1 Peteru 1:1-25
1 Mo Peteru, apostoli u Yesu Kristu, m ngu ngeren hen ushirmbaiorov mba ve sambe ve yem ken Ponti, man Galatia, man Kapadoshia, man Ashia man Bitinia la, hen ne mba i tsough ne
2 er Aôndo Ter tsenga fan nahan, shi i tsegha ne sha jijingi sha u ne̱ lu mba ungwan kwagh, shi i mishi awambe a Yesu Kristu sha a ven la:
Aôndo a̱ seer tesen ne erdoo u sha mhôôn shi a̱ seer nan ne bem.
3 I̱ wuese Aôndo, Ter u Ter wase Yesu Kristu, gadia ka sha mhôônom nam ma zungwen tsung a hide a mar se sha u se̱ lu a ishimaverenkeghen i lun uma ye. A er kwagh ne sha u nderen Yesu Kristu shin ku,
4 nan un dyako u hôôn ga, u a lu a acôghor ga, shi a lu u been mayange ga la. I ver ne dyako shon sha,
5 ne mba i lu kuran ne sha tahav mbu Aôndo, sha jighjigh u ne lu a mi sha kwagh u myom u i lu keghen ér a va pase ken ashighe a masejime ne la.
6 Sha ityôkyaa ne yô, saan ne iyol tsung, shin er hegen i gbe u ne zungwe sha atsan atô kposo kposo shighe a wa karen nahan kpaa,
7 sha er jighjigh u nan wen u i kar un la una hingir ityôkyaa i ne zua a iwuese man iengem man icivir sha shighe u a va nenge a mve u Yesu Kristu la yô. Gadia imba jighjigh u nan la ngu a inja hemba zanaria u ka i kar un sha usu kpa a va saa ishe la ica je.
8 Shin er yange ne nenge a na ma shighe môm ga nahan kpa, a doo ne ishima. Shin er ne lu nengen a na hegen ga nahan kpa, ne na un jighjigh shi saan ne iyol tsung, shi iember yen ngee je gande u ôron,
9 gadia ne mba nôngon ner ne zua a myom u a lu awashima u jighjigh u nan wen la.
10 Lu kwagh u myom ne, uprofeti mba yange ve tsenga ôron kwagh u erdoo u sha mhôôn u a lu sha ci wen la, yange ve ker sha gbashima sha u vea fa, shi ve tôv sha mi vighe vighe ye.
11 Ve zer tôvon sha u vea fa iaven shin shighe u jijingi u lu ken a ve la lu tesen sha kwagh u Kristu, er tsenga eren shiada sha kwagh u atsan a yange gba u Kristu una ya, man icivir i una zua a mi ken masejime la.
12 Yange i pase ve ér ve mba eren tom ka sha ci ve ayol a ve ga, kpa ka sha ci wen, ka tom u sha kwagh u i lu yôôn hen a ven hegen sha ikyev i mba yange ve pase ne loho u dedoo sha icighan jijingi u i tindi sen sha a ve la. Akaa ne sar mbatyomov u gban ashe nengen.
13 Sha nahan yô, kange nen ishima u eren tom; lu nen tsevaa sha hanma gbenda cii; lu nen a ishimaverenkeghen sha kwagh u erdoo u sha mhôôn u a va tese ne sha shighe u a va nenge a mve u Yesu Kristu la.
14 Er ne lu ônov mba ungwan kwagh yô, i̱ de u maan ne* sha asaren a yange ne lu a mi ken mlan la,
15 kpa ne ayol a en hingir nen uicighanmbaiorov sha aeren a en cii, er Un u a yer ne la a lu Icighan nahan,
16 gadia i nger ér: “Lu nen uicighanmbaiorov, sha ci u mo kpa m ngu icighan.”
17 Man aluer ne mba yilan sha iti i Ter, u a ôron hanma or ijir er tom u nan u lu, a sangen a sangen ga la yô, eren nen kwagh a mciem iyol hen shighe u ne lu ushirmbaiorov ne.
18 Gadia er ne fe nahan, lu sha akaa a ka a hôô,* er azurfa shin zanaria nahan, yange i paa ne ne kera lu sha ikyev i uma wen u gbilinigh u uter enev mba tsev yese ne ker* la ga.
19 Kpa lu sha awambe a injaa, er awambe a waniyôngo u lun a acôghor shin ihyogholough iyol shio nahan, ka awambe a Kristu je la.
20 Jighilii yô, yange i tsenga fan un er i lu a gba tar ga la je, kpa i va tese un ken igbar ken ashighe a masejime ne sha ci wen.
21 Ka ken a na ne lu mba nan Aôndo jighjigh ye, Un u yange nder un shin ku shi na un iengem la, sha er ne na Aôndo jighjigh shi ne lu veren ishima keghen Un yô.
22 Er hegen ne wanger ayol a en sha u dondon ityesen i mimi, ne hingir u soon hanma wen sha mimi,* er ka anmgbianev mba hen tsombor nahan yô, doo nen ayol a en tsung, a ishima i môm.
23 Gadia i hide i mar ne, ka sha vor u ka u hôô kera la ga, kpa ka sha vor u u hôôn mayange ga* yô, sha mkaanem ma Aôndo u uma man u tsôron la.
24 Gadia “orumace cii ngu er toho nahan, shi iengem na cii ngi er ikparen i ken toho nahan; toho ka u use, faluwa a ndoor,
25 kpa mkaanem ma* Yehova* yô, ma a lu her gbem sha won.” Man “mkaanem” mara* ka loho u dedoo u i pase ne la.
Ngeren mba shin kpe
^ Shin “i̱ de u geman mhen wen.”
^ Shin “a saa ishe.”
^ Shin “u i tese ne sha aeren a uter enev mba tsev.”
^ Shin “i lu sha atseregh ga; i lu sha ikpam-ashe ga.”
^ Ka, “vor u ua fatyô u tseren shin umen atam” je la.
^ Shin “kwaghôron u.”
^ Nenge Ngeren u Pasen Asember.
^ Shin “kwaghôron la.”
