1 Mbakorinte 6:1-20
6 Kwagh ka una zua orgen ken a ven a anmgbian nahan, ka nan za a zayol shon ken atejir, hen mba ve dondon atindi a Aôndo ga la, nan de zan a mi hen uicighanmbaiorovoo?
2 Shin ne fa er i lu uicighanmbaiorov vea va ôr tar ne ijir ga? Man aluer ka u ne ôr tar ijir yô, ne kuma u ôron ajir a kiriki gaa?
3 Ne fa er i lu se se va ôr mbatyomov ijir gaa? Nahan a er nan se fatyô u ôron ijir sha akaa a shin tar ne ga?
4 Man aluer gba u ne ôr ijir sha akaa a shin tar ne yô, ka ior mba ve gbe kwagh ken tiônnongo ga la ne za a ijir hen a ve yee?
5 M ngu ôron kwagh ne sha u kunya u kôr ne a iyol yen. Orfankwagh môm ngu ken a ven u nana fatyô u ôron anmgbianev mba nan ijir gaa?
6 Kpa anmgbian ka nan za yila anmgbian ugen ijir ken atejir, hen mbanan jighjigh ga!
7 Mimi je, aluer ne mba za yilan mbagenev ijir ken atejir yô, kwagh hemba ne je ve. Er nan ka a er kwagh a ven shami ga kpa ne gba den kera tsô ga? Er nan ka ne de ner kwagh a saa ne ga?
8 Kpa ka ne gema ne er mbagenev kwaghbo, shi ne ya ve kwagh,* man ka anmgbianev enev je!
9 Man ne fa er ior mba ve eren aferakaa cii vea ya dyako u Tartor u Aôndo ga kpa? Or a de tsughun ne ga. Mbaeren idya* man mbacivir ieev man mba nzughul a ivaa sha idya* man nomso mba ka ve lumun ér nomso ve yav a ve la, man nomso mbayaven a nomso,
10 man mbaiv man mbaeren hua man mbahunden msôrom man mbatuhwan ior* kua mbanumungbenda cii, vea ya dyako u Tartor u Aôndo ga.
11 Man kape ne mbagenev kpa yange ne lu je la. Kpa i ôô ne; i tsegha ne; i nenge ér ne mba mbaperapera ken iti i Ter Yesu Kristu man sha jijingi u Aôndo wase.
12 M ngu a ian* i eren akaa cii, kpa ka akaa cii a lu a inja ga. M ngu a ian i eren akaa cii, kpa me de mer kwagh môm a ya tor* sha a mo ga.
13 Kwaghyan ngu sha ci u iyav, iyav di mbu sha ci u kwaghyan, kpa ve cii Aôndo una va kar a ve kera. Iyol ngi sha ci u idya* ga, kpa ngi sha ci u Ter, Ter di ngu sha ci u iyol.
14 Kpa Aôndo nder Ter shin ku, shi se kpa una va nder se shin ku sha tahav nav.
15 Ne fa er iyol yen i lu alegh a iyol i Kristu gaa? Nahan m̱ tôndo alegh a sha iyol i Kristu m̱ za zor a sha iyol i agbagaa? Mayange ga!
16 Ne fa er or u i zor nan sha gbaga la nan hingir iyol i môm a na gaa? Gadia Aôndo kaa ér, “Ve uhar cii vea hingir iyol i môm.”
17 Kpa hanma or u i zor nan sha Ter yô, nan kua Ter cii ve hingir môm ken jijingi.
18 Yevese nen idya!* Hanma isholibo igen i or nana er cii yô, ia bende a iyol i nan ga, kpa or u nan eren idya yô, nan ngu eren iyol i nan kwaghbo.
19 Ne fa er iyol yen i lu tempel u icighan jijingi u Aôndo a na ne, a lu ken a ven la gaa? Heela tseegh ga, ne mba kwagh wen iyol yen ga,
20 gadia i yam ne sha ishe je. Sha nahan yô, nôngo nen tsung naan nen Aôndo icivir ken iyol yen.
Ngeren mba shin kpe
^ Shin “ne nyighe ve.”
^ Zwa Grika, porneia (ponia). Nenge Ngeren u Pasen Asember.
^ Ka noov shin kasev mba yaven a or u ve vese ga la je la.
^ Shin “mbalahan ior.”
^ Shin “Tindi nam ian.”
^ Shin “a lu a tahav.”
^ Zwa Grika, porneia (ponia). Nenge Ngeren u Pasen Asember.
^ Zwa Grika, porneia (ponia). Nenge Ngeren u Pasen Asember.
