Kwagh u a lu mhôônom yô, ka u kaven er i lu ior mbagenev ken ishima la, shi fan akaa a a lu ve a inja la man mbamgbe vev kpaa. Ka i lu ican ga u fan or u mhôônom ma ker nan a mbagenev yô, shi ka mhôônom ka ma mgbegha or ve nan wase mbagenev ye. Ka sea zungwen ior mhôônom shighe u se dugh kwaghpasen yô, se dondon aeren a Yehova a nga a ulugh ior a va a mi hen a na la, ka dooshima man ieren i kundu kundu je la.—Fil 2:4.

U zungwen mhôônom la ka di gbenda ugen u tesen ior tsô ga; ka se tese ser mhôônom kôr se a ior sha u lamen a ve kundu kundu shi keghen ato a ve shighe u ve lu lamen la, man sha aeren a ase jimin cii. Kwagh u or ka una gba se ishima sha mimi yô, i tese ér mhôônom kôr se a nan. Akaa a nan ne jighjigh a mi kua mlu u nan man akaa a a doo nan la cii ka se ver ishima shami. Ka se ôr nan akaa a aa wase nan yô, kpa se mba kighir nan ser nana gema ga. Ka sea pase ior kwagh man vea lumun a loho u se pase ve la yô, se seer zuan a msaanyol ken tom ne.

NENGE VIDIO I EREN TOM U GEMAN IOR HINGIR MBAHENEN LA ER A SAAN WE IYOL YÔ—SEER FAN IGBENDA I PASEN KWAGH—MHÔÔNOM MA KÔRON WE A IOR, MAA NA MLUMUN SHA MBAMPIN MBA VE DONDO NE:

• Neeta tese ér mhôônom kôr un a Jade shighe u Jade a ve mkombo faa ga la nena?

• Shighe u Jade a kaa ér un vôr una fatyô u henen kwagh ga la, Neeta tese ér mhôônom kôr un a na nena?

• Shighe u Jade a kaa ér un fa u sôron akaa veren tsembelee ga la, Neeta tese ér mhôônom kôr un a na nena?