Shi cuku tsô Yehova una de u wan ishima a tar ne. A va timin ukwaghaôndo mbaaiev kera yô, mzough u akuraior cii una ta num sha ior mba Aôndo man Yehova una tim mbaaferev sha ityav mbi Armagedon. Mbakristu mba veren ashe a shighe u injaa u sagher iyol ne.

Nahan kpa, se fa hanma kwagh u una za hemen sha shighe u zegecan la ga. Ikyav i tesen yô, se fa shighe u una hii la jighilii ga. Se fa ityôkyaa i mbapatii mba ve lu a tahav la vea kôr ave sha mi u tan num sha kwaghaôndo ga. Se fa shighe u akuraior aa ta num sha ior mba Aôndo a za kighir, shin gbenda u vea nôngo num shon la ga. Shi se fa gbenda u Yehova una tim mbaaferev a mi sha shighe u Armagedon la jighilii ga.

Nahan cii kpa, Bibilo ôr se hanma kwagh u i gbe u se er ve se lu a vangertiôr shi se taver ishima se lu keghen akaa a aa va er ken hemen la yô. Ikyav i tesen yô, se fa ser se mba ken shighe u mkur u “ayange a masejime” ne. (2Ti 3:1) Se fa ser shighe u a ta num sha kwaghaôndo la, “a pande ayange” la sha er a tim kwaghaôndo u mimi ga yô. (Mt 24:22) Se fa ser Yehova una yima ior nav. (2Pe 2:9) Shi se fa ser, Un u Yehova a tsough sha u timin mbaaferev, geman yiman zegeikpelaior sha shighe u Armagedon la ka u jighjigh shi una nôngo ityav sha perapera kpaa.—Mp 19:11, 15, 16.

Akaa a aa va er ken hemen la aa na ior vea “hume sha ci u mciem.” Nahan kpa, aluer se mba ôron kwagh u igbenda i Yehova yange yima ior nav sha ayange a karen la, kua akaa a á pase ér aa va er ken hemen la shi henen sha mi zulee yô, se ‘tile sha jighilii shi se kende ityouv sha,’ se lu a vangertiôr ser myom wase zurum.—Lu 21:26, 28.