Bibilo i ungwan a ungwa la ka nyi? Ka mkaanem ma Bibilo i New World Translation i i hidi i ser la. I kura ma sha u ungwan a ungwa. Mba duen a mi kure kure ken ijô kpishi. Môm ken akaa a a doo sha Bibilo ne yô, ior kposo kposo lam sha akenge a ior mba i nger kwagh ve ken Bibilo la. Ka i lam wang shi i gema a ikyenge sha ajiir agen sha er or u ungwan la nana zua a loho shon yô.

Bibilo i ungwan a ungwa ne ngi wasen ior nena? Ior kpishi mba ve ungwan Bibilo i ôron ne hanma shighe yô wuese er kwagh ne ka a wase ve u nengen a kwagh u Mkaanem ma Aôndo ma lu ôron la wang yô. Ka vea ungwa ior kposo kposo vea lam sha ityough ki mba i ôr kwagh ve ken Bibilo la nahan, ve hemba kaven kwagh u i nger la shi nengen a foto u kwagh shon ken ishima wang. (Anz 4:5) Ior kpishi kav er Bibilo i ungwan a ungwa ne ka i wase ve shighe u ishima i lu zan ve iyol yô.—Ps 94:19.

Ka a ôron Mkaanem ma Aôndo sea ungwan nahan ma bende a vese kpen kpen. (2Kr 34:19-21) Aluer Bibilo i ungwan a ungwa ne ngi jimin shin vegher ken zwa u u ongo yô, u fatyô u ungwan i hanma shighe u u lu eren mcivir kpa?

NENGE VIDIO I GBENDA U YANGE I ER BIBILO I UNGWAN A UNGWA LA YÔ—VIDIO I TIÔNÔÔ, MAA NA MLUMUN SHA MPIN U A DONDO NE:

Ka nyi i doo u sha gbenda u i er Bibilo i ungwan a ungwa ne la?