1 Mbakorinte 13:1-13
-
Dooshima—ka kwagh u a hembe cii yô (1-13)
13 Aluer m ngu lamen ijô i ior man i mbatyomov, kpa m ngu a dooshima ga yô, m hingir er kwen shin iyôgh ki i lu kuhwan nahan.
2 Aluer m ngu a iyua i ôron kwaghôron u profeti shi ka m kav akaamyer a Aôndo shi m ngu a mfe sha akaa cii, shi aluer m ngu a jighjigh u nan je ka u me fatyô u moughon a iwo,* kpa m ngu a dooshima ga yô, m ngu ma kwagh ga.*
3 Shi aluer m na akaa a am cii mer i koso mbagenev a mi, shi m kegh iyol u kpen, sha u me zua a ityôkyaa i kaan ihyagh, kpa m ngu a dooshima ga yô, a lum a inja cuku kpaa ga.
4 Dooshima we ishima shi tesen erdoo. Dooshima gbe iyuhwe ga, kaan ihyagh ga, shi moron iyol ga,
5 eren dang de dang ga,* keren mtsera na ga, nyoon ishima ga, koson kwaghbo ken ishima ga.*
6 Dooshima ember sha kwagh u ifer ga, kpa ka a ember sha kwagh u mimi.
7 Dooshima we ishima a akaa cii, ne jighjigh a akaa cii, lun a ishimaverenkeghen sha akaa cii, taver ishima sha akaa cii.
8 Dooshima been mayange ga. Kpa uiyua mba ôron kwaghôron u profeti yô, a va kar a mi kera; ijô i lamen* kpaa, ia va bee kera; mfe kpaa, a va kar a mi kera.
9 Gadia mfe wase yina, shi kwaghôron u profeti u ka se ôr la kpa yina,
10 kpa zum u kwagh u a lu u vough la una va yô, a kar a kwagh u a yen la kera.
11 Shighe u m lu wanye la, m lamen er wanye nahan, m henen kwagh er wanye nahan, m nengen kwagh er wanye nahan; kpa hegen u m hingir organden ne, m de aeren a wanye la.
12 Gadia hegen se mba nengen a akaa cing, er ka ken jingi i iyôôgh* nahan, kpa sha shighe la yô, se nenge a mi wang, er ka ishigh a ishigh nahan. Hegen yô, mfe wam yina, kpa shighe la yô, me fa hanma kwagh vindi vindi,* vough er i* fe kwagh wam vindi vindi nahan.
13 Nahan kpa, akaa a atar ne yô, nga lun her, ka: jighjigh u nan man ishimaverenkeghen man dooshima; kpa kwagh u hemban ken a cii yô, ka dooshima.
Ngeren mba shin kpe
^ Shin “moughon a iwo za veren pe gen.”
^ Shin “m ngu ityôkyaa ga.”
^ Shin “cihin or ga.”
^ Shin “we kwagh ishima a or ga.”
^ Ka, “iyua i lamen ijô igen sha ivande” je la.
^ Sha ayange a tsuaa la, lu ujingi mba iyôôgh ior nengen ye.
^ Shin “me fa akaa cii.”
^ Ka, “Aôndo” je la.
