1 Mbakorinte 10:1-33
10 Nahan, anmgbianev, m soo mer fa nen kwagh ne: yange ibyeenegh gba mure sha uter asev mba tsev mbara cii, shi ve per zegemnger,
2 nahan ve cii i er ve batisema sha ikyev i Mose shighe u ibyeenegh kira gba mure sha ve kua shighe u ve lu peren zegemnger la,
3 shi ve cii ve ya kwaghyan u ken jijingi la môm,
4 shi ve cii ve ma mngerem ma ken jijingi shon môm. Gadia ve lu man mngerem ma ken vande u ken jijingi, u u lu zan a ve imôngo la; man vande la tile sha ityough ki* Kristu.
5 Nahan cii kpa, ishima doo Aôndo a mbagenev kpishi ken a ve ga, ka nahan ve i tim ve ken taaikyôngo ye.
6 Akaa ne hingir ikyav hen a vese, sha er a sar se u eren akaabo, er yange sar ve u eren a nahan ga yô.
7 Shi se hingir nen mbacivir eev er mbagenev ken ve er nahan ga; vough er i nger nahan, ér: “Nongoior la tema inya sha u vea ya kwagh shi vea ma kwagh. Tsô ve kighir ve mough sha u vea ember.”
8 Shi se er nen idya* er mbagenev ken a ve er idya* ve, ve kpe iorov 23,000 ken iyange i môm nahan ga.
9 Shi se kar nen Yehova* er mbagenev ken a ve kar un ve, íyô tim ve nahan ga.
10 Shi se lu nen mbagbanahon er mbagen ken a ve gba ahon ve, ortyom u timin ior va tim ve nahan ga.
11 Akaa ne er ve sha u i lu ikyav i tesen, man i nger a sha u i lu se icintan, se mba se lu uma sha shighe u mkur u tar ne la.
12 Sha nahan yô, or u nan hen ér nan tile la, nana̱ wa ikyo sha er nana gba ga yô.
13 Ma imeen igen ngi a tser ne ga, saa i i vanden tseren ior la tsô. Kpa Aôndo ka u jighjigh, una de ér i mee ne sha gbenda u hemban ne ga, kpa ken imeen la, una shi a bugh ne gbenda u waren, sha er ne fatyô u wan ishima a i yô.
14 Sha nahan yô, ne mba doon mo ishima, yevese nen eev mbu civir.
15 M ngu ôron kwagh ne a ven, ne mba lun a mkav; aluer kwagh u m lu ôron ne ka shami shin ka shami ga yô, kaa nen.
16 Kôôpu u* wain u ka se sugh Aôndo sha mi la tile sha ityough ki awambe a Kristu gaa? Kpenberedi u ka se coon la tile sha ityough ki iyol i Kristu gaa?
17 Er kpenberedi la u lu môm yô, tese ér, shin er se ngee nahan kpa, se mba iyol i môm; gadia se cii se mba ye kpenberedi la môm.
18 Nenge ase nen kwagh u Mbaiserael: Mba ka ve ya iniav mbi i nan la mba civir Aôndo sha atse a nan nagh la gaa?
19 Nahan ka nyi m lu ôrono? Mer akaa a i sôngon sha ci u akombo la nga kwagha? Shin akombo nga kwagha?
20 Ei; kpa m ngu ôron mer, kwagh u akuraior agen ka a na nagh a mi la, ka a na azôv, ka i lu Aôndo ga; man m soo mer lu nen mbacivir azôv ga.
21 Ne fatyô u man shin kôôpu u* Yehova* kua shin kôôpu u* azôv ga, shi ne fatyô u yan kwagh sha “tebul u Yehova”* kua sha tebul u azôv ga.
22 Shin ‘se mba nan ser Yehova* a̱ gba iyuhwe’?* Se hemba un agee?
23 Se mba a ian* i eren akaa cii, kpa ka akaa cii a lu a iwasen ga. Se mba a ian i eren akaa cii, kpa ka akaa cii a taver or ishima ga.
24 Hanma or nana̱ keren u eren kwagh u una lu mbagenev a iwasen yô, i̱ de lu sha ci u iwasen i nan iyol i nan ga.
25 Ya nen hanma inyam i i teen ken kasua cii, de pin nen kwagh ga, sha ci u imoshima yen,
26 gadia “tar kua hanma kwagh u a lu ken u cii, ka u Yehova.”*
27 Aluer or u nan jighjigh ga nan lôhô ne iwer man ne lumun u zan yô, ya nen hanma kwagh u i ne ne cii, de pin nen ma kwagh ga, sha ci u imoshima yen.
28 Kpa aluer or kaa a ven ér, “Kwagh ne i na nagh a mi” yô, de ye nen ga, sha ci u or u nan ôr ne la, kua sha ci u imoshima.
29 Ka imoshima yen m ôron ga, kpa ka i orgen la. Gadia a er nan man imoshima i orgen ia gema a lu ôron mo ijir sha ian i m lu a mi i yan kwagh u m soo laa?
30 Aluer m ngu sughun Aôndo sha kwagh u m lu yan la yô, a er nan orgen nana gema a lu lamen dang sha kwagh u m lu sughun Aôndo sha mi laa?
31 Sha nahan yô, aluer ne mba yan kwagh shin man kwagh shin eren nyityôkwagh igen cii kpaa, eren nen akaa cii sha ci u icivir i Aôndo.
32 De eren nen akaa a nan Mbayuda man Mbagrika kua tiônnongo* u Aôndo gbeev mbu nôngon ga,
33 vough er m lu nôngon eren akaa cii mer i doo ior cii, m lu keren i lu mtsera wam ga, kpa i lu u ior kpishi, mer i̱ yima ve nahan.
Ngeren mba shin kpe
^ Shin “vande la lu.”
^ Zwa Grika, porneia (ponia). Nenge Ngeren u Pasen Asember.
^ Zwa Grika, porneia (ponia). Nenge Ngeren u Pasen Asember.
^ Nenge Ngeren u Pasen Asember.
^ Shin “Iyongo i.”
^ Shin “iyongo i.”
^ Nenge Ngeren u Pasen Asember.
^ Shin “iyongo i.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “a̱ vihi ishima.”
^ Shin “tindi na se ian.”
^ Nenge Ngeren u Pasen Asember.
^ Nenge Ngeren u Pasen Asember.
