1 Mbakorinte 7:1-40
7 Gema sha akaa a yange ne nger kwagh sha mi la yô, guda nomsoor nana̱ de benden* a kwase ga;
2 kpa er idya* i ngee yum yô, hanma or nana̱ lu a kwase u nan, shi hanma kwase nana̱ lu a nom u nan.
3 Nom nana̱ eren kwase u nan kwagh u i gbe u nana eren nan la, kwase kpa nana̱ eren nom u nan nahan.
4 Kwase ngu a tahav sha iyol i nan ga, ka nom u nan a lu a tahav sha i ye; nom kpaa, kape nan lu a tahav sha iyol i nan ga, i lu kwase u nan a lu a tahav sha i je la.
5 De nyumen nen ayol a en ga, saa shighe u ne gbe zwa môm ner ne hôr, ne ver ishima ne er msen tsô ne hide ne zua la tseegh, sha er Satan una zer meen ne ga yô, sha ci u alaghga a taver ne u kôron iyol tsaha.
6 Kwagh u m lu ôron yô mer, ne fatyô u eren ivaa, kpa m wa ne a wa tindi ga.
7 Sarem pe ior cii ma ve lu er m lu nahan. Kpa hanma or ngu a iyua i Aôndo a ne nan yô, orgen ka sha gbenda u ngun, orgen di sha gbenda u ngula.
8 M ngu ôron a mba ve lu kwav kua kasev mba côgholov mer, aluer mba er m lu nahan yô, a hemba doon ve.
9 Kpa aluer mba fan ityô u kôron iyol tsaha ga yô, ve er ivaa, gadia guda u eren ivaa, a u isharen i yaven a or yughur ken a we la.
10 M ngu wan mba ve er ivaa la kwagh, kpa ka mo ga, ka Ter, mer kwase nana̱ de duen hen nom u nan kera ga.
11 Kpa aluer nan due yô, nana̱ lu kwav, gayô nana̱ hide a̱ hime a nom u nan la; nom kpa nana̱ de undun kwase u nan ga.
12 Kpa mbagenev yô, m ngu wan ve kwagh, ka mo, ka Ter ga, mer: Aluer anmgbian ngu a kwase u nan ne jighjigh ga, man kwase la lumun u lun vea nan yô, nana̱ de undun kwase shon ga;
13 shi aluer kwase ngu a nom u nan ne jighjigh ga, man nom la lumun u lun vea nan yô, nana̱ de undun nom u nan la ga.
14 Gadia ivaa i nom u nan ne jighjigh ga la ngi wang sha ci u kwase u nan, shi ivaa i kwase u nan ne jighjigh ga la ngi wang sha ci u anmgbian u nomso la; gayô, mbayev enev ma ve lu wang ga, kpa sha nahan yô, mba wang.
15 Kpa aluer or u nan ne jighjigh ga la nan tsua u yemen kwagh u nan* yô, de nana̱ yem; tindi kange anmgbian u nomso shin anmgbian u kwase ken imba mlu la ga, kpa Aôndo yila ne ér ne lu ken bem.
16 Gadia we kwase, aluer ka u u yima nomou yô u faa? Shin we nom, aluer ka u u yima kwase wou yô u faa?
17 Nahan kpa, hanma or nana̱ eren kwagh sha kwar u Yehova* a ne nan la, vough er yange nan lu ve i yila nan la. Atôônanongo cii ka kwagh u m lu ôron a je la.
18 Ma or ngu u yange i tsôngo nan kera cii ve i yila nan yôô? Yô nana̱ de gem kwagh sha icôngo i nan la ga. Ma or ngu u yange nan lu ipyusu shighe u i yila nan la yôô? Yô nana̱ de tsôngon ga.
19 Icôngo ngi kwagh ga, ipyusu kpa ngi kwagh ga; kwagh u a lu kwagh yô, ka u kuran atindi a Aôndo.
20 Hanma or nana̱ lu ken nyityô mlu u yange nan lu ker shighe u i yila nan la her.
21 Shighe u i yila u la, u lu kpana? Kwagh la a de ze u iyol ga; kpa aluer ka u u fatyô u duen ken kpan kera yô, er nahan.
22 Gadia hanma or u yange nan lu ken kpan shighe u i yila nan ken Ter la yô, i dugh nan ken kpan kera, nan hingir kwagh u Ter; shi hanma or u yange nan due ken kpan kera cii i va yila nan yô, nan hingir kpan u Kristu.
