1 Mbatesalonika 4:1-18
4 U masen yô, anmgbianev, er yange se tese ne er ne zende ve a doo Aôndo, shi ne lu zenden nahan vough yô, se mba zamber shi kaan a ven ken iti i Ter Yesu ser, za nen hemen u eren nahan i̱ hemba ave a tse.
2 Gadia ne fa akaa a yange se tese ne* ken iti i Ter Yesu la.
3 Gadia ishima i Aôndo yô ka u ne̱ lu wang shi ne̱ nyagh idya.*
4 Hanma wen nana̱ fa u kôron iyol i* nan tsaha sha er ia lu wang shi ia lu a icivir yô,
5 de eren nen hua sha u lun a isharen i yaven a or, i ior ve kôron iyol tsaha sha mi ga, er akuraior a a fe Aôndo ga la a eren nahan la ga.
6 Or môm nana̱ de peren atindi a sha kwagh u aeren a wang la, nahan nana̱ eren anmgbian u nan kwagh u dang ga, gadia Yehova* ve a mtsaha sha akaa ne cii, vough er se vande ôron ne shi se te ne icin gbang gbang nahan.
7 Gadia Aôndo yila se ér se̱ eren akaa a hôngorough ga, kpa ka u se̱ lu wang.
8 Nahan or u nan we kwagh ne ikyo ga yô, ka orumace nan lu hemban nan ato ga, kpa ka Aôndo u a nan ne icighan jijingi la.
9 Nahan kpa, kwagh u dooshima u hen atô u anmgbianev la yô, saa se nger ne kwagh sha mi keng ga, gadia Aôndo ngu tesen ne ér ne doo ayol a en.
10 Jighilii yô, ne mba vanden eren a anmgbianev mba ken Masedonia cii nahan. Kpa, anmgbianev, se mba taver ne ishima ser, za nen hemen u eren nahan i̱ hemba ave a tse.
11 Nôngo nen sha afatyô wen cii lu nen inja kundu kundu, shi de keren nen u wan ave sha akaa a ior ga, shi eren nen tom sha ave a en, vough er se tese ne nahan,
12 sha er ne zenden sha inja sha ishigh ki ior mba ken inya, shi ma kwagh a ban ne ga yô.
13 Kwagh ugen yô, anmgbianev, sar se u ma ne lan kwagh u mba ve kpe* la ga, sha er ne zungwe er mba ve lu a ishimaverenkeghen ga ve eren la ga yô.
14 Gadia aluer se na jighjigh ser Yesu kpe shi a nder shin ku yô, kape mba ve kpe ken Yesu la kpa Aôndo una nder ve sha u ve̱ lu a na imôngo je la.
15 Gadia ka kwagh u se lu ôron ne sha imo i Yehova* je ne, ser: Se mba se lu uma zan zan shighe u Ter una lu vea vese imôngo la, mayange se vande a mba ve kpe la ga,
16 sha ci u Ter iyol na una sen sha una va kaa imo sha ikyenge i ortyom u tamen man sha busa u Aôndo, nahan mba ve kpe ken Kristu la vea vande nderen shin ku.
17 Maa a tôô se mba se lu uma her la vea ve imôngo a yem a vese sha abeen, se za kohol ter sha ahumbe; nahan se za hemen u lun vea Ter gbem.
18 Yô surun nen hanmô wen ishima sha mkaanem man.
Ngeren mba shin kpe
^ Shin “se kaa ser eren nen.”
^ Zwa Grika, porneia (ponia). Nenge Ngeren u Pasen Asember.
^ Zwa Grika, “ikyagh ki.”
^ Nenge Ngeren u Pasen Asember.
^ Shin “mba ve lu yaven shin ku.”
^ Nenge Ngeren u Pasen Asember.