1 Mbatesalonika 3:1-13
3 Nahan yange se mba kera fetyô u wan ishima ga yô, se nenge ser hemba doon u se lu hen Atene her se tseegh;
2 nahan se tindi Timoteu, anmgbian wase man ortom u Aôndo* sha loho u dedoo u sha kwagh u Kristu, ser a va taver ne asema shi a sur ne asema sha jighjigh u nan wen,
3 sha er or môm nana tenger* sha ci u atsan ne ga yô. Gadia ne ayol a en ne fa er i lu u se fatyô u palegh u yan ican sha ambaakaa ne ga* yô.
4 Gadia shighe u se lu vea ven la, se lu vanden ôron ne tsuaa je ser ka u se ya ican, man ka kwagh u a er je la, er ne fe nahan.
5 Ka nahan ve, zum u m kera fatyô u wan ishima ga yô, m tindi mer me fa kwagh u jighjigh wen ye, sha ci u alaghga tsô Ormee va mee ne, nahan tom wase hingir gbilinkwagh.
6 Kpa Timoteu sember moughon hen a ven hiden hen a vese, a va ôr se loho u dedoo sha kwagh u jighjigh wen man dooshima wen, ér ka ne shi umbur se a iember, shi ka saren ne tsung u nengen a vese, vough er se kpa i lu nahan.
7 Anmgbianev, ka nahan ve ken mbamtaver asev* man atsan a ase cii kpa, se lu zuan a msurshima sha kwagh wen kua sha kwagh u jighjigh u ne lu tesen la ye.
8 Sha ci u se fatyô u hiden zuan a agee,* aluer ne tile her dông ken Ter yô.
9 Gadia ka sha nyi gbenda se fatyô u sughun Aôndo sha kwagh wen sha ci u iember i vesen i se zough a mi sha ishigh ki Aôndo wase sha kwagh wen laa?
10 Ka se shi eren msen tugh man atetan zamber sha afatyô wase cii, ser ma se zough ishigh a ven, shi ma se ne ne kwagh u a lu yinan sha jighjigh u nan wen la.
11 Yô, Aôndo Ter wase iyol na man Ter Yesu ma ve bugh se gbenda u van hen a ven.
12 Heela tseegh ga, Ter ma a ne dooshima wen ma a seer a seer, ma ne doo ayol a en tsung, shi ma ne doo a ior cii, vough er ne doo se ishima tsung nahan,
13 sha er una taver asema a en, ne lu a acôghor ga, ne lu wang sha ishigh ki Aôndo Ter wase, sha shighe u Ter wase Yesu una lu vea uicighanmbaiorov nav cii imôngo la yô.
Ngeren mba shin kpe
^ Shin a fatyô u kaan ér, “man or u eren tom vea Aôndo imôngo.”
^ Zwa Grika, “nyura.”
^ Shin “ne fa er i lu sha ci u kwagh ne je i tsough se.”
^ Zwa Grika, “ken ibanave yase.”
^ Zwa Grika, “se fatyô u lun uma.”