23 Yange i yam ne sha ishe je; nahan de nen u hingir ikpan i ior.
24 Anmgbianev, hanma or nana̱ lu ken nyityô mlu u yange nan lu ker shighe u i yila nan la her, sha ishigh ki Aôndo.
25 Sha kwagh u mba lun kwav yô,* m ngu a tindi u a dugh hen Ter ga, kpa m ngu ôron ve mnenge wam sha inja i or u Ter a zungu nan mhôônom sha u i̱ na kwaghôron u nan jighjigh yô.
26 Sha nahan yô, m nenge mer hemba doon u or a lu ken mlu u nan lu ker la her, sha ci u ashighe a ican a se lu ker hegen ne.
27 U er kwasee? Yô de u keren wer u pav a nan. U pav a kwasee? Yô de u keren wer u er kwase.
28 Kpa aluer u er kwase je kpa, u er isholibo ga. Shi aluer orukwa nan er ivaa je kpa, imbaor la nan er isholibo ga. Nahan kpa, mba ve er ivaa yô, vea ya ican sha iyol. Kpa m ngu nôngon mer ican i de tseren ne ga.
29 Heela tseegh ga, anmgbianev, shighe kera shi vese ga. Hii hegen je, or u nan lu a kwase kpa, nana̱ lu er nan ngu a kwase ga nahan,
30 mba ve lu vaan kpa, ve lu er mba vaan ga nahan; mba ve lu ember kpa, ve lu er mba ember ga nahan; mba ve lu yamen akaa kpa, ve lu er mba a kwagh ga nahan;
31 shi mba ve lu zuan a mtsera u tar ne kpa, ve lu er mba zuan a mtsera gbing ga nahan; gadia mlu u tar ne ngu geman.
32 Jighilii yô, m soo mer lu nen a ishimanyian ga. Or u nan vese kwase ga yô, ishima ka i nyian nan sha akaa a Ter, er nana er ve a doo Ter a nan yô.
33 Kpa or u nan er kwase yô, ishima ka i nyian nan sha akaa a taregh, er nana er ve a doo kwase u nan a nan yô;
34 ishima ka i dan nan kpaa. Shi kwase u nan lu kwav, shin nan lu iniun yô, ishima ka i nyian nan sha akaa a Ter, er nana lu wang sha iyol man ken ishima i nan kpaa yô. Kpa kwase u nan er nom yô, ishima ka i nyian nan sha akaa a taregh, er nana er ve a doo nom u nan a nan yô.
35 Kpa m ngu ôron kwagh ne sha ci u iwasen yen, ka u tsweren ne kwagh* ga, kpa ka u wasen ne sha er ne eren kwagh u a doo, nahan ne za hemen u shiren Ter tom hanma shighe, a kwagh u danen ne shio yô.
36 Kpa aluer or nenge ér nan ngu eren kwagh u vough ga shighe u nan lu kwav la, man nan kar iaven i hian a hia* la yô, ka kwagh u i doo u nana er je ne: Nana̱ er kwagh u nan soo la; nan er isholibo ga. Ve̱ er ivaa.
37 Kpa aluer or wa ken ishima i nan ér nana lu kwav,* shi nan kange ishima u eren nahan, sha ci u nan nenge a ityôkyaa i eren ivaa ga, shi nan fatyô u kighir asaren a nan yô, a doo.
38 Shi kape aluer or er ivaa kpaa, a doo je la, kpa aluer or er ivaa ga yô, a hemba doon.
39 Gba u kwase nana lu hen nom u nan, er nom u nan la a lu uma her je. Kpa aluer nom u nan kpe yô, nan ngu a ian i vôson or u nan soo cii, kpa i lu ken Ter tseegh.
40 Kpa sha mnenge wam yô, a hemba saan nan iyol, aluer nan saa nahan yô; m nenge mer mimi je, mo kpa m ngu a jijingi u Aôndo.
Ngeren mba shin kpe
^ Ka, “u yaven a kwase” je la.
^ Zwa Grika, porneia (ponia). Nenge Ngeren u Pasen Asember.
^ Shin “undun ivaa.”
^ Nenge Ngeren u Pasen Asember.
^ Shin “mba i lu je ve lu a er kwase shin nom ga yô.”
^ Zwa Grika, “m ngu haan ne abata.”
^ Mba kaan heen ér nana kar iaven i isharen i yaven a or ka i taver ken agumaior yum la.
^ Shin “nana saa lun iniun.”
