1 Peteru 3:1-22
3 Ne kasev kpaa, wa nen ayol a en sha ikyev i noov enev, sha er aluer vea lu mba wan kwaghôron u Aôndo ikyo ga je kpa, a urugh ve vea hingir u eren nahan, a lu sha kwaghôron ga, kpa a lu sha ieren i kasev vev yô,
2 sha ci u vea lu nengen a ieren yen i wang la sha ashe a ve, kua icivir i ne lu nan ve tsung la.
3 Hwe wen a̱ de lu u ken won—er ityough ki kuran man u wuhan iyol sha akaa a sha zanaria a eren hwe a mi, shin sha akondo a dedoo nahan—ga,
4 kpa i̱ lu hwe u ken ishima, u or u ken myer, u a saan ishe ga la, ka ishima i legh legh man ieren i lun ving je la, aeren ne gba kwagh sha ishigh ki Aôndo kpen kpen.
5 Gadia kape uicighanmbaukasev mba sha ayange a tsuaa, mba ve suur sha Aôndo la kpa yange ve eren hwe je la, ve wa ayol a ve sha ikyev i noov vev,
6 vough er Sara ungwan imo i Aberaham nahan, yange yilan un ér “terem.” Man ne hingir ônov nav,* aluer ne za hemen u eren kwagh u dedoo, ne nyôr mciem ga yô.
7 Ne noov kpaa, luun nen vea ve sha mkav.* Eren nen kwagh a ve sha ue, er ka i eren a ikyagh ki ki ngôôr hemben ga nahan, ka kwase je la, gadia ve kpa mba mbayan dyako u uma u i lu nan sha erdoo u sha mhôôn la a ven imôngo, sha er Aôndo una venda u ungwan mbamsen enev ga yô.
8 U masen yô, ne cii lu nen ishima i môm,* zungwen nen a mbagenev imôngo, doo nen ayol a en er ka anmgbianev mba hen tsombor nahan, zungwen nen mbagenev mhôônom tsung, shi hiden nen a iyol ijime.
9 De eren nen or ifer sha ifer i nan er ne ga, shin or a̱ laha ne kpa, ne de lahan nen nan ga. Kpa gema sôn nen iveren sha ci u nan, gadia ka kwagh u i yer ne sha u ne̱ er je ne, sha er ne ya dyako u iveren yô.
10 Gadia “hanma or u nan soo ér i saan nan iyol shi i kpe nan iyol ken uma yô, gba u nana kura nombor u nan sha er ua ôr kwagh u bo ga, kua zwa u nan sha er ua er aie ga yô.
11 Nana̱ de ifer, nana̱ eren kwagh u dedoo; nana̱ ker bem shi nana̱ za hemen u eren akaa a van a bem.
12 Gadia ashe a Yehova* nga sha mbaperapera, shi ato a na nga ongo mbamsen vev mba zamber, kpa Yehova* gem ijime a mbaerenafer.”
13 Jighilii yô, aluer ne hingir u tesen gbashima sha kwagh u dedoo yô, ka an nana bula ne?
14 Kpa aluer ne mba yan ican sha ci u kwagh u perapera je kpa, a saan ne iyol. Nahan kpa, de cie nen kwagh u a cier ve iyol* la ga, ishima kpa i̱ de ze ne iyol ga.
15 Kpa tsegha nen Kristu ken asema a en ner ngu Ter wen, hanma shighe yô, waan nen iyol keghen nen a kegh u pasen kwagh sha ishigh ki hanma or u nana pine ne ityôkyaa i ishimaverenkeghen yen yô, kpa eren nen nahan a ishima i legh legh man sha icivir tsung.
16 Za nen hemen u lun a imoshima i dedoo, sha er aluer ka nyi je i lu ôron sha a ven kpa, mba ve ôron akaa sha a ven dang la vea va ahenge sha ci u ieren yen i dedoo i mbadondon Kristu la yô.
17 Gadia hemba kan a inja u ne yan ican sha ci u ne mba eren kwagh u dedoo, aluer ka ishima i Aôndo u den ér i lu nahan yô, a u ne yan ican sha ci u ne mba eren kwaghbo la.
18 Gadia Kristu yange kpe sha ci u asorabo kwa môm maa kure hanma kwagh, orperapera môm kpe sha ci u mbaerenakaabo, sha er una za a ven hen Aôndo yô. Yange i wua un shighe u lu ken iyol i inyam man awambe la, kpa i nder un ngu uma ken jijingi.
19 Man ka ken mlu ne yange za pase ujijingi mba ve lu uikyangen ken purusu la kwagh ye,
20 ka ujijingi mba ngise ve lu hemban ato shighe u Aôndo lu wan ishima keghen sha ayange a Noa, zum u i lu gban tso u iorov kpuaa, ka uumace* anigheni je la, ve nyôr ker ve lu sha zarmnger, nahan ve war la.
21 Kwagh ne zua sha batisema, u un kpa a lu waren ne hegen (i lu sha u wanger hôngor u sha iyol kera ga, kpa i lu sha u sônon Aôndo sha u a̱ na ne lu a imoshima i dedoo) sha mnder u shin ku u Yesu Kristu la.
22 Ngu ken uwegh ku yanegh ku Aôndo, gadia yange kôndo yem sha, nahan i gema mbatyomov man mbautahav kua tahav cii, i wa un sha ikyev.
Ngeren mba shin kpe
^ Ka, “Sara” je la.
^ Shin “tesen nen ve ikyo i wan; nôngon nen u kaven mlu ve.”
^ Shin “henen nen kwagh ken mzough.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin a fatyô u kaan ér, “de cie nen kume ve.”
^ Zwa Grika, “uuma.”
