Takerada u Bibilo Tese Se man u Bibilo Tese la cii ka kwagh môm. Ityakerada yase i ihar ne cii se mba eren tom a mi u tesen ior Bibilo shi i cii i pase mimi u Bibilo la môm man sha adondo adondo kpaa kwagh môm. Nahan cii kpa, i nger takerada u Bibilo Tese Se la sha asember a taver ga shi anzaakaa kua akav a tesen a ker kpa taver u kaven ga. I gber u sha ci u mba alaghga a taver ve u kaven takerada u Bibilo Tese la. Shi takerada u Bibilo Tese Se la, ngu a ngeren u seer ga, kpa ngu a ngeren mba seer tan iwanger mba ve seer pasen asember kua akaa agen a i nger ken takerada shon yô. Mtom ma takerada u Bibilo Tese Se la, i kera hii ma sha mbampin ga shi ma a ngeren u kwagh u Bibilo i tese yô, ken mkur kpaa ga. Hanma ityough yô, ki a ngeren u saven ken mkur, u ngu a sav pasen mimi u Bibilo u i time sha mi ken ityough ki shon la. Er i ne takerada u Bibilo Tese la ken won hanma shighe nahan, Bibilo Tese Se la kpa a fatyô u nan un sha hanma shighe cii, aluer ka un i lu nan ken won ken uwer shon ga je kpaa. Nahan yô, se er tom a akaa a ken takerada u Bibilo Tese Se la, shighe u se lu henen Bibilo a or nena?

NGEREN U SAVEN: Mbagenev yô, gbenda u se henen kwagh a ior, u ka se ôr akumaihiange ken takerada u Bibilo Tese se bee maa se pine mpin la, ua doo ve. Nahan kpa, aluer orhenen Bibilo la nan fa zwa la tsembelee ga, shin nan fa u ôron takerada tsembelee ga di ye? Aluer ka nahan yô, u fatyô u henen kwagh a nan ken takerada u Bibilo Tese Se la. Maa eren tom a ngeren u saven u ka a lu ken mkur u hanma ityough la, nahan taver nan ishima u ôron ngeren u akumaihiange la sha shighe u nan. Hanma mimi u Bibilo yô, ka u shighe u ne tem kwaghhenen yô, ne fatyô u henen un ken miniti 15 nahan. Er i pase hanma kwagh ken ngeren u saven la er ken akumaihiange la nahan ga yô, doo u orpasenkwagh la nana wa agoyol tsembelee, shi nana lu a kwagh u orhenen Bibilo la ken ishima er nan lu wan agoyol la. Aluer orpasenkwagh la ngu henen kwagh a or ken ngeren u ken akumaihiange la yô, nana fatyô u eren tom a ngeren u saven la u hiden saven kwagh u ve hen la.

NGEREN MBA SEER TAN IWANGER: Asember kua akaa agen a i te iwanger sha mi ken ngeren u seer tan iwanger la, i ver a vough vough er a lu sha adondo adondo ken ityough ki shon la nahan. Aluer orpasenkwagh soo yô, nana fatyô u lamen vea orhenen Bibilo sha ngeren mba seer tan iwanger mba ken takerada u Bibilo Tese Se la shighe u ve lu henen kwagh la.