Ka i sar mbamaren mba ve cie Aôndo la u nengen ér mbayev vev vese hingir mbacivir Yehova sha mimi. Mbamaren vea fatyô u wasen ve u eren kwagh ne, sha u tesen ve akaawan a Bibilo sha gbenda u a kôr ve ken ishima yô, hii iyev je. (Dut 6:7; Anz 22:6) Kwagh ne tese ér gba u vea de akaa agen a a kar vee? Een, gba u vea er nahan je ka u henen a hen ga! Nahan kpa, mbamtsera mba vea zua a mi la, hemba akaa a ve de a kar ve la.—3Yoh 4. Mbamaren vea fatyô u henen akaa kpishi ken Yosev man Maria. ‘Hanma inyom ve zaan ken Yerusalem sha shighe u iniongo i Paseka’ la, shin er yange i gba u vea nôngo kwagh shi vea vihi inyaregh nahan kpaa. (Lu 2:41) Ikyav tese ér, ve ver mbamgbe mba ken jijingi mba tsombor ve hiihii. Nyian ne kpa, mbamaren vea fatyô u tesen mbayev vev gbenda u vough u vea za yô, sha u eren tom a hanma ian cii u tesen ve sha mkaan man sha ieren.—Ps 127:3-5.

NENGE VIDIO I VE ER TOM A HANMA IAN I I DUGH CII LA, MAA NA MLUMUN SHA MBAMPIN MBA VE DONDO NE:

• Jon Schiller vea kwase na Sharon yange ve ver akaa a Tartor hiihii shighe u ve lu yesen tsombor ve la nena?

• Er nan i gbe hange hange u mbamaren vea tsahan hanma wanye ve sha gbenda kposo?

• Mbamaren vea fatyô u wan mbayev vev agoyol u tilen dông shighe u ve tagher a akaa a karen jighjigh ve nena?

• Ka ikyav mbi tomough mbi nongo u Yehova mbi nyi nahan u er tom a mi u wasen mbayev ou sha u ve vese ken jijingi?