Uaahe mba hemban eren ayange ne cii. Nahan shighe u kwagh a er nahan yô, ka i gba a sôr akaa sha inja sha er a fatyô u wasen mba kwagh a tser ve la yô. Sha nahan yô, Mbahemenev mba Shin Itine ver Gbaatom u Nan Anmgbianev mba Aahe a Er Ve la Iwasen sha hanma branci.

Mba ve eren tom ken gbaatom ne ka vea faan ér ma aahe er je, ve lam a mbatamen mba hen ijiir shon fese sha er vea fa igbenda i a wase anmgbianev yô. Shighe u aahe a vihi akaa kpishi man anmgbianev mba hen ijiir la ve fetyô u sôron akaa shon ga yô, afishi a branci ka a tsua anmgbianev mba vea za na iwasen yô. Alaghga anmgbianev mban vea kaa ér ior ve na ayol a ve u za wasen, shin vea pine iwasen sha akaa a kwagh a gbe sha mi la jighilii, gayô vea yam akaa shon vea za na mba kwagh a er ve la.

Ka a dondo gbenda ne yô, akaa a dedoo a due ker. Kwagh la ka a pande tom shi a na i er tom sha inja shi i er kwagh a inyaregh man akaa a a lu la sha inja, sha ci u anmgbianev ka ve dondo kwagh u i kaa ér ve er la i kera lu mbamnenge vev ga.

Anmgbianev mba branci a tsough la ka ve nenge inyaregh ki vea vihi man iyenge i ior mba i gbe u vea za na iwasen yô. Shi vea fatyô u lamen a mbatomov mba gomoti mba hen ijiir shon sha er vea wase a na iwasen la fele yô. Nahan kpa, or a de ngohol inyaregh shin tindin a akaa hen mba aahe a bende a ve la ga, shi or a de moughon yemen hen ijiir shon ér nana za na iwasen ga, saa a kaa ér nana er nahan.

Jighilii yô, shighe u aahe a er yô ka i sar se u nan iwasen. (Heb 13:16) Anmgbianev asev doo se ishima! Nahan ka nyi se fatyô u erene? Kwagh u hemban cii yô, se fatyô u eren msen sha ci u mba aahe a bende a ve kua mba ve lu nan iwasen la. Shi se fatyô u eren iyua sha ci u tom u se eren sha tar cii la. Afishi a ubranci a a eren tom sha hemen u Mbahemenev mba Shin Itine la aa tsua kwagh u a er a uiyua mban ve a hemba lun sha inja yô. Aluer u soo u za wasen shighe u kwagh a er nahan yô, fii foom u Local Design/Construction Volunteer Application (DC-50) la.

NENGE VIDIO I MNGEREM VIHI AKAA KEN TAR U BRAZIL KPISHI LA, MAA NA MLUMUN SHA MPIN NE:

Ka nyi i doo u sha iwasen i Mbashiada mba Yehova na anmgbianev ken tar u Brazil shighe u mngerem vihi akaa ken inyom i 2020 laa?