Gba u mba henen Bibilo vea na Aôndo jighjigh taveraa ve vea fatyô u civir un ye. (Heb 11:6) Aluer se er tom a takeda u Lu Uma Gbem! la yô, se wase ve, vea na Aôndo jighjigh. I tese avur a Bibilo a hange hange kua mbamhen man mbampin mba wasen or u henen sha kwagh man uvidio mba taver or ishima kua ufoto mba doon ashe ken takeda u henen Bibilo a mi ne. Aluer se wase orhenen Bibilo u lun a aeren a Orkristu shi yan ijende a Aôndo yô, se lu maan nan sha ikyav mbi usu ua fatyô u hian ga yô.—1Ko 3:12-15.

Er se nengen a Aôndo ga yô mbagenev ka ve hen ér vea fatyô u yan ijende a na ga. Nahan gba u se wase ve vea fa aeren a Yehova a doon tsung la shi vea na un jighjigh.

NENGE VIDIO I ER TOM A TAKEDA U “U FATYÔ U LUN UMA GBEM SHA WON SHI A SAAN WE IYOL!” LA U WASEN MBAGENEV VE NA YEHOVA JIGHJIGH LA, MAA NA MLUMUN SHA MBAMPIN MBA VE DONDO NE:

• Er nan se fe ser anmgbian u kwase la wa iyol sha kwaghhenen la tsembelee?

• A pine orhenen Bibilo la mbampin sha inja mba wasen un u ôron mnenge na sha kwagh u Yesaia 41:10, 13 a ôr la nena?

• Vidio man avur a Bibilo la wase orhenen Bibilo la nena?

Ior kpishi kav kwagh u nagh ku ipaan la ga, shi ve nenge ér ka iyua i Aôndo a ne sha ci ve ga. (Ga 2:20) Sha nahan yô, a gba u se wase ve u nan nagh ku ipaan ku Yesu kura jighjigh.

NENGE VIDIO I ER TOM A TAKEDA U “U FATYÔ U LUN UMA GBEM SHA WON SHI A SAAN WE IYOL!” LA U WASEN MBAGENEV VE NA YESU JIGHJIGH LA, MAA NA MLUMUN SHA MBAMPIN MBA VE DONDO NE:

• Er nan se fe ser anmgbian u nomso la wa iyol sha kwaghhenen la tsembelee?

• A ôr kwagh za bende sha vegher u “Seer Henen Kwagh” la u wasen orhenen Bibilo la nena?

• Er nan ve i lu hange hange u eren msen sha ci u orhenen Bibilo?