Se mba a anmgbianev mba nomso man mba kasev ken atôônanongo a ase mba ve civir Yehova anyom imôngo yô. Se fatyô u henen kwagh ken ikyav ve i suur sha Yehova dông la. Se fatyô u pinen ve kwagh u yiase i nongo u Yehova, kua mbamtaver mba yange ve tagher a mi kpa ve hemba ve sha iwasen i Yehova yô. Se fatyô u lôhôn ve, ve ôr se akaa a a er ve la shighe u se lu eren Mcivir u hen Tsombor aikighe je kpaa.

Aluer u ngu Orkristu u u civir Yehova anyom imôngo yô, kegh iyol u pasen jighjigh wou u nan hen Mbakristu mba ve lu agumaior la. Yakob man Yosev yange ve ôron ônov vev akaa a a er ve yô. (Ge 48:21, 22; 50:24, 25) Shi shighe kar yô, Yehova kaa a mbayaav ér ve ôron mbayev vev kwagh u ityom na i kpilighyol la. (Dut 4:9, 10; Ps 78:4-7) Nyian ne, mbamaren man mbagenev ken tiônnongo vea fatyô u ôron agumaior akaa a kpilighyol a ve nenge Yehova a er sha ikyev i nongo na yô.

NENGE VIDIO I A LU TÔVON SE A ICAN JE KPA, LU KEN MZOUGH LA, MAA NA MLUMUN SHA MBAMPIN MBA VE DONDO NE:

• Branci u ken tar u Austria yange wase anmgbianev asev mba ken ityar igen i i cir tom wase ker la nena?

• Anmgbianev mba ken ityar ne yange za hemen u taver jighjigh u nan ve nena?

• Mbapasenkwagh kpishi ken tar u Romania yange ve undu nongo u Yehova sha ci u nyi, man ve va hide nena?

• Akaa a a er ne, taver jighjigh wase u nan nena?