anz 21:5.

NENGE VIDIO I TAVER ISHIMA . . . PANIA LA, MAA NA MLUMUN SHA MPIN NE:

• Ikyav i anmgbian u kwase Aamand la tese se ér, upania mba ve de akaa a kar ve la ve doo Yehova ishima shi nengen sha a ve nena?